Sioloto atu ki he talanoa ko ení: ‘I he sio ‘a Sūlia ki he sio‘atá, ko e me‘a pē ‘okú ne sio ki aí ko e fu‘u sinó. “‘Oku ou fiema‘u ke u fakaholo,” ko ‘ene fakakaukaú ia—neongo hono tala ange ‘e he‘ene ongo mātu‘á mo e ngaahi kaume‘á ‘okú ne “pakau.”

Ki mui ai, na‘e fakakaukau ‘a Sūlia te ne feinga mālohi ke toe ki‘i holo ‘aki ha “kilo nai ‘e ua.” Ko e me‘a na‘e pau ke ne faí ko ‘ene ‘aukai ‘i ha ngaahi ‘aho si‘i pē . . .

Kapau na‘á ke ma‘u ‘a e ongo‘i tatau ‘o hangē ko Sūliá, ko e hā te ke faí?

‘Oku ‘ikai ke hala ia ke ke hoha‘a fekau‘aki mo e anga ho fōtunga hā maí. Ko e mo‘oni, ‘oku fakaongoongolelei‘i ‘e he Tohi Tapú ‘a e fōtunga hā mai ‘o e kau fefine mo e kau tangata ‘e ni‘ihi, ‘o kau ai ‘a Sela, Lesieli, ‘Apikale, Siosifa mo Tēvita. ‘Oku pehē ‘i he Tohi Tapú na‘e ‘i ai ha fefine ko hono hingoá ko ‘Apisaki na‘e “hoihoifua ‘aupito.”—1 Tu‘i 1:4.

Kae kehe, ‘oku tokolahi ‘a e to‘utupu ia ‘oku nau tokanga tōtu‘a ki he anga honau fōtungá. ‘Oku lava ke iku atu ai ki he ngaahi palopalema lahi. Fakakaukau angé:

• ‘I he savea ‘e taha, na‘e pehē ai ko e pēseti ‘e 58 ‘o e fānau fefiné na‘a nau taukave‘i ‘oku nau fu‘u sino, ka ko hono mo‘oní, na‘e pēseti pē ‘e 17.

• ‘I he toe savea ‘e taha, ko e pēseti ‘e 45 ‘o e kakai fefine na‘e fu‘u pakaú na‘a nau fakakaukau kinautolu na‘a nau fu‘u mamafa!

• ‘I he‘enau feinga mālohi ke fakaholó, kuo iku ‘o ma‘u ai ‘e he to‘utupu ‘e ni‘ihi ‘a e mahaki ko e ‘anolekisiá—ko ha founga kai ia ‘oku ‘ikai lelei, he ‘oku fakatu‘utāmaki ki he mo‘uí ‘o iku ke mole ai ‘a e u‘a fie kaí.

 Kapau kuó ke ma‘u ha ngaahi faka‘ilonga ‘o e ‘anolekisiá pe ‘oku mole ho u‘a fie kaí, kumi tokoni. Feinga ke talanoa ki he ongo mātu‘á pe ko ha tokotaha lahi alafalala‘anga. ‘Oku pehē ‘e he Tohi Tapú: “Ko e kaume‘a ‘oku ne ‘ofa ‘i he taimi kotoa pe; pea ko hoto mo‘oni na‘e fanau‘i ma‘a ha faingata‘a.”—Palōveepi 17:17.

Ko e mo‘oni, ko e tangata ‘i lotó ‘okú ne ‘ai ha taha ke faka‘ofo‘ofa pe ‘ikai ke faka‘ofo‘ofa. Fakakaukau ki he foha ‘o Tu‘i Tēvita ko ‘Apisalomé. ‘Oku pehē ‘e he Tohi Tapú:

‘Pea na‘e ‘ikai ha tangata ‘e tatau mo hono fu‘u matamatalelei: Na‘e ‘ikai hano ‘ila.’—2 Sāmiuela 14:25.

Neongo ia, ko e ki‘i talavou ko ení na‘e fu‘u pōlepole, hīkisia mo kākā! Kae kehe, ‘oku ‘ikai ke ‘omai ‘i he Tohi Tapú ia ha fakatātā lelei ‘o ‘Apisalome; ‘oku fakamatala‘i ia ko ha tangata na‘e ta‘emateaki ta‘emīngao mo tāufehi‘a ‘i he loto-fakapō.

‘Oku ‘uhinga lelei leva hono ‘omai ‘e he Tohi Tapú ‘a e fale‘i ko ení:

“Kofu‘aki kimoutolu ‘a e anga‘itangata fo‘oú.”—Kolose 3:10.

“‘Oua ‘e tuku ke hoko ho‘omou teuteú ‘o fai ia ‘i tu‘a pē . . . , kae tuku ke mou teu‘i ‘a e tangata fufū ‘o e lotó.”—1 Pita 3:3, 4.

Neongo ‘oku ‘ikai ke hala ho‘o loto ke ke hā matamata leleí, ‘oku ‘i ai ha me‘a ‘oku toe mahu‘inga mama‘o ange ia ‘i ho fōtunga hā maí, ‘a ia ko ho anga‘itangatá. ‘I he lele lōloá, ko e ngaahi ‘ulungaanga ‘oku taau ke fakahīkihiki‘í te ne ‘ai ai koe ke ke faka‘ofo‘ofa ange ki he ni‘ihi kehé ‘i ha sino ‘oku pāpela pe fo‘i sino lelei! ‘Oku pehē ‘e ha ta‘ahine ko Felisita, “‘Oku lava ‘e he faka‘ofo‘ofá ke ne tohoaki vave mai ‘a e tokangá, ka ko ho tangata ‘i lotó mo ho ngaahi ‘ulungaanga leleí ‘a e me‘a ‘e manatu‘i lelei taha ai koe ‘e he kakaí.”

‘Okú ke fa‘a loto-mamahi ‘i he anga ho fōtungá?

Na‘e ‘i ai nai ha taimi na‘á ke fakakaukau ai ke ke tafa fakasanisani pe fakaholo lahi ke fakalelei‘i ha mele fakaesino?

Ko e hā te ke liliu ‘i ho fōtunga hā maí kapau te ke malava? (Fili ‘a e me‘a te ke faí.)

• MĀ‘OLUNGA

• MAMAFA

• LOU‘ULU

• FUO ‘O E SINO

• MATA

• LANU ‘O E KILI

Kapau ‘okú ke tali ‘io ki he ‘uluaki ongo fehu‘í pea fili ‘a e tafa‘aki ‘e tolu pe lahi ange ‘i he fehu‘i hono tolú, fakakaukau ki heni: Ngalingali ko e vakai atu ‘a e ni‘ihi kehé kiate koé ‘oku ‘ikai tatau ia mo e anga ho‘o fakakaukau hala kiate koé. ‘Oku faingofua ke ke fu‘u hoha‘a tōtu‘a fekau‘aki mo ho fōtunga hā maí.—1 Sāmiuela 16:7.