Kapau naʻá ke loto ke fononga ki ha feituʻu kuo teʻeki ke ke ʻalu ki ai ki muʻa, ko e hā te ke faí?

1. 1. ʻAlu ʻi he hala ʻokú ke fakakaukau ʻoku totonu ke ke ʻalu aí.

2. 2. Muimui ʻi he niʻihi kehé, ʻo fakaʻamu pē ʻoku nau ʻiloʻi ʻa e halá.

3. 3. Kumi ki ha tataki alafalalaʻanga, hangē ko ha GPS, mape, pe ko ha kaumeʻa falalaʻanga ʻokú ne ʻiloʻi ʻa e halá.

Kapau ʻoku tau fili ʻa e ʻuluakí pe uá, te tau aʻu ki ha feituʻu ka ʻoku ʻikai ko e feituʻu ia ʻoku tau loto ke ʻalu ki aí. Kae kehe, kapau ʻoku tau fili ʻa e tolú, ʻoku lava ke tau ʻamanaki papau te tau aʻu ki heʻetau taumuʻá.

Ko ʻetau moʻuí ʻoku hangē ia ha fonongá—ko ha fononga ʻoku tau ʻamanekina ʻe taki atu ki ha kahaʻu fakafiefia. Ko ʻetau aʻu ki aí ʻoku fakatuʻunga lahi ia ʻi he feituʻu ʻoku tau hanga ki ai ki ha tataki ʻi hono fai ʻa e ngaahi filí.

Neongo ko e lahi taha ʻo e ngaahi fili ʻoku tau faí heʻikai ke ʻi ai haʻane fuʻu kaunga taimi lōloa ki heʻetau moʻuí, ko e ngaahi fili ʻe niʻihi ʻoku mahuʻinga ange. ʻOku tapua atu ai hotau tuʻunga fakaeʻulungāngá—ʻetau vakai ki he tonú mo e halá. Ko e ngaahi fili peheé te ne tākiekina kitautolu mo e faʻahinga ʻoku tau ʻofa aí ʻi ha taimi lōloa, ki he lelei pe ki he kovi. Ko e ngaahi fili ko ení ʻoku kau ai ʻa e ngaahi meʻa hangē ko e:

• Fehokotaki fakasinó mo e nofo malí

• Faitotonú, ngāué mo e paʻangá

• Founga ke ʻohake ai ʻa e fānaú

• Founga ke fakafeangai ki he niʻihi kehé

ʻE lava fēfē ke ke fakapapauʻi ko hoʻo fili ʻi he ngaahi tafaʻaki ko ení ʻe taki atu ia ki ha kahaʻu fakafiefia kiate koe mo ho fāmilí?

Ko e fehuʻi eni kiate kitautolu taki taha: Ko e hā te ne tataki ʻa e ngaahi fili fakaeʻulungaanga ʻoku ou faí?

Ko e makasini ko ení ʻe fakamatalaʻi ai ʻa e ʻuhinga ʻoku hoko ai ʻa e Tohi Tapú ko ha tataki fakaeʻulungaanga alafalalaʻangá, mo e founga ʻe lava ke ne tokoniʻi ai koé.