“KO E kotoa ʻo e ngaahi tau ʻi he kuohilí . . . naʻe hā ngali taʻemahuʻinga ia ʻi hono fakahoa atu ki he fāinga lahi naʻe lolotonga hoko ʻi ʻIulopé.” Ko hono fakamatalaʻi ia ʻe he Watch Tower ʻo Sepitema 1, 1915 ʻa e ʻuluaki tau ʻa māmaní, ʻa ia naʻe faai atu ʻo kāpui ʻa e fonua nai ʻe 30. Koeʻuhi ko e ngaahi fakafilí, naʻe pehē ai ʻi he Watch Tower: “Ko e ngāue ʻo e [Puleʻangá] kuo fakafaingataʻaʻiaʻi lahi ia, tautefito ʻi Siamane mo Falanisē.”

ʻI he fehangahangai mo ha fakafepaki lahi fekauʻaki mo e māvahevahe ʻi māmani lahí, naʻe ʻikai ke mahinoʻi kakato ai ʻe he Kau Ako Tohi Tapú ʻa e tefitoʻi moʻoni ʻo e tuʻu-ʻatā faka-Kalisitiané. Kae kehe, naʻa nau fakapapauʻi ke talaki ʻa e ongoongo leleí. ʻI he loto ʻa Wilhelm Hildebrandt ke fai ʻene tafaʻakí ʻi he ngāue ʻo e Puleʻangá, naʻá ne ʻota ai ʻa e ngaahi tatau ʻo e The Bible Students Monthly ʻi he lea faka-Falaniseé. Naʻe ʻikai ke ne ʻi Falaniseé ko ha kolopota (tokotaha malanga taimi-kakato) ka ʻi hono kehé, ko ha sōtia Siamane. Ko e tokotaha teunga sōtia ko eni naʻe tonu ke hoko ko e filí, naʻá ne ʻoatu ha pōpoaki ʻo e melino ki he kau Falanisē ofoofo naʻa nau lue haké.

Naʻe pulusi ʻa e ngaahi tohi ʻi he Watch Tower ʻo fakahaaʻi ai, naʻe ongoʻi ai ʻe he tokolahi ʻo e Kau Ako Tohi Tapu Siamane ʻe niʻihi naʻe ueʻi kinautolu ke nau vahevahe atu ʻa e ongoongo lelei ʻo e Puleʻangá lolotonga ʻenau sōtiá. Ko Tokoua Lemke, ʻa ia naʻe hoko ko ha sōtia tau tahi, naʻá ne līpooti naʻá ne maʻu ha kau mahuʻingaʻia ʻe toko nima ʻi hono kaungāsōtiá. “Naʻa mo ʻeku heka ʻi he vaka ko ení, ʻoku ou utu ʻa e fua ʻi hono fakahīkihikiʻi ʻa Sihová,” ko ʻene tohí ia.

Ko Georg Kayser naʻá ne ʻalu ʻi he malaʻe taú ko ha sōtia pea foki ki ʻapí ko ha sevāniti ʻa e ʻOtua moʻoní. Ko e hā naʻe hokó? Naʻá ne maʻu nai ha tohi ʻa e Kau Ako Tohi Tapú, tali loto-totonu ʻa e moʻoni ʻo e Puleʻangá, pea tuku ʻene kau ʻi he taú. Naʻá ne fakahoko leva ʻa e ngāue taʻefakakautau. Hili ʻa e taú, naʻá ne hoko ko ha tāimuʻa faivelenga ʻi ha taʻu lahi.

Neongo naʻe ke mahinoʻi kakato ʻe he Kau Ako Tohi Tapú ʻa e ʻīsiu ki he tuʻu-ʻataá, naʻe kehe ʻaupito ʻenau fakakaukaú mo e tōʻongá mei he anga ʻo e vakai mo e ngaahi tōʻonga ʻa e kakai naʻa nau saiʻia ʻi he taú. ʻI hono poupouʻi ʻe he kau politikí mo e kau taki lotú ʻa e feinga fakakautaú, naʻe poupouʻi ʻe he Kau Ako Tohi Tapú ʻa e “ʻEiki ʻo e Melino.” (ʻAi. 9:6 [9:5, PM])  Kae kehe, naʻe ʻikai ke hanganaki tuʻu-ʻatā ʻaupito ʻa e niʻihi, naʻa nau kei poupouʻi ʻa e fakakaukau tefito naʻe fakahaaʻi ʻe he Tokotaha Ako Tohi Tapu ko Konrad Mörtter, “Naʻá ku ʻiloʻi lelei mei he Folofola ʻa e ʻOtuá ʻoku ʻikai totonu ki ha Kalisitiane ke tāmate.”​—ʻEki. 20:13. *

Naʻe ʻikai faʻu ʻa e lao ʻi Siamané ke fakaʻatā ai ʻa e fili fakakonisēnisí, naʻe fakafisi ʻa e Kau Ako Tohi Tapu laka hake he toko 20 ke ʻi ai haʻanau kaunga ki he meʻa fakakautaú. Ko e niʻihi ʻo kinautolu naʻe fakakalasi ia ʻi he kau puke fakaʻatamaí, hangē ko Gustav Kujath, ʻa ia naʻe tuku ʻi ha fale ʻatamai vaivai pea huhu fakamohe. Naʻe toe fakafisi ʻa Hans Hölterhoff ke kau ʻi he taú, naʻe tuku pilīsone ʻi heʻene fakataleʻi ʻa e ngāue kotoa fekauʻaki mo e taú. Naʻe haʻi ia ʻe he kau selá ʻaki hono fakatui ai ʻa e sāketi maʻu kae ʻoua kuo ongonoa hono nimá mo e vaʻé. ʻI he ʻikai ke nau lavameʻa ʻi hono taʻofi ʻene fakapapaú, naʻe fakangalingali ʻa e kau selá te nau tāmateʻi ia. Kae kehe, naʻe hanganaki tuʻumaʻu pē ʻa Hans ʻi he lolotonga ʻa e taú.

Naʻe fakafisi ʻa e fanga tokoua ʻe niʻihi ke toʻo meʻatau pea kole ha ngaahi fatongia taʻefakakautau. * Naʻe tuʻu maʻu ʻa Johannes Rauthe, pea naʻe ʻave ke ngāue ʻi he halanga lēlué. Naʻe vaheʻi ʻa Konrad Mörtter ke ne tokangaʻi ʻa e faitoʻó, pea ko Reinhold Weber ke ngāue ko ha neesi. Naʻe houngaʻia ʻa August Krafzig koeʻuhí ko ʻene ngāué naʻe ʻikai ke kau ia ʻi he ʻalu he malaʻe taú. Ko e Kau Ako Tohi Tapu ko ení mo e niʻihi kehe hangē ko kinautolú naʻa nau fakapapauʻi ke ngāue kia Sihova ʻo makatuʻunga ʻi heʻenau mahinoʻi ʻa e ʻofá mo e mateakí.

Koeʻuhi ko ʻenau tōʻonga he lolotonga ʻo e taú, naʻe siofi fakalelei ʻa e Kau Ako Tohi Tapú ʻe he kau ʻōfisá. Lolotonga ʻa e ngaahi taʻu hoko maí, naʻe fehangahangai ʻa e Kau Ako Tohi Tapu ʻi Siamané mo e keisi fakaefakamaau ʻe laui afe koeʻuhi ko ʻenau ngāue fakamalangá. Ke tokoniʻi kinautolú, naʻe fokotuʻu ʻe he ʻōfisi vaʻa ʻi Siamané ha potungāue fakalao ʻi he Pēteli ʻi Magdeburg.

ʻOku hokohoko atu hono fakaleleiʻi ʻe he Kau Fakamoʻoni ʻa Sihová ʻenau mahino fekauʻaki mo e ʻīsiu ki he tuʻu-ʻatā faka-Kalisitiané. ʻI he taimi naʻe hoko ai ʻa e tau ua ʻa māmaní, naʻa nau hanganaki tuʻu-ʻatā ʻaki ʻenau mavahe fakaʻaufuli mei he sōtiá. Ko ia ai, naʻe fai ʻa e vakai kia kinautolu ko e ngaahi fili ʻo e Puleʻanga Siamané pea naʻe fakatangaʻi lahi kinautolu. Ka ko ha tafaʻaki kehe ʻaupito ia ki ha konga ʻi he kahaʻú fekauʻaki mo e kupu hokohoko “Mei Hotau Kuohilí.”​—Mei hotau kuohilí ʻi ʻIulope Lotoloto.