ʻI Mē 19, 2022, naʻe maʻu ʻe he Kōsilio Maluʻi ʻa e Puleʻanga Fakatahatahá ha līpooti mei ha kau ʻōfisa māʻolunga ʻe 75 ko e “nounou fakameʻatokoni ʻi māmani lahí, ʻoku lolotonga uesia ʻe he mahaki fakaʻauha COVID-19 mo e feliuliuaki ʻa e ʻeá, ʻe aʻu ki ha tuʻunga ʻo e honge fakamāmanilahi koeʻuhi ko e tau ʻi ʻIukalainé.” ʻI ha taimi nounou pē mei ai, naʻe talaki ʻe he The Economist koeʻuhi “ko e taú ʻokú ne ʻai ʻa e māmani ngāvaivai ko ení ke iku atu ki he fiekaia lahi.” Naʻe tomuʻa tala ʻe he Tohi Tapú ko e ngaahi nounou fakameʻatokoni peheé ʻe hoko ʻi hotau taimí, ka ʻokú ne toe tokonaki mai ʻa e tokoni ke tau fekuki ai mo ia.

•    Naʻe kikiteʻi ʻe Sīsū: “ʻE tuʻu ʻa e fonua ki he fonua mo e puleʻanga ki he puleʻanga, pea ʻe ʻi ai ʻa e ngaahi nounou fakameʻatokoni.”​—Mātiu 24:7.

•    Ko e tohi Tohi Tapu ʻa Fakahaá ʻoku fakamatala ai ki ha kau tangata heka hoosi fakaefakatātā ʻe toko fā. Ko e taha ʻi he kau tangata heka hoosi ko iá ʻokú ne fakafofongaʻi ʻa e taú. ʻOku muimui atu ʻiate ia ha tangata ʻe taha ʻokú ne fakafofongaʻi ʻa e hongé, ko ha taimi ʻa ia ʻe faingataʻa ke maʻu ha meʻakai feʻunga pea ʻe totongi mamafa. “Naʻá ku mamata, pea vakai, tā ko ha hoosi ʻuliʻuli, pea ko e tokotaha naʻe heka aí naʻá ne toʻo ha meʻafua fua mamafa ʻi hono nimá. Pea naʻá ku fanongo ki he meʻa naʻe ongo mai ʻo hangē ha leʻo . . . ʻOku pehē: ʻKo ha kuata uite ki ha tēnali ʻe taha, pea ko e kuata paʻale ʻe tolu ki ha tēnali ʻe taha.’”​—Fakahā 6:5, 6.

 Ko e ngaahi kikite Fakatohitapu ko eni fekauʻaki mo e nounou fakameʻatokoní ʻoku lolotonga fakahoko ia ʻi he taimí ni ʻi he taimi ʻoku ui ʻe he Tohi Tapú ko e “ngaahi ʻaho fakaʻosí.” (2 Tīmote 3:1) Ke ako lahi ange fekauʻaki mo e “ngaahi ʻaho fakaʻosí” pea mo e kau tangata heka hoosi ʻe toko fā ʻi he Fakahaá, sio ʻi he vitiō Kuo Liliu ʻa e Māmaní Talu mei he 1914 pea lau ʻa e kupu “Kau Tangata Heka Hoosi ʻe Toko Faá​—Ko Hai Kinautolu?”

•    ʻI he Tohi Tapú ʻoku maʻu ai ha faleʻi ʻaonga ʻe lava ke ne tokoniʻi kitautolu ke fekuki mo e ngaahi tuʻunga faingataʻá, ʻo kau ai ʻa e hikihiki ʻa e totongi ʻo e meʻakaí pe naʻa mo e nounou fakameʻatokoní. Sio ki ha ngaahi fakatātā ʻe niʻihi ʻi he kupu “Founga ke Moʻui Ai ʻi ha Meʻa Siʻi.”

•    ʻI he Tohi Tapú ʻoku toe ʻomai ai ʻa e ʻamanaki kiate kitautolu ʻe toe lelei ange ʻa e ngaahi meʻá. ʻOku talaʻofa mai ai ha taimi ʻa ia “ʻe lahi fau ʻa e uité ʻi he māmaní” pea ʻe maʻu ʻe he taha kotoa ʻa e meʻakai hulu fau ke kai. (Saame 72:16) Ke ako lahi ange fekauʻaki mo e ʻamanaki ʻi he Tohi Tapú ki he kahaʻú pea mo e ʻuhinga ʻe lava ke ke falala ai ki aí, lau ʻa e kupu “Ko ha ʻAmanaki Moʻoni ki ha Kahaʻu Lelei Ange.”