ʻOku hanganaki tuʻu-ʻatā fakapolitikale ʻa e Kau Fakamoʻoni ʻa Sihová ʻi he ngaahi ʻuhinga fakalotu, makatuʻunga ʻi he meʻa ʻoku akoʻi ʻe he Tohi Tapú. ʻOku ʻikai ke mau kemipeini, fili ha faʻahi fakapolitikale pe kau kanititeiti, feʻauhi ki ha lakanga ʻi he puleʻangá, pe kau ʻi ha faʻahinga ngāue ke liliu ʻa e puleʻangá. ʻOku mau tui ʻoku ʻomai ʻe he Tohi Tapú ʻa e ngaahi ʻuhinga mālohi ki he muimui ki he ʻalunga ko ení.

•   ʻOku mau muimui ʻi he faʻifaʻitakiʻanga ʻa Sīsuú, ʻa ia naʻá ne fakafisi ke tali ha lakanga ʻi he puleʻangá. (Sione 6:​15) Naʻá ne akoʻi ʻene kau ākongá ke ‘ʻikai ko ha konga ʻo e māmaní’ pea fakamahinoʻi ʻoku totonu ke ʻoua te nau kau ki ha faʻahi ʻi he ngaahi ʻīsiu fakapolitikalé.​—Sione 17:14, 16; 18:36; Maʻake 12:13-​17.

•   ʻOku mau mateaki ki he Puleʻanga ʻo e ʻOtuá, ʻa ia naʻe lea ʻa Sīsū ʻo fekauʻaki mo ia ʻi heʻene pehē: “Ko e ongoongo lelei ko ʻeni ʻo e Puleʻangá ʻe malangaʻi ia ʻi he kotoa ʻo e māmani kuo nofoʻí.” (Mātiu 24:14) ʻI he tuʻunga ko e kau fakafofonga ʻo e Puleʻanga ʻo e ʻOtuá, ko e fekau ke talaki ʻene hoko maí, ʻoku mau hanganaki tuʻu-ʻatā ʻi he ngaahi meʻa fakapolitikale ʻo e ngaahi puleʻangá kotoa, kau ai ʻa e puleʻanga ʻoku mau nofo aí.​—2 Kolinitō 5:​20; ʻEfesō 6:​20.

•   ʻI he hanganaki tuʻu-ʻataá, ʻoku malava ai ke mau lea tauʻatāina ki he kakai ʻo e ngaahi tui fakapolitikale kotoa pē fekauʻaki mo e ongoongo lelei ʻo e Puleʻanga ʻo e ʻOtuá. ʻOku mau feinga ke fakahaaʻi ʻi heʻemau ngaahi leá mo e tōʻongá ʻoku mau falala ki he Puleʻanga ʻo e ʻOtuá ke ne fakaleleiʻi ʻa e ngaahi palopalema ʻi he māmaní.​—Saame 56:11.

•   Koeʻuhi ko ʻemau fakaʻehiʻehi mei he ngaahi māvahevahe fakapolitikalé, ʻoku mau fāʻūtaha ko ha fetokouaʻaki fakavahaʻapuleʻanga. (Kolose 3:​14; 1 Pita 2:​17) ʻI hono kehé, ko e ngaahi lotu ʻoku nau kaunoa ʻi he politikalé ʻoku māvahevahe honau kau mēmipá.​—1 Kolinitō 1:​10.

 Fakaʻapaʻapa ki he ngaahi puleʻangá. Neongo ʻoku ʻikai ke mau kau ki ha tafaʻaki fakapolitikale, ʻoku mau fakaʻapaʻapa ki he mafai ʻo e ngaahi puleʻanga ʻoku mau nofo aí. ʻOku fehoanaki eni mo e fekau ʻa e Tohi Tapú: “Ke fakamoʻulaloa ʻa e tokotaha kotoa pē ki he ngaahi mafai māʻolungá.” (Loma 13:1) ʻOku mau talangofua ki he laó, totongi ʻa e tukuhaú, pea fengāueʻaki mo e ngaahi feinga ʻa e puleʻangá ke tokonaki maʻá e lelei ʻo hono kau tangataʻifonuá. ʻI he ʻikai ke kau ʻi ha feinga pē ke toʻo ʻa e puleʻangá, ʻoku mau muimui ki he akonaki ʻa e Tohi Tapú ke lotu maʻá e “ngaahi tuʻí pea mo e kotoa ʻo e faʻahinga ʻoku nau ʻi he mafaí,” tautautefito ʻi he taimi ʻoku nau fai ai ʻa e ngaahi fili ʻe lava ke uesia ai ʻa e tauʻatāina ʻo e lotú.​—1 Tīmote 2:​1, 2, fakamatala ʻi lalo.

 ʻOku mau toe fakaʻapaʻapaʻi ʻa e totonu ʻa e niʻihi kehé ke fai ʻenau ngaahi fili ʻi he ngaahi meʻa fakapolitikalé. Ko e fakatātaá, ʻoku ʻikai ke mau fakahohaʻasi ʻa e ngaahi filí pe kaunoa ʻi he faʻahinga ʻoku nau ʻalu ʻo kau ʻi he filí.

 Ko ʻemau tuʻu-ʻatā ko ha founga foʻou ʻi onopooni? ʻIkai. Ko e kau ʻapositoló mo e kau Kalisitiane kehe ʻi he ʻuluaki senitulí naʻa nau tuʻu maʻu ʻi he fehangahangai mo e kau maʻu mafai fakapuleʻangá. ʻOku pehē ʻi he tohi ko e Beyond Good Intentions: “Neongo naʻa nau tui ʻoku fakafatongiaʻaki kinautolu ke fakaʻapaʻapaʻi ʻa e ngaahi mafai pulé, ko e muʻaki kau Kalisitiané naʻe ʻikai ke nau tui ki he kau ʻi he ngaahi meʻa fakapolitikalé.” ʻI he tuʻunga meimei tatau, ʻoku pehē ʻe he tohi ko e On the Road to Civilization ko e muʻaki kau Kalisitiané “naʻe ʻikai te nau maʻu lakanga fakapolitikale.”

 Ko ʻemau tuʻu-ʻatā fakapolitikalé ko ha fakamanamana ia ki he malu ʻa e fonuá? ʻIkai. Ko e kau tangataʻifonua fakamelino kimautolu ʻa ia ʻoku ʻikai ha meʻa ia ki he kau maʻu mafai fakapuleʻangá ke nau manavahē ki ai. Fakakaukau ki ha līpooti naʻe faʻu ʻi he 2001 ʻe he Akoʻanga Saienisi Fakafonua ʻa ʻIukalainé. ʻI he fakamatala ki heʻemau tuʻu-ʻatā fakapolitikalé, naʻe pehē ʻi he līpōtí: “ʻI he ʻahó ni ʻe ʻikai saiʻia nai ʻa e niʻihi ʻi he tuʻu-ʻatā ʻa e Kau Fakamoʻoni ʻa Sihová; ko ha ʻuhinga tefito ia ki hono tukuakiʻi kinautolu ʻe he kau maʻu mafai Nasí mo e puleʻanga Kominiusi ʻo e kuohilí.” Neongo ia, naʻa mo e ʻi he malumalu ʻo e anga-fakamamahi ʻa e Sovietí, ko e Kau Fakamoʻoní “ko e kau tangataʻifonua tauhi lao maʻu pē kinautolu. ʻOku nau ngāue faitotonu mo ʻikai siokita ʻi he ngaahi faama pea ʻi he ngaahi ngāueʻangá pea ʻikai fai ha fakamanamana ki he puleʻanga Kominiusí.” ʻOku pehē pē ʻi he ʻahó ni, naʻe fakaʻosiʻaki ʻe he līpōtí, ko e ngaahi tui mo e ngaahi tōʻonga ʻa e Kau Fakamoʻoni ʻa Sihová, ʻoku ʻikai ke ne “fakavaivaiʻi ʻa e malu mo e fāʻūtaha ʻa ha puleʻanga pē.”