NA‘E mali ‘a Daniel mo Miriam ‘i Sepitema 2000 peá na ma‘u ha mo‘ui fiemālie ‘i Barcelona, Sipeini. ‘Oku fakamatala ‘a Daniel: “Na‘e faka‘atā kimaua ‘e he‘ema ngāué ke ma kai ‘i he ngaahi falekai totongi mamafá, folau ki muli, pea tui ‘a e ngaahi vala lelei ‘aupito. Na‘á ma toe kau ma‘u pē ki he ngāue fakamalangá.” Ka na‘e ‘i ai ha me‘a na‘e hoko.

‘I ha fakataha-lahi ‘i he 2006, na‘e fanongo ai ‘a Daniel ‘i ha malanga na‘e ‘eke ai ha fehu‘i: “‘Oku tau fai ‘a e me‘a kotoa te tau malavá ke tokoni‘i ‘a e fa‘ahinga ‘oku nau ‘‘alu tetetete atu ke tāmate‘í’ ke nau fononga ‘i he hala ki he mo‘ui ta‘engatá?” (Pal. 24:11) Na‘e fakamatala‘i ‘i he malangá ‘o pehē ‘oku tau ma‘u ‘a e fatongia ke malanga‘i ‘a e pōpoaki Fakatohitapú koe‘uhí ‘oku fakatu‘unga ai ‘a e mo‘ui ‘a e kakaí. (Ngā. 20:26, 27) ‘Oku manatu‘i ‘e Daniel, “Na‘á ku ongo‘i na‘e talanoa mai ‘a Sihova kiate au.” Na‘e toe lave ‘a e malangá ‘oku tau fiefia ange ‘i he taimi ‘oku tau fai ai ‘a e me‘a lahi ange ‘i he ngāue ‘a Sihová. Na‘e ‘ilo‘i ‘e Daniel ko e mo‘oni eni koe‘uhí na‘e malava ke ne sio kia Miriam, ‘a ia na‘á ne ‘osi kamata tāimu‘á, na‘á ne fiefia ‘aupito.

Na‘e mātu‘aki maongo kia Daniel ‘a e malanga ko ení ‘o ne fakakaukau ai kuo taimi ke fai ha liliu lahi ‘i he‘ene mo‘uí. Na‘á ne kamata ngāue ‘i he ngaahi houa si‘isi‘i ange, kamata tāimu‘a pea fakakaukau ki he fiefia ‘e lava ke ne ma‘u mo Miriam kapau te na ngāue ‘i he feitu‘u ‘oku lahi ange ai ‘a e fiema‘u ‘o e kau malanga ‘o e Pule‘angá.

‘I Mē 2007, na‘e tukuange ai ‘e Daniel mo Miriam ‘ena ngāué peá na hiki ki Panamā, ko ha fonua na‘á na ‘a‘ahi ki ai ki mu‘a. Ko hona feitu‘u ngāué na‘e kau ai ‘a e ‘otu motu Bocas del Toro Archipelago ‘i he Tahi Kalipiané. Ko e tokolahi taha ‘o e kakai ‘oku nofo aí ko e kau Ngabe. Na‘e fakakaukau ‘a Daniel mo Miriam te na malava ke nofo ‘i Panamā ‘i he māhina nai ‘e valu ‘aki ‘a e pa‘anga na‘á na ‘osi tātānakí.

Na‘á na fononga holo ‘i he ‘otu motú ‘i ha vaka mo e pasikala. ‘Okú na kei manatu‘i ‘ena ‘uluaki ‘aka pasikala ‘i he ngaahi tahake mā‘olungá ‘i he kilomita nai ‘e 30 (maile ‘e 20) ‘i he vela ‘aupito ‘a e ‘eá. Na‘e hela‘ia ‘aupito ‘a Daniel ‘o meimei pongia. Neongo ia, ko e ngaahi fāmili Ngabe na‘a nau fetaulakí na‘a nau anga-talitali kakai ‘aupito, tautautefito ‘i he hili hono ako ‘e he ongo me‘á ha ngaahi kupu‘i lea ‘i he lea ‘a e feitu‘ú. ‘Ikai fuoloa na‘á na ma‘u ‘a e ako Tohi Tapu ‘e 23.

Ko e hā na‘e hokó ‘i he ‘osi ‘ena pa‘angá? ‘Oku pehē ‘e Daniel: “‘I he‘ema lo‘imata‘iá, na‘e kamata ke ma fakakaukau ke ma foki ki Sipeiní. Na‘á ma loto-mamahi ‘aupito ke tukuange ‘ema kau ako Tohi Tapú.” Ka ‘i he māhina leva ‘e taha ki mui ai, na‘á na ma‘u ha ongoongo fakafiefia. ‘Oku pehē ‘e Miriam: “Na‘e fakaafe‘i kimaua ke ma hoko ko ha ongo tāimu‘a makehe. He fiefia ē ke ma lava ‘o nofo ‘i he‘ema vāhenga-ngāué!”

Koe‘uhi ko e ngaahi liliu ‘i he kautahá, na‘e ‘ikai ai ke toe tāimu‘a makehe ‘a Daniel mo Miriam ‘i he 2015. Ko e hā leva te na faí? Na‘á na falala ki he tala‘ofa ‘i he Saame 37:5: “Tuku atu ho halá kia Sihova; falala kiate ia, pea te ne fai ha me‘a ma‘au.” Na‘á na ma‘u ‘a e ngāue koe‘uhí ke na malava ‘o poupou‘i kinaua ‘i he‘ena tāimu‘a tu‘uma‘ú, pea ‘i he ‘ahó ni ‘okú na ngāue ‘i ha fakataha‘anga ‘i Veraguas, Panamā.

‘Oku pehē ‘e Daniel: “Ki mu‘a ke ma mavahe mei Sipeiní, na‘e ‘ikai ke ma fakapapau‘i pe te ma lava ‘o mo‘ui faingofua. ‘I he ‘ahó ni ‘okú ma lava ia, pea ‘oku ‘ikai te ma masiva ‘i ha me‘a.” Ko e hā ‘ena fiefia lahi tahá? ‘Okú na pehē: “Ke tokoni‘i ‘a e kakai anga-fakatōkilaló ke nau ako fekau‘aki mo Sihová, ko e fiefia ia ‘oku ta‘ealafakatataua!”