1. 1. SĒTANE KO E TĒVOLÓ. Ko Sētane, ʻa e ʻāngelo angatuʻú, ʻokú ne teke mui ʻi he tāufehiʻa ʻoku tau vakai ki ai ʻi he ʻaho ní. ʻE fakaʻauha ʻe he ʻOtuá ʻa Sētane mo e faʻahinga kotoa ʻoku nau ʻi he malumalu ʻene tākiekina tāufehiʻá.​—Saame 37:38; Loma 16:20.

2. 2. MĀMANI FONU TĀUFEHIʻA ʻO SĒTANÉ. Ko e ʻOtuá te ne toʻo ʻosi atu ʻa e ngaahi ʻelemēniti kovi ʻo e māmani ko ení, kau ai ʻa e kau politiki kākaá mo e kau taki lotu ʻoku nau tafunaki ʻa e tāufehiʻá. ʻE toe toʻo atu ʻe he ʻOtuá ʻa e fokotuʻutuʻu fakakomēsiale mānumanú fakataha mo ʻenau founga fakameleʻi mo kākaá.​—2 Pita 3:13.

3. 3. TAʻEHAOHAOA ʻA E FAʻAHINGA ʻO E TANGATÁ. ʻOku fakamatalaʻi ʻi he Tohi Tapú ko e faʻahinga kotoa ʻo e tangatá kuo nau maʻu tukufakaholo ʻa e taʻehaohaoá, ʻa ia ko e hehema ke fakakaukau hala, maʻu ʻa e ngaahi ongoʻi fehālaaki pea fai ʻa e meʻa ʻoku halá. (Loma 5:12) Ko e taha ʻi he ngaahi hehema angahalaʻia ko iá ko hono tukulotoʻi ʻa e tāufehiʻá pea fakahaaʻi ki he niʻihi kehé. ʻE tokoniʻi ʻe he ʻOtuá ʻa e faʻahinga ʻo e tangatá ke ikunaʻi ʻa e ngaahi hehema taʻehaohaoa kotoa ko iá koeʻuhi ke toʻo ʻosi atu ai ʻa e ngaahi fakaʻilonga kotoa ʻo e tāufehiʻá.​—ʻAisea 54:13.

1. 1. HEʻIKAI HA TAHA TE NE HOKOSIA HA FAKAMAAU TAʻETOTONU. Ko e māmaní ʻe puleʻi ia ʻe he Puleʻanga ʻo e ʻOtuá, ko ha founga-pule fakamaau totonu mo tuʻuloa ʻi hēvani. (Taniela 2:44) Ko e tomuʻa fehiʻá mo e taʻefemahinoʻakí heʻikai ke toe ʻi ai. Ko e ʻOtuá te ne fakatonutonu ʻa e fakamaau taʻetotonu kotoa pē ʻoku fehangahangai mo e kakaí he ʻahó ni.​—Luke 18:7.

2. 2. HOKOSIA ʻE HE TAHA KOTOA ʻA E MELINO. Heʻikai ha taha ʻe faingataʻaʻia koeʻuhi ko e fakamālohí pe taú. (Saame 46:9) Ko e māmaní ʻe hoko ko ha feituʻu malu ʻe nofo pē ai ʻa e kakai ʻoku ʻofa ʻi he melinó.​—Saame 72:7.

3. 3. ʻE MOʻUI TAʻENGATA ʻA E TAHA KOTOA ʻI HA TUʻUNGA HAOHAOA. Ko e faʻahinga kotoa ʻe nofo ʻi he māmaní te nau fakahāhā ʻa e ʻofa loto-moʻoni ki he kaungāʻapí. (Mātiu 22:39) Heʻikai ha taha ʻe loto-mamahi, pe te ne maʻu ha ngaahi fakakaukau pe manatu tamaki. (ʻAisea 65:17) ʻI he taimi ko iá, ko e faʻahinga ʻo e tangatá ʻoku nau ʻatā mei he tāufehiʻá “te nau maʻu ʻa e fiefia lahi ʻi he melino hulu fau.”​—Saame 37:11.

ʻOkú ke fakaʻamua ke nofo ʻi ha māmani hangē ko iá? Naʻa mo e ʻi he taimí ni, ʻoku ʻi ai ʻa e kakai tokolahi ʻoku nau ako ke tuku ange ʻa e tāufehiʻá ʻaki hono ngāueʻaki ʻa e tefitoʻi moʻoni Fakatohitapú. (Saame 37:8) ʻOku moʻoni eni ʻi heʻene haʻu ki he laui miliona ʻo e Kau Fakamoʻoni ʻa Sihova takatakai ʻi he māmaní. Neongo ʻoku nau haʻu mei he ngaahi anga fakafonua mo e puipuituʻa kehekehe, ʻoku nau fāʻūtaha mo feʻofaʻaki ʻo hangē ha fāmilí.​—ʻAisea 2:2-4.

Ko e Kau Fakamoʻoni ʻa Sihová te nau fiefia ke vahevahe atu ʻa e meʻa kuo nau ako fekauʻaki mo e founga ke fekuki ai mo e fakamaau taʻetotonú mo e filifilimānakó. Ko e meʻa te ke akó ʻe malava ke ne ʻai koe ke ke fetongi māmālie ha faʻahinga fakaʻilonga ʻo e tāufehiʻá ʻaki ʻa e ʻofa. ʻE lava ke ke ʻiloʻi ʻa e founga ke fakafeangai anga-lelei ai ki he kakai kotoa pē​—naʻa mo e faʻahinga ʻoku hā ngali ʻoku nau taʻehoungaʻia pe fakahāhā ʻa e tāufehiʻá. Ko hono olá, te ke fiefia ange he taimí ni pea ko ho vahaʻangatae mo e niʻihi kehé ʻe ʻalu pē ke toe lelei ange. Hiliō he meʻa kotoa, te ke ako ai ki he meʻa ʻe lava ke ke fai ke moʻui ai ʻi he malumalu ʻo e Puleʻanga ʻo e ʻOtuá ʻi he taimi ʻe toʻo atu ai ʻo taʻengata ʻa e tāufehiʻá.​—Saame 37:29.