‘Oku Sai Pē ke Kākā ke Ma‘u ha Maaka Lelei?

KO HA tokotaha ako koe? Kapau ko ia, mahalo ‘okú ke ‘ilo‘i ha kaungāako ‘a ia ‘oku kākā he kalasí ke ma‘u ha maaka lelei. Ko e mo‘oni, ko e palopalemá ‘oku fu‘u mafolalahia. ‘I he savea ‘i he 2008 na‘e fai ‘e he Josephson Institute ko e meimei toko 30,000 ‘o e tamaiki ako he ngaahi ‘api ako ‘i ‘Ameliká, mo e pēseti ‘e 64 na‘a nau pehē na‘a nau kākā ‘i he sivi ‘o e ta‘u ko iá. Neongo ia, ko e fika ­mo‘oní na‘e fakafuofua ‘e he ni‘ihi kehe na‘e mā‘olunga ange ia—laka hake he pēseti ‘e 75.

‘I ‘Iulope foki kuo hoko ‘a e kākaá ko ha palopalema lahi, tautefito ki hono fai ‘o e hiki tataú. “Ko e ngaahi uepisaití ‘oku lava ke fakatau mei ai ‘a e ngaahi ‘ēsei ‘a e fānau akó, ngaahi fakamatala ki he mata‘itohi M.A. mo e ngaahi fakamatala ki he ako toketā fakalahí ke hoko ia ko ho‘o me‘a,” ko e lau ia ‘a e kupu na‘e pulusi ‘i he Digithum.

Ko e hā kuo hoko ai ‘a e kākaá ko ha hoha‘a lahí? ‘Oku hoko mo‘oni ‘a e kākaá ‘o ma‘u ‘aonga mei ai ‘a e fa‘ahinga ‘oku nau fai iá? Ko e fai­totonú—neongo kapau ‘oku ‘uhinga iá ‘e ‘ikai lelei ‘a e māká—‘oku kei hoko pē ia ko e founga lelei tahá?

Ko e Hā ‘Oku Mafolalahia Aí?

Hōloa ‘a e ngaahi ‘ēfika. “ ‘Oku pehē ‘e he kau ako tokolahi ko e fakautuutu ko eni ‘o e kākaá ko e tupu ia mei he hōloa ‘a e ngaahi ‘ēfika ‘i he tu‘unga siokita ‘a e kakaí,” ko e lau ia ‘a e Amer­ican School Board Journal. Fakatatau ki he fa‘ahinga ‘i he ngaahi kalasi makehe ‘i he kolisí, na‘e pehē ‘e ha tokotaha ako: “Ko kimautolu kotoa . . . na‘a mau kākā; na‘a mau fiema‘u ‘a e māká ke mau hū ‘aki ki he ngaahi ‘apiako leleí. Ko e tamaiki ako lelei, mo ‘ulungaanga lelei kimautolu, na‘e ‘ikai ke mau hangē ko e kau ta‘efaitotonú . . . ‘Oku mau fiema‘u pē ke mau hū ki he ngaahi ‘univēsiti leleí.” Na‘a mo e ngaahi mātu‘a ‘e ni‘ihi kuo “ma‘u” ‘e he founga fakakaukau ko iá. ‘I he vivili ke sio ki he‘enau fānaú ‘oku “lavame‘á” ‘oku nau tali pē ‘a e kākaá pe sio kehe mei ai, ‘o fakavaivai‘i lahi ange ai ‘a e ‘ēfika ‘o ‘enau fānaú.

 Ko e tenge ke lavame‘á. Fakatatau kia Donald McCabe, ‘a ia na‘a ne fokotu‘u ‘a e Senitā Fakavaha‘apule‘anga ki he Anga-Tonu Faka‘akatēmiká, ko e tamaiki ako ‘oku kākaá ‘oku nau tui ko e fai­totonú ‘okú ne ‘ai kinautolu ki ha tu‘unga ‘ikai lelei ‘i hono fakahoa atu ki he ni‘ihi kehe ‘oku nau kākā pea nau hao peé.

Ko e tokoni ‘a e tekinolosiá. Ko e tekinolosia ‘i onopōní ‘okú ne fakamafeia ‘a e tamaiki akó ke kākā ‘i ha lēvolo faingofua ange mo fakaemāmani lahi ange. ‘Oku lava ke hiki ‘a e pepa siví mo e ngaahi talí ki he‘enau homueka mei he ‘Initanetí pea vahevahe ia mo e ni‘ihi kehé. ‘Oku fa‘a ma‘u ‘a e tokosi‘i pē pea ‘oku fakalotolahi‘i heni ‘a e ni‘ihi kehé.

Ko e tākiekina ‘o e ngaahi fa‘ifa‘itaki‘anga koví. Kuo hoko ‘a e kākaá ‘o anga-maheni‘aki ‘i he māmani ‘o e kakai lalahí—‘i he ngaahi kautaha pisinisi lalahí, ‘i he politikí, ‘i he ngaahi sipotí pea na‘a mo ‘api, ‘a ia ‘oku kākā ai ‘a e ngaahi mātu‘á ‘i he fakamatala tukuhau pa‘anga hū maí pe ngaahi ‘eke malu‘í. “Kapau ‘oku kākā ‘a e kakai ‘i he ngaahi tu‘unga mafaí pe fa‘ifa‘itaki‘angá,” ko e lau ia ‘a David Callahan, ko e fa‘utohi ‘o e The Cheating Cul­ture, “pea ‘oku ou fakakaukau leva ‘okú ne ‘oatu ‘a e faka‘ilonga ki he to‘utupú ko e kākaá ‘oku sai pē ia.” Ka ‘oku pehē? Ko e tuli ki he maaka lelei angé ‘okú ne fakatonuhia‘i mo‘oni ‘a e kākaá?

Ko e Hā ke Fili ai ke ‘Oua ‘e Kākaá?

‘Eke hifo eni kiate koe, ‘Ko e hā ‘a e taumu‘a ‘o ha ako lelei?’ ‘Ikai ko e ‘ai ke teuteu‘i ai ‘a e tamaiki akó ki he ngaahi fatongia lahi ‘i he mo‘uí, hangē ko hano ‘analaiso ‘a e ngaahi palopalema he ngāue‘angá pea fakalelei‘i kinautolu? Ko e tamaiki ako ‘oku nau hoko ‘o anga‘aki ‘a e kākaá ‘e ‘ikai nai ke nau ako ‘a e ngaahi pōto‘i mohu ‘uhinga ko iá. Ko ia ai, ko e kakai kuo nau anga‘aki ‘a e kākaá kuo nau fakapuliki honau ngaahi vaivai‘angá pea fakavaivai‘i ai honau ngaahi faingamālie ke lavame‘a ‘i he ngaahi tafa‘aki lahi ‘i he mo‘uí.

Ko e taha, “ ‘oku fili ‘e he kakaí ‘a e founga faingofua taha ke hola ai mei he palopalemá—hangē  ko e toutou kākā he akó—te nau ‘ave nai ia ki he ngāue‘angá,” ko e lau ia ‘a Callahan. ‘I ha founga, ko e fa‘ahinga ko iá ‘oku nau hangē ha koloa loi-ko ha hingoa ‘o ha kautaha vala fakaeonopooni pe vesa uasi ‘a ia ‘oku hā ngali mo‘oni ka ‘e iku fakalotomamahi.

Ko ia ai, ‘oku ‘i he tu‘unga fakatu‘utāmaki foki ‘a e kau kākaá ‘i hano ma‘u pea faingata‘a‘ia ‘i hono ngaahi nunu‘á. ‘I he tu‘unga si‘isi‘i tahá, ‘e kau ai ‘a e fakamaá mo e maá. Ka ‘oku toe iku nai ia ke tuli mei he akó pe na‘a mo hono tautea lahi ange. ‘Oku fakatokanga hangatonu mai ‘i he Tohi Tapú: “Ko e hā pē ha me‘a ‘oku tō ‘e ha taha, ko e me‘a ia te ne utú foki.” (Kalētia 6:7) Kae kehe, ko e manavahē ki hano ma‘u iá ‘oku ‘ikai totonu ko e ‘uhinga tefito ia ki he faitotonú. ‘Oku ‘i ai ‘a e ngaahi ‘uhinga ‘oku toe lelei ‘aupito ange.

Ko e Faitotonú—Ko e Kī Mo‘oni Ia ki he Lavame‘á

Ko e to‘utupu potó ‘oku nau feinga ke fakatupulekina ‘a e ngaahi ‘ulungaanga te ne ‘ai ke nau lelei ai ‘i he kaha‘ú, ‘o ‘ikai ko e ngaahi siví pē ka ki he toenga ‘enau mo‘uí. Ko ia ai, ‘oku nau ngāue mālohi ‘i he akó mo feinga ke fakatupulekina ‘a e ngaahi ‘ulungaanga te ne faka‘ai‘ai ‘a e toka‘i-kitá, ‘a ia ‘e ma‘u ai ‘a e hounga‘ia ‘a e kau pule ngāue ‘i he kaha‘ú, pea ‘e iku atu ai ki he fiefia tu‘uloa.

‘Oku lava ke ma‘u ‘a e ngaahi ‘ulungaanga ko iá ‘i he Tohi Tapú, pea ko e to‘utupu ko ia ‘oku nau mo‘ui fakatatau ki aí ‘oku ‘ikai te nau ta‘ema‘u ha ‘aonga mei ai. ‘I hono kehé, hangē ko ia ‘oku pehē ‘i he 2 Tīmote 3:16, 17 ‘oku nau hoko ‘o “ma‘u ‘a e malava kakato, kuo teu‘i kakato ki he ngāue lelei kotoa pē.” Ko ha toko taha foomu tolu nai ko Jorge na‘á ne pehē: “Na‘e kākā hoku ngaahi kaungākalasí koe‘uhi na‘a nau fiema‘u ha ngaahi maaka lelei ‘o ta‘e‘iai ha‘anau feinga ‘e taha. Ka na‘á ku loto ke fakahōifua‘i ‘a e ‘Otuá. ‘I he Palōveepi 14:2, ‘oku pehē ‘i he Tohi Tapú ‘⁠ko ia ‘oku fou ‘i hono totonu o‘ona ko e taha ia ‘oku ‘apasia kia Sihova: Ka ko ia ‘oku afe mei hono ‘alunga, ‘oku ne ta‘etoka‘i ‘a ‘Ene ‘Afio.’ ‘Oku ou ‘ilo‘i ‘e ‘ikai lava ke tau fūfuu‘i ha me‘a mei he ‘Otuá. Ko ia ai, ‘oku ‘ikai ke u kākā pea ‘oku ‘ikai ke u tokoni‘i ‘a e ni‘ihi kehé ke nau kākā.”

Ko e tamaiki ako ko ia ‘oku nau feinga ke mo‘ui ‘o fehoanaki mo e ngaahi tefito‘i mo‘oni ‘a e Tohi Tapú ko e kau ‘atamai lelei taha nai kinautolu pe ‘ikai ‘i he kalasí. Ka ko kinautolu ‘oku nau poto tahá, he ‘oku nau langa ‘i ha makatu‘unga fefeka ki he lavame‘a tu‘uloa ‘i he mo‘uí. (Saame 1:1-3; Mātiu 7:24, 25) Tānaki atu ki aí, ‘oku lava ke nau fakapapau‘i ‘a e hōifua mo e poupou ‘a e Tokotaha-Fakatupú.

[Puha/Fakatātā ‘i he peesi 13]

NGAAHI TEFITO‘I MO‘ONI KE FAKAKAUKAU KI AI

● “Ko e tu‘u ‘a e ngutu lea mo‘oni ‘e ta‘engata: Ka ko e ‘elelo loi ‘e ‘oua pe ke u kemo.”—Palōveepi 12:19.

● “Ko e tangata tonunga ‘e fai tapuekina.”—Palōveepi 28:20.

● “He ‘omi ‘e Elohimi ‘a e ngaue kotoa ki he fakamaau, kae‘uma‘a ‘a e me‘a kotoa ‘oku fufū, pe ‘oku lelei ia pe kovi.”—Koheleti 12:14.

● “Ko ‘emau faka‘amú ia ke mau faitotonu ‘i he ngaahi me‘a kotoa pē.”—Hepelū 13:18.

[Fakatātā ‘i he peesi 14, 15]

Ko e tekinolosia ‘i onopōní ‘okú ne fakamafeia ‘a e tamaiki akó ke kākā ‘i ha lēvolo fo‘ou faingofua ange mo fakaemāmani lahi ange

 [Fakatātā ‘i he peesi 15]

Ko e tamaiki ako kākaá ‘oku nau hangē ha vesa uasi loi ‘oku nau hā ngali lelei pē