ʻOku Tokanga Mai ʻa e ʻOtuá Kiate Koe
KO E Tohi Tapú ʻa e matavai lelei taha ki he tataki fakalaumālie ʻoku ala maʻú. ʻOku ʻikai ko ha tohi fakahinohino ia ki he moʻui leleí, ka ʻoku lava ke ne tokoniʻi kitautolu ʻi he ngaahi founga ʻaonga ke fekuki ai mo e ngaahi tuʻunga fakamamahí, ngaahi sīpinga fakaefakakaukau fetōʻakí, ngaahi ongoʻi tamakí, pea mo e ngaahi palopalema fakaesino mo fakaʻatamai fakalotomamahí.
Ko e mahuʻinga tahá, ʻoku fakapapauʻi mai ʻe he Tohi Tapú ko hotau Tokotaha-Fakatupú, ʻa Sihova ko e ʻOtuá, a ʻokú ne mahinoʻi lelei ange ʻetau fakakaukaú mo e ongoʻí ʻi ha toe taha. ʻOkú ne vēkeveke ke tokoniʻi kitautolu ke fekuki mo ha ngaahi palopalema pē ʻoku tau fehangahangai mo ia. Ko e fakatātaá, fakakaukau ki ha veesi Tohi Tapu fakafiemālie ʻe ua:
“ʻOku ofi ʻa Sihova ki he loto-laveá; ʻokú ne fakahaofi ʻa e faʻahinga ʻoku laumālie mafesí.”—SAAME 34:18.
“Ko au Sihova ko ho ʻOtuá, ʻoku ou puke ho nima toʻomataʻú, ʻa e Tokotaha ʻoku lea atu kiate koe, ‘ʻOua ʻe ilifia. Te u tokoniʻi koe.’”—ʻAISEA 41:13.
Neongo ia, ʻoku anga-fēfē hono tokoniʻi kitautolu ʻe Sihova ke fekuki mo e ngaahi palopalema fakaʻatamaí? Hangē ko ia te ke vakai ki ai ʻi he ngaahi kupu hokó, ʻoku fakahaaʻi ʻe Sihova ʻokú ne tokanga moʻoni mai kiate kitautolu ʻi he ngaahi founga ʻaonga lahi.
a Ko Sihova ʻa e huafa fakafoʻituitui ʻo e ʻOtuá.—Saame 83:18.
