Naʻe fāʻeleʻi au ʻi ha kiʻi kolo ko Texcoco. ʻI he taimi ko iá, ko e lahi taha ʻo e ngaahi halá naʻe ʻikai tanu mo efua. Naʻe angamaheniʻaki ke sio ki he kakaí mei he ngaahi kolo ofi maí ʻoku taki mai ʻenau fanga ʻasí ki kolo ʻoku fakauta mai ai ʻa e ngaahi meʻa ke fakataú. Naʻe masiva ʻaupito homau fāmilí ʻo e fānau ʻe toko hiva, ʻa ia ko au ʻa e fika fitú. Naʻe tuitui sū guaraches (senitolo maumau) ʻeku tamaí ke tauhiʻaki ʻa e fāmilí. Ka naʻá ne mate ʻi heʻeku kei taʻu fitú. Mei he taimi ko iá ʻo faai mai, naʻe fāinga ʻeku faʻeé ke tokonaki ha meʻakai maʻá e fāmilí.

Ko ʻeku kui-tangatá naʻe tā vālingi pea ko e faiako ia ʻo ha kau tā meʻalea ʻa ia naʻá ne mataotao ʻi he fasi fakalotu classical. Ko e meimei kotoa ʻa e ngaahi mēmipa hoku fāmilí naʻa nau tā ha meʻalea. Naʻe hiva ʻeku faʻeé ʻi he kau hiva ʻa e siasí, pea ko ʻeku faʻē-tangatá ko ha tokotaha hiva solo mo tā piano. Ko e kau mateaki fakalotu kimautolu—ko ha tamasiʻi ngāue pē au ʻi he ʻōlitá, pea naʻá ku fakaʻamu ke hoko ko ha misinale Katolika. ʻI he taimi tatau, naʻá ku saiʻia ʻi he faiva kalaté. Ko e lahi ange ʻeku sio ʻi he ngaahi faiva ko iá, ko e lahi ange ia ʻeku fakatupulekina ha natula fakamālohi.

ʻI Puebla, naʻá ku hū ai ki ha ʻapiako fakalotu ʻa ia naʻe fakalele hangē ha seminālio. Ko ʻeku taumuʻá ke hoko ko ha pātele Katolika. Kae lolotonga hoku taʻu fakaʻosi ʻi he akó, naʻá ku loto-mamahi ʻi he Siasi Katoliká. Ko ha finemui tāupoʻou naʻá ne fai ha fakatauele fakaefehokotaki fakasino mai kiate au. Naʻá ku talitekeʻi ʻa e ʻahiʻahí, ka ʻi he tuʻunga ko iá naʻe langaʻi ai ʻiate au ʻa e holi ke malí. ʻIkai ko ia pē, naʻá ku fakatokangaʻi ʻa e kau pātele ʻe niʻihi naʻa nau moʻui ʻi ha founga moʻui mālualoi. Faifai atu pē, naʻá ku liʻaki ʻeku taumuʻa ʻo e hoko ko ha pātelé.

 Naʻá ku fili ke ako ki he hivá ʻi he ʻApiako Fakafonua ki he Hivá ʻi he Kolo Mekisikoú. ʻI he taimi naʻá ku maʻu tohi fakamoʻoni ako aí, naʻá ku mali, pea naʻe vave ʻeku maʻu mo hoku uaifí ʻema fānau ʻe toko fā. Naʻá ku tokonaki maʻá e fāmilí ʻaki ʻeku hiva he Misá ʻi he Siasi Katoliká.

Mei he kamatá pē, naʻe palopalema ʻema nofo malí. Ko au mo hoku uaifí naʻá ma feangafakamālohiʻaki, ko e lahi tahá koeʻuhí naʻá ma tukulotoa ʻa e ngaahi ongoʻi fuaʻá. ʻI he kamatá naʻá ma felauʻaki, pea hoko atu ai ki he fetāʻaki. Faifai atu pē, hili ʻa e taʻu ʻe 13, naʻá ma fili ke māvae pea ki mui ai ke na vete.

Ko ʻeku ʻuluaki fetuʻutaki mo e Kau Fakamoʻoni ʻa Sihová naʻe hoko ia ki muʻa ke u māvae mo hoku uaifí. Naʻe tukituki mai ha ongo Fakamoʻoni ʻi homa matapaá pea tuʻuaki mai ke mau talanoa ki he Tohi Tapú. Naʻá ku fakakaukau naʻá ku ʻilo lahi fekauʻaki mo e lotú, ko ia naʻá ku fokotuʻutuʻu ke fakahalaki kinaua. Naʻá ku ʻeke ha ngaahi fehuʻi faingataʻa pea naʻá ku fakakaukau heʻikai ke ʻi ai ha tali. Ka ʻi heʻeku ʻohovalé, naʻá na ʻomai maʻu pē ʻa e ngaahi tali lelei makatuʻunga ʻi he Tohi Tapú. Naʻe kamata ke u sio ki he siʻisiʻi moʻoni ʻeku ʻiló. Kae kehe, naʻe fuʻu anga-kovi ʻaupito hoku uaifí ki he Kau Fakamoʻoní, pea naʻá ku fuʻu femoʻuekina, ko ia naʻe ngata leva ai ʻa e ʻaʻahí.

ʻI he hili ʻa e taʻu ʻe nima, naʻá ku nofo mo ha fefine kehe, ko Elvira, ʻi he taimi ko iá naʻá ku toe fetuʻutaki ai mo e Kau Fakamoʻoni ʻa Sihová. Naʻe ʻikai fakafepakiʻi ʻe Elvira ʻa e Kau Fakamoʻoní, ko ia naʻá ku ʻilo ʻoku faingofua ange ke ako ʻa e Tohi Tapú ʻi ha tuʻunga tuʻumaʻu. Naʻa mo ia, naʻá ku fāinga ʻi ha ngaahi taʻu ke liliu ʻeku founga moʻuí.

Naʻá ku mahinoʻi kapau naʻá ku loto ke lotu ʻaufuatō kia Sihova, naʻe fiemaʻu ke u fai ha ngaahi liliu lahi. ʻUluakí, naʻe fiemaʻu ke liʻaki ʻeku hiva ʻi he Misá ʻi he Siasi Katoliká, ʻa ia naʻe ʻuhingá kuo pau ke u kumi ha ngāue kehe ke maʻu ai ha moʻui. (Fakahā 18:4) Naʻe toe fiemaʻu foki ke fakalao ʻeku mali mo Elvira.

Ka, ko e taha ʻo e ngaahi liliu faingataʻa tahá, ko e ako ke mapuleʻi ʻeku ʻita vavé. Naʻe tautefito hono tokoniʻi au ʻe he ongo veesi Tohi Tapu ʻe ua: Saame 11:5, ʻa ia ʻoku fakahaaʻi ai ʻa e fehiʻa ʻa Sihova ʻi he fakamālohí, mo e 1 Pita 3:7, ʻa ia naʻe akoʻi ai au kapau ʻoku ou loto ke fanongo mai ʻa Sihova ki heʻeku lotú, kuo pau ke u fakalāngilangiʻi hoku uaifí. ʻI heʻeku fakalaulauloto ki he ongo veesi ko iá pea lotu ʻo kole ʻa e tokoni ʻa Sihová, naʻe māmālie ʻa e malava ke puleʻi ʻeku ʻitá.

ʻOku ou maʻu he taimí ni ha moʻui fakafāmili fiefia. ʻOku ou feinga ke fakaleleiʻi hoku vahaʻangatae mo hoku ongo foha mei hoku ʻuluaki malí pea tokoniʻi hoku fāmili lolotongá ke nau mālohi ai pē ʻi he tuí.

ʻI heʻeku kei siʻí, naʻá ku fakaʻamu ke hoko ko ha pātele pea tokoniʻi ʻa e kakaí. ʻOku ou ongoʻi he taimí ni ko ʻeku moʻuí ʻoku mohu ʻuhinga moʻoni. Ko ʻeku faiako he hivá ʻoku ou tauhiʻaki hoku fāmilí. ʻOku ou houngaʻia ʻaupito ʻi he anga-kātaki mai ʻa Sihová, ʻo ʻomai kiate au ʻa e faingamālie ke liliu pea hoko ko ha tokotaha lelei ange!