1, 2. (a) Ko e hā naʻe mole ai mei he kau ʻIsileli ʻe toko 24,000 honau pale fakaofó? (e) Ko e hā ʻoku mahuʻinga ai kia kitautolu ʻa e fakamatala ko ení?

 KI MUʻA siʻi pē ke hū ʻa e puleʻanga ʻIsilelí ki he Fonua ʻo e Talaʻofá, ko e kau tangata ʻe toko laui mano naʻa nau “feauaki moe gaahi ofefine o Moabe.” Ko hono olá, naʻe mate ʻa e kau ʻIsileli ʻe toko 24,000. Naʻa nau tatali fuoloa pea naʻe ofi ʻaupito ke nau maʻu honau tofiʻá! Ko e meʻa fakamamahí, naʻe mole honau pale fakaofó koeʻuhí naʻa nau tō ʻi he fakatauele ke fai ʻa e ʻulungaanga taʻetāú.—Nōm. 25:1-5, 9, PM.

² Ko e faʻifaʻitakiʻanga fakamamahi ko iá naʻe ‘tohi ko ha fakatokanga ia kiate kitautolu ʻa ē kuo aʻu mai ki ai ʻa e ngataʻanga ʻo e ngaahi fokotuʻutuʻu ko ení.’ (1 Kol. 10:6-11) ʻOku tau moʻui ʻi he ngataʻanga tonu ʻo e “ngaahi ʻaho fakaʻosí” pea ʻoku ofi ʻaupito ki he māmani foʻoú. (2 Tīm. 3:1; 2 Pita 3:13) Neongo ia, ko e meʻa fakamamahí, ko e niʻihi ʻo e kau lotu ʻa Sihová kuo nau fakangaloku honau ngaahi tuʻunga fakaeʻulungāngá pea nau tō ʻi he fakatauele ke fai ʻa e ʻulungaanga taʻetāú. ʻOku nau tofanga he taimí ni ʻi he ngaahi nunuʻa kovi ʻo ʻenau ngaahi tōʻongá, pea kapau heʻikai te nau fakatomala, ʻe aʻu ʻo malava ke mole honau faingamālie ke moʻui taʻengata he Palataisi ʻi he māmaní.

3. Ko e hā ʻoku fiemaʻu ai ʻe he ngaahi hoa malí ʻa e fakahinohino mo e maluʻi ʻa Sihová? (Sio ki he ʻuluaki fakatātā ʻi he kupú ni.)

 ³ ʻOku fiemaʻu ʻe he ngaahi husepānití mo e ngaahi uaifí ʻa e fakahinohino mo e maluʻi ʻa Sihová ke ʻai ke malu ʻenau nofo malí koeʻuhi ko e māmaní ʻoku maʻunimā ʻe he fehokotaki fakasinó. (Lau ʻa e Saame 127:1.) ʻI he kupu ko ení, te tau lāulea ki he founga ʻe lava ai ʻe ha ongo meʻa mali ke maluʻi ʻena nofo malí. ʻOku fiemaʻu ke na maluʻi hona lotó, ʻunuʻunu ofi ki he ʻOtuá, kofuʻaki ʻa e angaʻitangata foʻoú, fetuʻutaki lelei, pea feʻoangeʻaki ʻa ʻena totonu fakaemalí.

4. Ko e hā kuo fakataueleʻi ai ʻa e kau Kalisitiane ʻe niʻihi ke fai ʻa e ʻulungaanga taʻetāú?

⁴ ʻOku malava fēfē ki ha Kalisitiane ke hoko ʻo fakataueleʻi ke fai ʻa e ʻulungaanga taʻetāú? ʻOku faʻa kamata ia mei he sió. ʻOku fakamatala ʻa Sīsū: “Ko e tokotaha kotoa ʻoku hanganaki fakasio ki ha fefine ke tafunaki ki ai ʻene holí kuó ne ʻosi tonoʻi ia ʻi hono lotó.” (Māt. 5:27, 28; 2 Pita 2:14) Ko e tokolahi kuo nau fai ʻa e ʻulungaanga taʻetāú kuo nau fakangaloku honau ngaahi tuʻunga fakaeʻulungāngá ʻaki ʻa e sio ʻi he ʻata fakalieliá, lau ʻa e ʻū tohi fakalielia, pe mamata ʻi ha meʻa taʻetaau ʻi he ʻInitanetí. Kuo mamata ʻa e niʻihi ʻi he ngaahi faiva, ngaahi hula, pe ngaahi polokalama televīsone ʻa ia ʻoku maeʻeeʻa ai ʻa e tōʻonga fakaefehokotaki fakasinó. Ka ko e niʻihi ʻoku nau ʻalu ki he ngaahi naitikalapu mo e ngaahi feituʻu hula taʻevala pe kuo nau ʻalu ki he ngaahi feituʻu ke maʻu ai ʻa e ngaahi fotofota ʻoku langaʻi ai ʻa e holi taʻetaau.

5. Ko e hā ʻoku fiemaʻu ai ke tau maluʻi hotau loto taʻehaohaoá?

⁵ ʻOku tō ʻa e niʻihi ʻi he fakatauelé koeʻuhí ʻoku nau kumi tokoni mei ha tokotaha kehe kae ʻikai mei honau hoa malí. ʻOku tau moʻui ʻi ha māmani ʻoku ʻikai fuʻu mapuleʻi-kita ai ʻa e kakaí pea ʻoku nau fiefia ʻi he meʻa taʻetaau kotoa pē. Pehē foki, koeʻuhí ko hotau loto taʻehaohaoá ʻoku kākā mo kovi, ʻe faingofua ke tau fakatupulekina nai ha ngaahi ongoʻi fakaemanako ki ha taha kehe kae ʻikai ko hotau husepānití pe uaifí. (Lau ʻa e Selemaia 17:9, 10.) Naʻe pehē ʻe Sīsū: “ʻOku ʻalu hake mei he lotó ʻa e ngaahi fakaʻuhinga fulikivanu, ngaahi fakapō, ngaahi tono, ngaahi feʻauaki.”—Māt. 15:19.

6, 7. (a) Ko e hā ʻe lava ke hoko kapau ʻoku tupulaki ʻa e ngaahi holi fehālākí ʻi hotau lotó? (e) ʻE lava fēfē ke tau fakaʻehiʻehi mei he faiangahala kia Sihová?

⁶ ʻI he tupulaki ʻa e ngaahi holi fehālākí ʻi hona lotó, ko e ongo ua ʻokú na fetokangaʻakí te na kamata nai ke fai ʻa e ngaahi fetalanoaʻaki fekauʻaki mo e ngaahi meʻa ʻoku totonu ke na lāulea pē ki ai mo hona husepānití pe uaifí tonu. ʻIkai fuoloa, ʻokú na toutou fai ʻa e ngaahi kalofanga ke na fakataha ai. ʻOkú na toutou fetaulaki lahi ange, ʻo fakangalingali ʻokú na fetaulaki fakatuʻupakē pē. ʻI he hoko ʻo fakalalahi ange ʻena femanakoʻakí, ʻoku hoko ʻo faingataʻa ange ke fai ʻa e meʻa ʻoku totonú. ʻI he tupulaki hona vahaʻangataé, ko e faingataʻa ange ia ke fakangata iá, neongo ʻokú na ʻiloʻi ko e meʻa ʻokú na faí ʻoku hala.—Pal. 7:21, 22.

⁷ ʻOku ngalo fakaʻaufuli ʻia kinaua ʻa e ngaahi tuʻunga fakaeʻulungaanga ʻa Sihová hangē ko e ngaahi holi fehālākí mo e ngaahi fetalanoaʻaki ʻoku iku ki he piki nima, ʻuma, amoamo mo e fealaʻaki ʻi ha founga fakaefehokotaki fakasino. Ko e meʻa fakamamahí, ʻokú na fai ʻa e ngaahi meʻa ʻoku totonu ke na fai pē mo hona hoa malí tonu. ʻOku “tohoakiʻi mo fakataueleʻi” kinaua ʻe heʻena holí tonu. Ko e ikuʻangá, ʻi he taimi ʻoku mālohi feʻunga ai ʻa e holí, ʻokú na fai ʻa e fehokotaki fakasino taʻetaau. (Sēm. 1:14, 15) ʻOku fakamamahi koeʻuhí ko e ongo meʻá fakatouʻosi naʻe mei lava ke na fakaʻehiʻehi mei he faiangahala kia Sihová kapau naʻá na fakaʻatā ia ke ne fakaivimālohiʻi ʻena fakaʻapaʻapa ki he nofo malí. ʻE lava fēfē ke fakatupulekina ʻe ha taha ʻa e fakaʻapaʻapa peheé?

8. ʻOku anga-fēfē hono maluʻi kitautolu ʻe heʻetau kaumeʻa mo Sihová mei he ʻulungaanga taʻetāú?

⁸ Lau ʻa e Saame 97:10. Ko e kaumeʻa mo  Sihová ʻe lava ke ne maluʻi kitautolu mei he ʻulungaanga taʻetāú. ʻI he taimi ʻoku tau ako ai fekauʻaki mo hono ngaahi ʻulungaanga fakaofó, ʻoku tau feinga ke “hoko ko e kau faʻifaʻitaki ki he ʻOtuá, ʻi he tuʻunga ko e fānau ʻofeina, pea hokohoko atu ʻa e ʻaʻeva ʻi he ʻofá.” Ko hono olá, te tau maʻu ʻa e mālohi ke talitekeʻi ʻa e “feʻauakí mo e faʻahinga kotoa pē ʻo e taʻemaʻá.” (ʻEf. 5:1-4) Ko e ngaahi husepāniti mo e ngaahi uaifi ʻoku nau ʻilo “ʻe fakamāuʻi ʻe he ʻOtuá ʻa e kau feʻauakí mo e kau tonó” ʻoku nau ngāue mālohi ke nau nofoʻaki fefaitōnungaʻaki.—Hep. 13:4.

9. (a) Naʻe lava fēfē ke nofoʻaki faitōnunga ʻa Siosifa neongo naʻe fakataueleʻi ʻe he mali hono pulé? (e) Ko e hā ʻa e ngaahi lēsoni ʻe lava ke tau ako mei he faʻifaʻitakiʻanga ʻa Siosifá?

⁹ Kuo fakangaloku ʻe he kau Kalisitiane ʻe niʻihi honau ngaahi tuʻunga fakaeʻulungāngá ʻaki hono fakamoleki ʻa e taimi mo e kaungāngāue ʻikai Fakamoʻoní hili ʻa e ngaahi houa ngāué. Kuo toe fakataueleʻi ʻa e niʻihi lolotonga ʻa e ngāué. Ko e meʻa ia naʻe hoko ki ha kiʻi talavou ko Siosifa. Lolotonga ʻa e ngāué, naʻá ne ʻiloʻi ko e uaifi hono pulé naʻe manako ʻaupito ʻiate ia. ʻI he ʻaho ki he ʻaho, naʻá ne feinga ke fakataueleʻi ia ke na mohe. Faifai atu pē, naʻe “puke ia ʻe he fefine ʻi hono kofu, ʻo ne pehe, Ta mohe ā.” Ka naʻe fakafisi ʻa Siosifa ʻo ne hola. Naʻe lava fēfē ke mālohi feʻunga ʻa Siosifa ke nofoʻaki faitōnungá? Koeʻuhí he naʻá ne fakapapauʻi ke maluʻi ʻene kaumeʻa mo e ʻOtuá. Naʻe mole ʻa e ngāue ʻa Siosifá pea naʻe tuku pilīsone ia, ka naʻe tāpuakiʻi ia ʻe Sihova. (Sēn. 39:1-12; 41:38-43) Pe ʻoku tau ʻi he ngāué pe ʻi ha feituʻu kehe, ʻoku fiemaʻu ke tau fakaʻehiʻehi mei he ngaahi tuʻunga fakatauelé.

10. ʻOku anga-fēfē tokoni ʻa e angaʻitangata foʻoú ki hono maluʻi ha nofo mali?

¹⁰ Ko e angaʻitangata foʻou ʻa ia ʻoku “fakatupu ʻo fakatatau ki he finangalo ʻo e ʻOtuá ʻi he māʻoniʻoni moʻoni mo e mateaki moʻoni” te ne maluʻi ha ongo meʻa mali mei hono fai ʻa e ʻulungaanga taʻetaau fakaefehokotaki fakasinó. (ʻEf. 4:24) ʻI he taimi ʻoku tau kofuʻaki ai ʻa e angaʻitangata foʻoú, ʻoku tau “ʻai ke mate” ʻa e ngaahi kupu hotau sinó ʻaki hono tauʻi ʻa e “feʻauakí, taʻemaʻá, holi fakaefehokotaki fakasinó, holi pangó, mo e mānumanú.” (Lau ʻa e Kolose 3:5, 6.) ʻI heni, ko e kupuʻi lea “ʻai ke mate” ʻoku ʻuhingá kuo pau ke tau fai ha meʻa pē ʻoku fiemaʻú ke tauʻi ʻa e ngaahi holi taʻetāú. Te tau fakaʻehiʻehi mei ha meʻa pē te ne fakatupunga nai kitautolu ke maʻu ha ngaahi holi fakaefehokotaki fakasino taʻetotonu. (Siope 31:1) ʻI he taimi ʻoku tau moʻui ai ʻo fakatatau ki he ngaahi tuʻunga ʻa e ʻOtuá, ʻoku tau ako ke fehiʻa ʻi he “meʻa ʻoku fulikivanú” pea pīkitai ki he “meʻa ʻoku leleí.”—Loma 12:2, 9.

11. ʻE lava fēfē ke fakaivimālohiʻi ha nofo mali ʻe he angaʻitangata foʻoú?

¹¹ ʻI he taimi ʻoku tau kofuʻaki ai ʻa e angaʻitangata foʻoú, ʻoku tau faʻifaʻitaki ki he ngaahi ʻulungaanga ʻo Sihová. (Kol. 3:10) ʻI he taimi ʻoku fakahāhā ai ʻe ha husepāniti mo ha uaifi ʻa e “manavaʻofa . . . , anga-lelei, anga-fakatōkilalo, anga-malū, mo e kātaki,” te nau maʻu ha nofo mali mālohi pea ʻe tāpuakiʻi kinautolu ʻe Sihova. (Kol. 3:12) Pehē foki, te nau maʻu ʻa e feongoongoi lahi ange ʻi he taimi ʻoku nau “tuku ʻa e melino ʻa e Kalaisí ke pule ʻi [honau] lotó.” (Kol. 3:15) ʻI hono maʻu ʻa e “femanavaʻofaʻaki loloto,” ko ha ongo meʻa mali te na “takimuʻa” ʻi he fetokangaʻaki mo e fefakaʻapaʻapaʻaki.—Loma 12:10.

12. Ko e hā ʻa e ngaahi ʻulungaanga ʻokú ke fakakaukau ʻoku mahuʻinga ki ha nofo mali fiefiá?

¹² ʻI he taimi naʻe ʻeke ange ai ki ha ongo meʻa mali pe ko e hā ʻa e ngaahi ʻulungaanga kuó ne tokoniʻi kinaua ke maʻu ha nofo mali fiefiá, ko Sid, ko e husepānití, naʻá ne pehē: “Ko e ʻofá ʻa e ʻulungaanga tefito ʻokú ma ngāue maʻu pē ki aí. Pea ʻokú ma toe ʻilo ko e anga-maluú ʻoku mātuʻaki mahuʻinga.” Ko Sonja, ʻa hono uaifí, naʻá ne loto-tatau mo ia ʻo ne pehē: “ʻOku moʻoni ko e anga-leleí ʻa e ʻulungaanga mātuʻaki mahuʻingá.  Pea kuó ma toe feinga ke fakahāhā ʻa e anga-fakatōkilaló, neongo ʻoku ʻikai ke faingofua maʻu pē.”

13. Ko e hā ʻoku fiemaʻu ki ha nofo mali mālohi, pea ko e hā hono ʻuhingá?

¹³ Ko e taha ʻo e ngaahi founga lelei taha ke ʻai ai ke mālohi ʻetau nofo malí ko e talanoa ki hotau hoa malí ʻi ha founga anga-ʻofa. Ko e meʻa fakamamahí, ko e ngaahi husepāniti mo e ngaahi uaifi ʻe niʻihi ʻoku nau fetalanoaʻaki ʻo ʻikai fuʻu fakaʻapaʻapa ʻo hangē ko ʻenau lea ki he kau solá! ʻI he taimi ʻoku hoko ai ʻa e “loto-kona fakatupu koví, ʻitá, lilí, fekailangakí, mo e laukoví” ʻi he nofo malí, ʻoku fakavaivaiʻi māmālie ai ha vahaʻangatae ʻo ha ongo meʻa mali. (ʻEf. 4:31) Ko ha tōʻonga fakaanga mo fakamamahi te ne maumauʻi ha nofo mali. Ko ia ʻoku fiemaʻu ki he ngaahi hoa malí ke fakaivimālohiʻi honau vahaʻangataé ʻaki ʻa e fetalanoaʻaki ʻi ha founga anga-ʻofa, fakaalaala mo manavaʻofa.—ʻEf. 4:32.

14. Ko e hā ʻoku totonu ke tau fakaʻehiʻehi mei hono faí?

¹⁴ ʻOku pehē ʻe he Tohi Tapú ʻoku ʻi ai ha “ʻaho ke silongo.” (Koh. 3:7) Ko hono moʻoní, ʻoku ʻikai ʻuhinga ení ke ʻoua te tau talanoa ki hotau hoa malí, koeʻuhí he ko e fetuʻutakí ʻoku mahuʻinga ki ha nofo mali lelei. ʻOku pehē ʻe ha uaifi ʻi Siamane: “ʻI he ngaahi tuʻunga peheé, ʻe lava ʻa e fakalongolongó ke fakalotomamahiʻi ho hoá.” ʻOkú ne tānaki mai: “Neongo ʻoku ʻikai ke faingofua maʻu pē ke hanganaki anga-malū ʻi he tuʻunga faingataʻá, ʻoku ʻikai lelei ke tukuange atu ʻa e ʻitá koeʻuhí pē ke ke fiemālie. Te ke lea pe fai leva ha meʻa taʻefakakaukauʻi ʻe lava ke ne fakalotomamahiʻi ho hoa malí, pea ʻe ʻai pē ʻe he meʻa ko iá ke toe kovi ange.” Heʻikai fakaleleiʻi ʻe he ngaahi husepānití mo e ngaahi uaifí ʻenau ngaahi palopalemá ʻaki ʻa e fekailangaki pe fakafisi ke feleaʻaki. ʻI hono kehé, ʻoku fakaivimālohiʻi ʻe he ngaahi hoa malí ʻenau nofo malí ʻi he taimi ʻoku nau fili ai ke fakaleleiʻi vave ʻa e ngaahi taʻefemahinoʻakí pea ʻoua ʻe tuku ia ke hoko ai ha ngaahi fekīhiaki.

15. ʻE lava fēfē ke fakaivimālohiʻi ʻe he fetuʻutaki leleí ha nofo mali?

¹⁵ ʻE lava ke ke ʻai ke mālohi ange hoʻo nofo malí ʻi hoʻo vaheʻi ha taimi ke mo fetalanoaʻaki ki hoʻomo ngaahi fakakaukaú mo e ngaahi ongoʻí. Ko e founga hoʻo leaʻaki ha meʻa ʻoku mahuʻinga  tatau pē ia mo e meʻa ʻokú ke leaʻakí. Ko ia naʻa mo e ngaahi tuʻunga faingataʻá, fai ho lelei tahá ke ngāueʻaki ʻa e ngaahi lea anga-ʻofa pea lea ʻi ha founga anga-ʻofa. Pea ʻe faingofua ange ki ho husepānití pe uaifí ke fanongo atu kiate koe. (Lau ʻa e Kolose 4:6.) ʻE lava ke fakaivimālohiʻi ʻe ha ongo meʻa mali ʻena nofo malí ʻaki ʻa e fetuʻutaki lelei ʻi he taimi ʻokú na ngāueʻaki ai ʻa e ngaahi lea ʻoku fakalototoʻa mo ʻaonga.—ʻEf. 4:29.

16, 17. Ko e hā ʻoku mahuʻinga ai ke hoko ʻo ongongofua ki heʻena ngaahi fiemaʻu fakaeongo mo fakaefehokotaki fakasinó?

¹⁶ ʻE lava ke toe faʻu ʻe he ngaahi hoa malí ha nofo mali mālohi ʻi he taimi ʻoku nau fakamuʻomuʻa ai ʻa e ngaahi fiemaʻu fakafoʻituitui ʻa honau hoá ʻi haʻanautolú. (Fil. 2:3, 4) Ko e ngaahi husepānití pea pehē ki he ngaahi uaifí ʻoku fiemaʻu ke nau ongongofua ki he ngaahi fiemaʻu fakaeongo mo fakaefehokotaki fakasino ʻa honau hoá.—Lau ʻa e 1 Kolinitō 7:3, 4.

¹⁷ Ko e meʻa fakamamahí, ko e ngaahi hoa mali ʻe niʻihi ʻoku ʻikai ke nau fakahāhā ʻa e ʻofá pe ʻikai hoko ʻo fekoekoeʻi. Pea ʻoku fakakaukau ʻa e kau tangata ʻe niʻihi kapau te nau anga-fakaalaala ki honau uaifí, ʻoku ʻuhinga iá ʻoku nau foʻi. Ka ʻoku pehē ʻe he Tohi Tapú: “Ko kimoutolu ngaahi husepānití ʻoku totonu ke mou feinga ke mahinoʻi ʻa e ngaahi uaifi ʻoku mou nofo mo iá.” (1 Pita 3:7, Phillips) ʻOku fiemaʻu ki ha husepāniti ke ne mahinoʻi ko e totonu fakaemalí ʻoku ʻikai ke kau ai ʻa e fehokotaki fakasinó pē. ʻOku fiemaʻu ke ne hoko ʻo ʻofa mo anga-ʻofa ʻi he taimi kotoa pē. Pea ʻe ngalingali ange ʻe fiefia hono uaifí ʻi he fehokotaki fakasinó. ʻI he taimi ʻokú na fakatou fakahāhā ai ʻa e ʻofá mo e anga-ʻofá, ʻe faingofua ange ai ke fakatōliʻa ʻena ngaahi fiemaʻu fakaeongó mo e fakaesinó.

18. ʻE lava fēfē ke fakaivimālohiʻi ʻe he ngaahi husepānití mo e ngaahi uaifí honau vahaʻangataé?

¹⁸ Neongo ʻoku ʻikai ha kalofanga ia kia kitautolu ke taʻefaitōnunga ki hotau hoa malí, ko e ʻikai ke anga-fakaalaalá ʻe lava ke hoko ia ko e taha ʻo e ngaahi ʻuhinga ki he kumi ʻa ha husepāniti pe ko ha uaifi ki he ʻofa mo e fekoekoeʻi mei ha taha kehe. (Pal. 5:18; Koh. 9:9) Ko e ʻuhinga ia ʻoku akonaki ai ʻa e Tohi Tapú ki he ngaahi hoa malí ke ʻoua ʻe “fetaʻofiʻaki” ʻa e totonu fakaemalí tuku kehe ka ʻokú na fakatou loto-tatau ke fai pehē ʻi ha vahaʻa taimi nounou. Ko e hā hono ʻuhingá? “Koeʻuhi ke ʻoua naʻa kei ʻahiʻahiʻi ai pē ʻe Sētane kimoutolu ʻi ha ʻikai te mou maʻu ʻa e mapuleʻi-kitá.” (1 Kol. 7:5) He mātuʻaki fakalotomamahi ē ki ha ongo meʻa mali ke na fakaʻatā ʻa Sētane ke ne ngāueʻaki ʻena ‘ʻikai maʻu ʻa e mapuleʻi-kitá’ ke fakataueleʻi ha taha ʻi he ongo meʻa malí ke tono! ʻI hono ʻoange ʻa e totonu fakaemalí, ʻoku kumi ʻa e hoa taki taha, “ʻo ʻikai ki he lelei pē ʻaʻaná, ka ki he lelei ʻa e tokotaha kehé.” ʻOkú na fai eni koeʻuhí ʻokú na feʻofaʻaki, ʻo ʻikai koeʻuhí ko hona fatongia pē. Ko e fakahaaʻi fekoekoeʻi ʻa e ʻofá mo e anga-fakaalaalá ʻoku fakaivimālohiʻi ai hona vahaʻangataé.—1 Kol. 10:24.

19. Ko e hā ʻoku totonu ke tau fakapapauʻi ke faí, pea ko e hā hono ʻuhingá?

¹⁹ ʻOku tau ofi ʻaupito ke hū atu ki he māmani foʻoú! Ko ha fakatuʻutāmaki ia ke hoko ʻo tō ʻi he ngaahi holi fehālākí, ʻo hangē ko e kau ʻIsileli ʻe toko 24,000 ʻi he Tokalelei ʻo Mōapé. Hili hono fakamatalaʻi ʻa e meʻa naʻe hokó, ʻoku fakatokanga mai ʻa e Tohi Tapú: “Tuku kiate ia ʻokú ne fakakaukau ʻokú ne tuʻú ke ne tokanga telia naʻá ne tō.” (1 Kol. 10:12) Ke fakaivimālohiʻi ʻetau nofo malí, kuo pau ke tau nofoʻaki faitōnunga kia Sihova mo hotau hoa malí. (Māt. 19:5, 6) ʻI he taimí ni, ʻo laka hake ʻi ha toe taimi ki muʻa, ʻoku fiemaʻu ke tau “fai [hotau] tūkuingatá ke ʻosi angé pea ʻilo kimoutolu ʻe ia ʻoku mou taʻehaʻila mo taʻehamele pea ʻoku mou ʻi he melino.”—2 Pita 3:13, 14.