Ko e kakai tokolahi ‘i he māmaní ‘oku nau fiema‘u vivili ha me‘akai mo ha nofo‘anga. Ko e ni‘ihi ‘oku nau fiema‘u pē ha ‘amanaki ki he kaha‘ú. ‘E lava fēfē ke tau ma‘u ‘a e hōifua mo e tāpuaki ‘a e ‘Otuá ‘i he‘etau tokoni‘i ‘a e fa‘ahinga peheé?

“Ko e tokotaha ‘okú ne fakahāhā ‘a e lelei‘ia ‘i he mā‘ulaló ‘okú ne ‘oatu ha nō kia Sihova, pea te Ne totongi fakafoki kiate ia ‘a e me‘a ‘okú ne faí.”​—PALŌVEEPI 19:17.

Na‘e fai ‘e Sīsū ha talanoa fakatātā fekau‘aki mo ha tangata na‘e ‘ohofi ‘e he kau kaiha‘á pea tuku ai ke mate. (Luke 10:29-37) Na‘e afe atu ha sola fie tokoni ‘o ne tokanga‘i ‘a e tangata na‘e lavea lahí. Na‘á ne fai eni neongo ‘ene ha‘u mei ha puipuitu‘a fakamatakali kehé.

Ko e tangata anga-lelei ko ení na‘e ‘ikai ngata pē ‘ene faito‘o ‘a e tangata na‘e laveá mo ‘oange ‘a e poupou fakamatelié ka na‘á ne toe fakafiemālie‘i ia pea ‘oange ‘a e fakanonga mei he mamahí.

Ko e hā ‘oku tau ako mei he talanoa fakatātā ko ení? Na‘e fakahaa‘i ‘e Sīsū ‘oku totonu ke tau tokoni ki he masivá ‘i ha fa‘ahinga founga pē. (Palōveepi 14:31) ‘Oku ako‘i ‘i he Folofolá ko e ‘Otuá ‘oku vavé ni ke ne fakangata ‘a e masivá mo e faingata‘á. Neongo ia, te tau fifili nai, ‘e anga-fēfē hono fakahoko eni ‘e he ‘Otuá pea ‘e fakahoko fakakū ia? ‘E lāulea ‘a e kupu hokó ki he ngaahi tāpuaki kuo tuku tauhi mai ma‘au ‘e ho Tokotaha-Fakatupu ‘ofá.