‘I he ‘ahó ni ‘oku tufaki ‘a e ngaahi fakamatalá ki he kakai ‘e laui miliona ‘i ha founga vave fakafou ‘i ha tohi, letiō, televīsone pea mo e ‘Initanetí. Ko e fa‘ahinga ‘oku lotu ki he “‘Otua ‘o e mo‘oní” ‘oku ‘ikai ke nau loto ke fakamafola ha fakamatala loi na‘a mo e fai ia ‘i he ta‘e‘ilo. (Saame 31:5; ‘Eki. 23:1) Ko e ngaahi fakamatala loi ‘oku fe‘ave‘aki ki he ni‘ihi kehé ‘e lava ke ne fakatupu ha maumau lahi. ‘I he feinga ke ‘ilo‘i pe ‘oku mo‘oni ha me‘a, ‘eke hifo kiate koe:

• ‘‘Oku alafalala‘anga ‘a e ma‘u‘anga fakamatalá?’ Ko e tokotaha ‘okú ne fai ‘a e talanoá ‘oku ‘ikai nai ke ne ma‘u ‘a e ngaahi mo‘oni‘i me‘á kotoa. Ko e talanoa ‘oku fakahoko mei ha tokotaha ki he ni‘ihi kehé ‘e hoko ‘o kehe ia. Ko ia ai tokanga he ‘oku ‘ikai ke ke ‘ilo‘i ‘a e kamata‘anga ‘o e talanoá. Ko e ma‘u‘anga ‘o e fakamatala alafalala‘angá ko e fa‘ahinga ko ia ‘oku nau ma‘u ‘a e ngaahi fatongia ‘i he fakataha‘angá. ‘Oku totonu ke nau tokanga ‘i he‘enau fakahoko atu ‘a e ngaahi fakamatala ‘oku ‘ikai ke fakapapau‘i ‘oku mo‘oni

• ‘‘Oku laukovi loi ‘a e fakamatalá?’ Kapau ‘oku tuku hifo ‘a e ongoongo ‘o ha tokotaha pe kautaha ko iá ko e lelei tahá ke ‘oua ‘e toe talanoa‘i ia.​—Pal. 18:8; Fil. 4:8

• ‘‘E lava ke tau tui ki he fakamatalá?’ Tokanga ‘i he fanongo ki he ngaahi talanoa mo e ngaahi hokosia ‘oku fu‘u tōtu‘a ‘o faingata‘a ke tui ki ai

SIO ‘I HE VITIŌ ‘E LAVA FĒFĒ KE U TA‘OFI ‘A E LAÚ? PEA TALI LEVA ‘A E NGAAHI FEHU‘I KO ENÍ:

• Fakatatau ki he Palōveepi 12:18, ko e hā ‘a e maumau ‘oku lava ke fakatupunga ‘i he ngaahi leá?

• ‘Oku anga-fēfē hono tokoni‘i kitautolu ‘e he Filipai 2:4 ke filifili lelei ‘a e me‘a te tau lea‘aki fekau‘aki mo e ni‘ihi kehé?

• Ko e hā ‘oku totonu ke tau faí ‘i he taimi ‘oku lea kovi ha taha fekau‘aki mo e ni‘ihi kehé?

• Ki mu‘a ke tau kamata ke talanoa fekau‘aki mo ha taha, ko e hā ‘a e ngaahi fehu‘i ‘oku totonu ke tau ‘eke hifó?