ʻOku fakamahuʻingaʻi ʻe Sihova ʻa e meʻa ʻoku fai ʻe heʻene kau lotú ʻi he feinga ke fakahōifuaʻi iá? ʻOku pehē nai ʻe he niʻihi ʻikai, ʻi he taukaveʻi ʻoku ʻikai ke mahuʻingaʻia ʻa e ʻOtuá ʻiate kitautolu. Ka ko e taukaveʻi peheé ʻoku pouaki ai ʻa e fakamatalahalaʻi ʻo e ʻOtuá. Ko ʻene Folofolá, ʻa e Tohi Tapú ʻokú ne fakatonutonu ʻa e fakamatala ko ení. ʻOkú ne fakapapauʻi mai kia kitautolu ʻoku houngaʻia ʻa Sihova ʻi he ngaahi feinga ʻene kau lotu faitōnungá. Fakakaukau angé ki he ngaahi lea ʻa e ʻapositolo ko Paulá ʻoku hā ʻi he Hepelū 11:6.

Ko e hā ʻe fai ke fakahōifuaʻi ai ʻa Sihová? Naʻe tohi ʻa Paula “ʻI he ʻikai kau ʻa e tuí ʻoku ʻikai malava ke fakahōifuaʻi lelei ʻa e ʻOtuá.” Fakatokangaʻi naʻe ʻikai ke pehē ʻe Paula ia ʻoku faingataʻa ke fakahōifuaʻi ʻa e ʻOtuá ʻo ʻikai kau ai ʻa e tuí. ʻI hono kehé, ʻoku pehē ʻe he ʻapositoló ʻoku ʻikai malava ke fai pehē. ʻI he toe fakalea ʻe tahá, ko e tuí ko e taha ia ʻi he konga mahuʻinga ki hono fakahōifuaʻi ʻa e ʻOtuá.

Ko e faʻahinga tui fēfē ʻe fakahōifua kia Sihová? Ko ʻetau tui ki he ʻOtuá kuo pau ke kau ki ai ʻa e tafaʻaki ʻe ua. ʻUluakí, ‘kuo pau ke tau tui ʻoku ʻi ai ia.’ Ko e ngaahi liliu kehé ʻoku pehē “Tui ʻokú ne ʻi ai moʻoni” mo e “tui ʻoku ʻi ai e ʻOtua.” ʻOku anga-fēfē ʻa e malava ke tau fakahōifuaʻi ʻa e ʻOtuá kapau ʻoku tau veiveiua ʻokú ne ʻi ai? Ka neongo ia, ko e tui moʻoní ʻoku kau ki ai ʻa e meʻa lahi ange, naʻa mo e kau tēmeniō ʻoku nau tui ʻoku ʻi ai moʻoni ʻa Sihova. (Sēmisi 2:19) Ko ʻetau tui ko e tokotaha moʻoni ʻa e ʻOtuá, ʻoku totonu ke ne ueʻi kitautolu ke fai ha ngāue, ke fakamoʻoniʻi ʻetau tuí ʻaki ʻetau moʻui ʻi ha founga ʻoku fakahōifua kiate ia.—Sēmisi 2:20, 26.

Uá, ‘kuo pau ke tau tui’ ko e ʻOtuá ‘ko e tokotaha fakapalé ia.’ Ko ha tokotaha ʻokú ne maʻu ʻa e tui moʻoní ʻokú ne fakapapauʻi kakato ko ʻene ngaahi feinga ke moʻui ʻi he founga ke fakahōifua ki he ʻOtuá ʻe ʻikai laufānō (1 Kolinitō 15:58) ʻE lava fēfē ke tau fakahōifuaʻi ʻa Sihova kapau ʻoku tau veiveiua ki heʻene malava pe holi ke fakapaleʻi kitautolú? (Sēmisi 1:17; 1 Pita 5:7) Ko ha tokotaha ʻokú ne fakaʻosiʻaki ko e ʻOtuá ʻoku pau pē ʻokú ne taʻetokaʻi, taʻehoungaʻia mo ʻikai nima-homo ʻoku ʻikai ke ne ʻiloʻi ʻa e ʻOtua ʻo e Tohi Tapú.

Ko hai ʻoku fakapaleʻi ʻe Sihová? Ko e “faʻahinga ʻoku nau kumi tōtōivi kiate iá,” ko e lea ia ʻa Paulá. Ko ha tohi maʻuʻanga fakamatala ki he kau liliu Tohi Tapú ko e foʻi lea faka-Kalisi ʻoku fakalea ko e “kumi tōtōivi” ʻoku ʻikai ʻuhinga ia “ko e ako ʻataʻatā pē” ka ʻi hono kehé ʻoku fakamamafaʻi ai ʻa e feinga ke hū ki he ʻOtuá “ʻi he lotu.” Ko e toe tohi maʻuʻanga fakamatala ʻoku fakamatalaʻi ai ko e foʻi veape faka-Kalisi ko ení ʻoku fokotuʻu mai ai ʻa e feinga lahi mo tāfataha. ʻIo, ʻoku fakapaleʻi ʻe Sihova ʻa e faʻahinga ʻoku ueʻi kinautolu ʻe he tuí ke lotu ange kiate ia ʻi he loto-kakato mo faivelenga.—Mātiu 22:37.

ʻOku anga-fēfē hono tāpuakiʻi ʻe Sihova ʻene kau lotu faitōnungá? Naʻá ne talaʻofa ha pale taʻehanotatau ki he kahaʻú ʻoku hā ai ʻa e lahi mamaʻo ʻa ʻene ʻofá mo ʻene nima-homó—ko e moʻui taʻengata ʻi he Palataisi ʻi he māmaní. (Fakahā 21:3, 4) Naʻa mo e taimí ni, ko kinautolu ʻoku kumi tōtōivi kia Sihová te nau hokosia ʻa e ngaahi tāpuaki lahi. Fakataha mo e tokoni hono laumālie māʻoniʻoní mo e poto ʻoku maʻu ʻi heʻene Folofolá, ʻoku nau maʻu ha pale mo ha founga moʻui fakafiemālie.—Saame 144:15; Mātiu 5:3.

Ko e moʻoni ko e ʻOtua houngaʻia ʻa Sihova, ʻokú ne koloaʻaki ʻa e ngāue faitōnunga ʻene kau lotu līʻoá. ʻOkú ke loto ke ke ʻunuʻunu ofi ange kiate ia ʻi he ueʻi koe ʻe he ʻilo ko iá? Kapau ko ia, ko e hā ʻoku ʻikai te ke ako lahi ange ai fekauʻaki mo e founga ʻe lava ai ke ke fakatupulekina mo fakahāhā ʻa e tui ʻa ia ʻe fakapaleʻi lahi ʻe Sihová?