1, 2. ‘Oku anga-fēfē ‘a e nima-homo ‘a Sihova kiate kitautolú?

KO Sihová ko ha ‘Otua nima-homo ia. Ko e me‘a kotoa pē ‘oku tau ma‘ú ko e ha‘u meiate ia. ‘Oku ‘a‘ana ‘a e me‘a mahu‘inga kotoa pē ‘i he māmaní, pea ‘okú ne ngāue‘aki ia ke tokoni ki he mo‘uí. (Saame 104:13-15; Hāk. 2:8) ‘Oku tau ‘ilo mei he Tohi Tapú ‘a e anga hono ngāue‘aki fakaemana ‘e Sihova ‘i he taimi ‘e ni‘ihi ‘a e ngaahi me‘a mahu‘inga ko ení ke tokonaki ma‘a hono kakaí.

² Ko e fakatātaá, na‘e tokonaki ‘e Sihova ‘a e mana mo e vai ki he pule‘anga ‘Isilelí ‘i he‘enau nofo ‘i he ta‘u ‘e 40 ‘i he toafá. (‘Eki. 16:35) Ko hono olá, na‘a nau ma‘u ‘a e me‘a kotoa pē na‘a nau fiema‘ú. (Nehe. 9:20, 21) Ki mui ai, na‘e ‘oange ‘e Sihova ki he palōfita ko ‘Ilaisá ‘a e mālohi ke ne fakalahi ‘a e ki‘i me‘i lolo ‘a ha uitou faitōnunga. Na‘e tokoni‘i ia ‘e he me‘a‘ofa ko eni mei he ‘Otuá ke ne totongi ‘osi ‘a hono ngaahi mo‘uá peá ne kei ma‘u pē ‘a e pa‘anga fe‘unga ma‘ana mo ‘ene ongo tamá ke hokohoko atu ai ‘enau mo‘uí. (2 Tu‘i 4:1-7) Pea ‘i he tokoni ‘a Sihová, na‘e tokonaki fakaemana ai ‘e Sīsū ‘a e me‘akai pea na‘a mo e pa‘anga ‘i he taimi na‘e fiema‘u aí.​—Māt. 15:35-38; 17:27.

3. Ko e hā te tau lāulea ki ai ‘i he kupu ko ení?

 ³ ‘Oku lava ke ngāue‘aki ‘e Sihova ha me‘a pē ‘okú ne fili koe‘uhi ke tokoni‘i ‘aki ‘a ‘ene me‘a fakatupú. Neongo ia, ‘okú ne fakaafe‘i ‘a ‘ene kau sevānití ke nau foaki ‘a e me‘a ‘oku nau malavá ke tokoni ki he ngāue ‘a ‘ene kautahá. (‘Eki. 36:3-7; lau ‘a e Palōveepi 3:9.) Ko e hā ‘oku ‘amanekina mai ai ‘e Sihova ke tau ngāue‘aki ‘etau ngaahi me‘a mahu‘ingá ke toe foaki ange kiate iá? Na‘e anga-fēfē ‘a e tokoni ‘a e kau sevāniti ‘a Sihova ‘i he taimi ‘o e Tohi Tapú ki he‘ene ngāué? ‘Oku anga-fēfē hono ngāue‘aki ‘e he kautahá ‘a e pa‘anga ‘oku me‘a‘ofa ‘aki ‘i he ‘aho ní? ‘E tali ‘i he kupu ko ení ‘a e ngaahi fehu‘i ko ení.

4. Ko e hā ‘oku tau fakahaa‘i kia Sihova ‘i he‘etau tokoni ki he‘ene ngāué?

⁴ ‘Oku tau foaki kia Sihová koe‘uhí ‘oku tau ‘ofa mo hounga‘ia ‘iate ia. ‘I he‘etau fakakaukau atu ki he me‘a kotoa kuo fai ‘e Sihova ma‘atautolú, ‘oku maongo lahi ia ki hotau lotó. Na‘e ongo‘i pehē ‘a Tu‘i Tēvita ‘i he‘ene fakamatala‘i ‘a e me‘a na‘e fiema‘u ke langa‘aki ‘a e temipalé. Na‘e pehē ‘e Tēvita ko e me‘a kotoa pē ‘oku tau ma‘ú ko e ha‘u meia Sihova pea ko e hā pē ha me‘a ‘oku tau foaki kia Sihova ko e ha‘u mei he me‘a kuó ne ‘osi foaki mai kiate kitautolu.​—Lau ‘a e 1 Kalonikali 29:11-14.

5. ‘Oku anga-fēfē hono ako‘i mai ‘e he Tohi Tapú ko e foaki ta‘esiokitá ko ha konga mahu‘inga ia ‘o e lotu mo‘oní?

⁵ ‘Oku tau toe foaki kia Sihová he ko ha founga eni ‘o e lotu kiate iá. Na‘e fanongo ‘a e ‘apositolo ko Sioné ‘i ha vīsone ki he lea ‘a e kau sevāniti ‘a Sihova ‘i hēvaní: “‘Oku taau mo koe ‘e Sihova ko homau ‘Otua, ke ke ma‘u ‘a e ngeiá mo e lāngilangí pea mo e mālohí, koe‘uhí na‘á ke fakatupu ‘a e ngaahi me‘a kotoa pē, pea koe‘uhi ko ho finangaló na‘a nau hoko ai ‘o ‘i ai pea na‘e fakatupu ai kinautolu.” (Fkh. 4:11) Ko e mo‘oni, ‘oku tuha ‘a Sihova mo e kotoa ‘o e ngeiá mo e lāngilangí, ko ia ‘oku tau loto ai ke foaki ‘etau lelei tahá kiate ia. Fakafou ‘ia Mōsese, na‘e fekau‘i ‘e Sihova ki he pule‘anga ‘Isilelí ke nau fai ha kātoanga ‘e tolu ‘i he ta‘u. Ko e konga ‘o ‘enau lotú ‘i he ngaahi kātoanga ko ení na‘e kau ki ai ‘a e foaki kia Sihova. Na‘e tala ki he kakaí ke ‘oua na‘a nau “hā mola pē ‘i he ‘ao ‘o Sihová.” (Teu. 16:16) ‘I he ‘ahó ni foki, ko ha konga mahu‘inga ‘o ‘etau lotú ko e foaki ta‘esiokita. ‘I he foungá ni, ‘oku tau fakahaa‘i ai ‘oku tau fakamahu‘inga‘i mo tokoni‘i ‘a e ngāue ‘a e kautaha ‘a Sihová.

6. Ko e hā ‘oku lelei ai kiate kitautolu ‘a hono fai ha foakí? (Sio ki he ‘uluaki fakatātā ‘i he kupú ni.)

⁶ ‘Oku lelei ke tau foaki nima-homo ‘o ‘ikai ko e ma‘u mai pē. (Lau ‘a e Palōveepi 29:21.) Sioloto atu ki ha ki‘i tama ‘okú ne ma‘u ha ki‘i tokoni fakapa‘anga mei he‘ene ongo mātu‘á peá ne ngāue‘aki hano konga ke fakatau mai ‘aki ha me‘a‘ofa ki he‘ene ongo mātu‘á. ‘Oku ‘ai ‘e he‘ene me‘a‘ofá ke ongo‘i fēfē ‘a e ongo mātu‘á? Pe sioloto atu ki ha tāimu‘a kei si‘i ‘oku nofo mo ‘ene ongo mātu‘á peá ne foaki kiate kinaua ha pa‘anga ke tokoni ki he totongi ‘o e nofo‘angá pe ke fakatau mai ‘aki ha me‘akai ma‘á e fāmilí. ‘Oku ‘ikai nai ‘amanekina ‘e he‘ene ongo mātu‘á ke ne fai pehē, ka ‘okú na tali ‘ene me‘a‘ofá. Ko e hā hono ‘uhingá? Koe‘uhí ko ha founga ia ‘o ‘ene fakahāhā ‘a e hounga‘ia ‘i he me‘a kotoa pē ‘okú na fai ma‘aná. ‘I ha founga meimei tatau, ‘oku ‘afio‘i ‘e Sihova ‘oku lelei kiate kitautolu ‘a hono fai ha foaki mei he‘etau ngaahi me‘a mahu‘ingá.

7, 8. Na‘e anga-fēfē hono fokotu‘u ‘e he kakai ‘a Sihová ‘i he taimi ‘o e Tohi Tapú ha fa‘ifa‘itaki‘anga ‘i he‘enau foaki me‘a‘ofa (a) ki he ngaahi ngāue paú? (e) ke tokoni ki he‘ene ngāué?

⁷ ‘I he Tohi Tapú, ‘oku tau ‘ilo‘i ai na‘e foaki ‘e he kakai ‘a Sihová ha ngaahi me‘a‘ofa ke tokoni ki he‘ene ngāué. ‘I he taimi ‘e ni‘ihi na‘a nau fai ha foaki ki ha ngaahi ngāue pau. Ko e fakatātaá, na‘e faka‘ai‘ai ‘e Mōsese ‘a e kau ‘Isilelí ke nau foaki ha me‘a‘ofa ki hono langa ‘o e tāpanekalé. Ki mui ai,  na‘e fai ‘e Tu‘i Tēvita ‘a e me‘a tatau ki hono langa ‘o e temipalé. (‘Eki. 35:5; 1 Kal. 29:5-9) Lolotonga ‘a e pule ‘a Tu‘i Sihoasí, na‘e monomono ‘e he kau taula‘eikí ‘a e temipalé ‘o ngāue‘aki ‘a e pa‘anga na‘e foaki ‘e he kakaí. (2 Tu‘i 12:4, 5) ‘I he ‘uluaki senitulí, na‘e ‘ilo‘i ‘e he kau Kalisitiané na‘e ‘i ai ha honge ‘i Siutea pea na‘e fiema‘u ‘e he fanga tokouá ha tokoni. Ko ia na‘e fakapapau‘i ai ‘e he Kalisitiane taki taha ‘a e me‘a na‘e lava ke ne ma‘ú pea ‘ave ki he fanga tokoua ‘i aí.​—Ngā. 11:27-30.

⁸ Na‘e toe foaki ‘e he kakai ‘a Sihová ‘a e tokoni fakapa‘anga ki he fa‘ahinga na‘e takimu‘a ‘i he‘ene ngāué. Ko e fakatātaá, ‘i he malumalu ‘o e Lao ‘a Mōsesé, na‘e ‘ikai ke ma‘u ai ‘e he kau Līvaí ha tofi‘a ‘o hangē ko ia na‘e ma‘u ‘e he ngaahi matakali kehé. Ko ia na‘e foaki ai ‘e he toenga ‘o e kau ‘Isilelí ha vahe hongofulu ‘o e me‘a na‘a nau ma‘ú ki he kau Līvaí. Na‘e faka‘atā ‘i he me‘á ni ‘a e kau Līvaí ke nau tokangataha ki he‘enau ngāue ‘i he tāpanekalé. (Nōm. 18:21) ‘I ha founga meimei tatau, na‘e ngāue‘aki ‘e he kau fefine nima-homó ‘a e me‘a na‘a nau ma‘ú ke tokoni kia Sīsū mo ‘ene kau ‘apositoló.​—Luke 8:1-3.

9. Na‘e ha‘u mei fē ‘a e ngaahi me‘a‘ofa ‘i he kuohilí?

⁹ Ko e ngaahi me‘a‘ofa ko iá na‘e ha‘u mei he ngaahi matavai kehekehe. Ko e kau ‘Isileli na‘a nau foaki me‘a‘ofa ki hono langa ‘o e tāpanekalé na‘a nau foaki nai ‘a e ngaahi me‘a mahu‘inga na‘a nau fakatau mai mei ‘Isipite. (‘Eki. 3:21, 22; 35:22-24) ‘I he ‘uluaki senitulí, na‘e fakatau atu ai ‘e he kau Kalisitiane ‘e ni‘ihi ‘a e ngaahi me‘a na‘a nau ma‘ú, hangē ko e ngaahi ngoue pe fale, pea ‘omi ‘a e pa‘angá ki he kau ‘apositoló. Na‘e ngāue‘aki leva ‘e he kau ‘apositoló ‘a e pa‘anga ko iá ki he fanga tokoua mo e fanga tuofāfine na‘a nau fiema‘u tokoní. (Ngā. 4:34, 35) Na‘e vahe‘i ma‘u pē ‘e he kau Kalisitiane kehé ha pa‘anga koe‘uhi ke nau lava ‘o foaki ke tokoni ki he ngāué. (1 Kol. 16:2) Ko ia mei he koloa‘ia tahá ki he masiva tahá, na‘e lava ke fai ‘e he tokotaha kotoa ha foaki.​—Luke 21:1-4.

10, 11. (a) ‘E lava fēfē ke tau fa‘ifa‘itaki ki he kau sevāniti nima-homo ‘a Sihova na‘a nau mo‘ui ‘i he taimi ‘o e Tohi Tapú? (e) ‘Oku fēfē ho‘o ongo‘i fekau‘aki mo e tokoni ki he ngāue ‘o e Pule‘angá?

¹⁰ ‘I he ‘ahó ni, ‘e kole mai nai ke tau foaki ha me‘a‘ofa ki ha taumu‘a makehe. Mahalo pē ‘oku palani ho‘o fakataha‘angá ke fakalelei‘i homou Fale Fakataha‘angá pe ke langa ha Fale Fakataha‘anga fo‘ou. Pe mahalo pē ‘oku fiema‘u ke fakalelei‘i ‘a e ‘ōfisi va‘a ‘i ho feitu‘ú. Te tau toe malava nai ke tokoni ki he ngaahi fakamole ‘i he‘etau fakataha-lahí. Pe mahalo pē kuo faingata‘a‘ia ‘a hotau fanga tokoua ‘i ha feitu‘u ‘e taha ‘i ha fakatamaki fakanatula pea nau fiema‘u ‘etau tokoní. Ko ‘etau ngaahi me‘a‘ofá ‘oku toe tokoni ki he kau misinalé, kau tāimu‘a makehé, kau ‘ovasia sēketí, mo e fa‘ahinga ‘oku ngāue ‘i he ‘ulu‘i ‘apitanga ‘i he māmaní pea ‘i he ngaahi ‘ōfisi va‘a takatakai ‘i he māmaní. ‘Oku toe ‘oatu ma‘u pē ‘e ho‘o fakataha‘angá ‘a e ngaahi me‘a‘ofa ke tokoni ki hono langa ‘o e ngaahi Holo ‘Asemipilī mo e Fale Fakataha‘anga ma‘a hotau fanga tokoua ‘i he ngaahi tafa‘aki kehe ‘o e māmaní.

¹¹ Ko kitautolu kotoa ‘oku lava ke tau foaki ha me‘a ke tokoni ki he ngāue ‘oku fai ‘e he kautaha ‘a Sihová lolotonga ‘a e ngaahi ‘aho faka‘osi ko ení. Ko e lahi taha ‘o e ngaahi me‘a‘ofá ‘oku ‘ikai ke fakahaa‘i ‘a kinautolu ‘oku nau fai ‘a e foakí. ‘I he‘etau fa‘o ‘a e pa‘anga ‘i he ngaahi puha me‘a‘ofa ‘i he Fale Fakataha‘angá pe fai ha tokoni ‘i he ‘initanetí fakafou ‘i he jw.org, ‘oku ‘ikai ke tau ‘ai ke ‘ilo‘i ‘e he ni‘ihi kehé ‘a e lahi ‘o e me‘a ‘oku tau foakí. Kae fēfē kapau ‘okú ke ongo‘i ‘oku fu‘u si‘isi‘i ho‘o me‘a‘ofá ‘o ‘ikai hano mahu‘inga? Ko hono mo‘oní ko e lahi taha ‘o e ngaahi me‘a‘ofa ‘oku ma‘u ‘e he kautahá ko e ha‘u mei he fanga ki‘i me‘a‘ofa iiki ‘oku lahi kae ‘ikai ko e ngaahi fu‘u me‘a‘ofa lalahi pē ‘e ni‘ihi. Na‘a mo hotau fanga tokoua ‘oku si‘isi‘i ‘aupito ‘enau pa‘angá ‘oku nau fa‘ifa‘itaki ki he mu‘aki kau Kalisitiane ‘i Masitōniá. Na‘a nau “masiva ‘ango‘ango,” ka na‘a nau kōlenga ke faka‘atā ange ke nau fai ha foaki pea na‘a nau foaki nima-homo leva.​—2 Kol. 8:1-4.

12. ‘Oku anga-fēfē ‘a e feinga ‘a e kautahá ke ngāue‘aki ‘a e ngaahi me‘a‘ofá ‘i he founga lelei taha ‘oku ala lavá?

 ¹² ‘Oku anga-tonu mo poto ‘a e Kulupu Pulé ‘i he founga ‘o hono ngāue‘aki ‘o e ngaahi me‘a‘ofá. (Māt. 24:45) ‘Oku lotu ‘a hono kau mēmipá ke nau fai ha fili lelei, pea nau palani fakalelei ‘a e founga ki hono ngāue‘aki ‘o e pa‘angá. (Luke 14:28) ‘I he taimi ‘o e Tohi Tapú, ko e kau tangata anga-tonu na‘a nau tokanga‘i ‘a e ngaahi me‘a‘ofá na‘a nau fakapapau‘i na‘e ngāue‘aki pē ia ki he lotu kia Sihová. Ko e fakatātaá, na‘e foki ‘a ‘Ēsela ki Selusalema mo e ngaahi me‘a‘ofa mahu‘inga mei he tu‘i ‘o Pēsiá, na‘e kau ai ‘a e koula, siliva, mo e ngaahi koloa mahu‘inga kehe ‘a ia ko hono mahu‘inga he ‘aho ní ‘oku laka hake ia ‘i he $100 miliona ‘Amelika. Na‘e vakai ‘a ‘Ēsela ki he ngaahi me‘a‘ofa ko ení ko e ngaahi me‘a‘ofa kia Sihova. Ko ia na‘á ne fai ha ngaahi fakahinohino makehe ke malu‘i ia ‘i hono ‘ave ‘o fou atu ‘i he ngaahi fonua fakatu‘utāmakí. (‘Ēsela 8:24-34) ‘I he ngaahi ta‘u lahi ki mui ai, na‘e tānaki ‘e he ‘apositolo ko Paulá ‘a e pa‘anga ke tokoni ki he fanga tokoua masiva ‘i Siuteá. Na‘á ne fakapapau‘i ko e fa‘ahinga na‘a nau ‘ave ‘a e pa‘angá na‘a nau tokanga‘i ‘a e “me‘a kotoa pē ‘i he faitotonu, ‘o ‘ikai ngata pē ‘i he vakai mai ‘a Sihová, kae pehē foki ‘i he vakai mai ‘a e tangatá.” (Lau ‘a e 2 Kolinitō 8:18-21.) ‘I he ‘ahó ni, ‘oku fa‘ifa‘itaki ai ‘etau kautahá kia ‘Ēsela mo Paula pea ngāue‘aki fakalelei ‘aupito ‘a e ngaahi me‘a‘ofá.

13. Ko e hā kuo fai ai ki muí ni ‘e he kautahá ha ngaahi liliu ‘e ni‘ihi?

¹³ ‘E fai nai ‘e ha fāmili ha ngaahi liliu ‘i he founga ‘o ‘enau ngāue‘aki ‘enau pa‘angá ke ‘oua te nau fakamoleki ‘a e me‘a lahi ange ‘i he me‘a ‘oku nau ma‘ú. Pe te nau kumi nai ki ha ngaahi founga ke ‘ai ai ke faingofua ange ‘enau mo‘uí koe‘uhi ke nau lava ‘o fai ‘a e me‘a lahi ange ma‘a Sihova. ‘Oku hoko ‘a e me‘a tatau ‘i he kautaha ‘a Sihová. Ki muí ni mai, kuo ‘i ai ‘a e ngaahi ngāue lahi fo‘ou ‘oku fakafiefia, pea ‘i he taimi ‘e ni‘ihi, na‘e fakamoleki ai ‘a e pa‘anga lahi ange ‘i he me‘a na‘e ma‘u maí. Ko ia ai ko e kautahá, ‘i he hangē ko ha fāmilí, ‘oku kumi ki ha ngaahi founga ke fakahaofi ai ‘a e pa‘angá pea ‘ai ‘a e ngāué ke faingofua ange, ke lava ‘o ne fai ‘a e me‘a lelei lahi ‘oku ala lavá ‘aki ho‘omou ngaahi me‘a‘ofa nima-homó.

14-16. (a) Ko e hā ‘oku ngāue‘aki ki ai ho‘omou ngaahi me‘a‘ofá? (e) Kuo tokoni‘i fakafo‘ituitui fēfē koe ‘e he ngaahi ngāue ko ení?

¹⁴ Ko e tokolahi kuo nau ‘i he mo‘oní ‘i ha laui ta‘u ‘oku nau pehē ‘oku tau ma‘u he taimí ni ‘a e ngaahi me‘a‘ofa lahi ange mei he kautahá ‘i ha toe taimi ki mu‘a. ‘Oku tau ma‘u he taimí ni ‘a e jw.org mo e JW Broadcasting. ‘Oku ta‘u ma‘u ‘a e Liliu Tohi Tapu ‘o e Māmani Fo‘oú ‘o e Tohi Tapu Mā‘oni‘oní ‘i he ngaahi lea lahi ange. ‘I he 2014/2015, na‘e fai ai ‘a e Ngaahi Fakataha-Lahi Fakavaha‘apule‘anga “Hanganaki Fuofua Kumi ki he Pule‘anga ‘o e ‘Otuá!” ‘aho ‘e tolu ‘i he ni‘ihi  ‘o e ngaahi sitētiume lalahi taha ‘i he kolo lalahi ‘e 14 takatakai ‘i he māmaní. Na‘e fiefia ‘a e tokotaha kotoa na‘e kau ki aí!

¹⁵ Kuo fakahāhā ‘e he tokolahi ‘a ‘enau hounga‘ia ‘i he ngaahi me‘a‘ofa ko eni mei he kautaha ‘a Sihová. Ko e fakatātaá, na‘e tohi ‘e ha ongo me‘a ‘okú na ngāue ‘i ‘Ēsia: “Ko homa vāhenga-ngāué ‘oku ‘i ha ki‘i kolo si‘isi‘i. Ko hono olá, ‘okú ma ongo‘i tuēnoa ‘i he taimi ‘e ni‘ihi, pea faingofua ai ke ngalo ‘iate kimaua ‘a e lahi ‘o e ngāue ‘a Sihová. Ka ‘i he‘ema sio pē ‘i he ngaahi polokalama kehekehe ‘i he JW Broadcasting, ‘okú ma manatu‘i ai ko e konga kimaua ‘o ha fetokoua‘aki fakavaha‘apule‘anga. Ko si‘oma fanga tokoua mo e fanga tuofāfine ‘i he feitu‘ú ‘oku nau fiefia ‘aupito ‘i he JW Broadcasting. ‘Okú ma fa‘a fanongo ki he‘enau pehē ‘i he hili ‘enau sio ‘i he ngaahi polokalama fakamāhiná, ‘oku nau ongo‘i ofi ange ai ki he ngaahi mēmipa ‘o e Kulupu Pulé. ‘Oku nau laukau ange ‘i he taimí ni ‘i ha toe taimi ki mu‘a ‘i he hoko ko e konga ‘o e kautaha ‘a e ‘Otuá.”

¹⁶ ‘Oku lolotonga langa pe fakalelei‘i takatakai ‘i he māmaní ‘a e meimei Fale Fakataha‘anga ‘e 2,500. Na‘e pehē ‘e he ngaahi mēmipa ‘o e fakataha‘anga ‘e taha ‘i Honitulasi na‘a nau fa‘a misi ki hano ma‘u hanau Fale Fakataha‘anga, ka kuo hoko ‘o mo‘oni ‘a e misi ko iá he taimí ni. Na‘a nau tohi: “‘Oku mau ongo‘i fiefia mo‘oni ‘i he hoko ko e konga ‘o e fāmili fakae‘univeesi ‘o Sihová pea fiefia ‘i he‘etau fetokoua‘aki fisifisimu‘a ‘i māmani lahí.” ‘Oku fakahāhā ‘e he tokolahi ‘a e ngaahi ongo‘i meimei tatau ‘i he‘enau ma‘u ‘a e Tohi Tapú mo e ‘ū tohi kehe ‘i he‘enau leá, ‘i he tokoni‘i kinautolu ‘e he fanga tokouá mo e fanga tuofāfiné hili ha fakatamaki fakanatulá, pe ‘i he‘enau sio ki he ngaahi ola lelei ‘o e faifakamo‘oni ‘i he ngaahi feitu‘u pisinisí mo e feitu‘u kakai ‘i honau feitu‘u ngāué.

17. ‘Oku tau ‘ilo fēfē ‘oku tokoni‘i ‘e Sihova ‘ene kautahá ‘i he ‘ahó ni?

¹⁷ Ko e tokolahi ‘oku ‘ikai ko e Kau Fakamo‘oni ‘a Sihová he‘ikai lava ke nau mahino‘i ‘a e founga ‘oku tau fai kotoa ai ‘a e ngaahi me‘á ni ‘o ngāue‘aki pē ‘a e ngaahi me‘a‘ofa loto-fiefoakí. Na‘e ‘a‘ahi ha pule ‘o ha fu‘u kautaha lahi ki he taha ‘o hotau ngaahi fale pulusí. Na‘á ne ‘ohovale ‘i hono fai ‘a e ngāue kotoa pē ‘e he kau ngāue polé, ‘aki ‘a e ngaahi me‘a‘ofa loto-fiefoaki, ‘o ‘ikai ‘aupito fokotu‘utu‘u ke fai ha ngaahi tānaki pa‘anga. Na‘á ne pehē ko e me‘a ‘oku tau faí ‘oku ‘ikai totonu ke malava. ‘Oku tau loto-tatau mo ia! ‘Oku tau ‘ilo‘i ko e malava pē iá koe‘uhi ko hono tokoni‘i ‘e Sihova ‘a e ngāué.​—Siope 42:2.

18. (a) Ko e hā ‘a e ngaahi tāpuaki ‘oku tau ma‘u ‘i he‘etau fai ‘a e tokoni ki he Pule‘angá? (e) ‘E lava fēfē ke tau ako‘i ‘etau fānaú mo e fa‘ahinga fo‘oú ke nau fai ‘a e me‘a tatau?

¹⁸ ‘Oku ‘omai ‘e Sihova kiate kitautolu ‘a e lāngilangi mo e faingamālie ke tau tokoni ki he ngāue ma‘ongo‘onga ‘o e Pule‘angá. ‘Okú ne fakapapau‘i mai ko e taimi ‘oku tau fai ai iá, te ne tāpuaki‘i kitautolu. (Mal. 3:10) ‘Oku tala‘ofa ‘a Sihova kapau te tau foaki nima-homo, ‘e lelei ‘a e ngaahi me‘á kiate kitautolu. (Lau ‘a e Palōveepi 11:24, 25.) ‘Okú ne tala mai foki te tau fiefia ‘i he‘etau fai ‘a e foakí, he “‘oku ‘i ai ‘a e fiefia lahi ange ‘i he foaki atú ‘i he ma‘u maí.” (Ngā. 20:35) ‘I he me‘a ‘oku tau lea‘aki mo faí, ‘e lava ke tau ako‘i ai ‘etau fānaú mo e fa‘ahinga fo‘oú ki he founga te nau lava ai foki ke tokoni ki he ngāue ko ení pea fiefia ai ‘i he ngaahi tāpuaki lahi.

19. Kuo anga-fēfē hono fakalototo‘a‘i koe ‘e he kupu ko ení?

¹⁹ Ko e me‘a kotoa pē ‘oku tau ma‘ú ko e ha‘u meia Sihova. ‘I he‘etau fai ‘a e foaki kiate iá, ‘oku tau fakahaa‘i ai ‘oku tau ‘ofa kiate ia pea fakamahu‘inga‘i ‘a e me‘a kotoa kuó ne fai ma‘atautolú. (1 Kal. 29:17) ‘I he taimi na‘e foaki ai ‘a e kau ‘Isilelí ki hono langa ‘o e temipalé, na‘a nau ‘fiefia ‘i hono fai ‘a e ngaahi foaki loto-tau‘atāina ko ení, he na‘a nau fai ‘a e ngaahi foaki loto-tau‘atāina kia Sihová ‘aki ha loto kakato.’ (1 Kal. 29:9) Tau hokohoko atu foki ke ma‘u ‘a e fiefia mo e fiemālie ‘i he‘etau foaki kia Sihova mei he me‘a kuó ne ‘osi ‘omai kiate kitautolú.