“ʻOku ʻikai ke tau loto-taha pe ʻe lava ke tau leaʻaki ‘ʻa e’ huafa ʻo e ʻOtuá pea kapau ko ia, ko e hā nai ʻa e huafa ko iá.”—Palōfesa David Cunningham, Theological Studies.

Naʻe folofola ʻa e ʻOtuá: “Ko Sihova au; ko hoku hingoa ia.” (ʻAisea 42:8) Ko e Sihová ko e hingoa faka-Hepelū ia ʻoku ʻuhingá “ʻOkú Ne Fakatupunga ke Hoko.”

ʻOku finangalo ʻa Sihova ke tau ngāueʻaki hono huafá. “Ui ki hono huafa,” ko e lau ia ʻa e Tohi Tapú. “Fakaha ene gaahi gaue i he ao oe kakai, fakamatala kuo hiki hake hono huafa.”—ʻAisea 12:4, PM.

Naʻe ngāueʻaki ʻe Sīsū ʻa e huafa ʻo e ʻOtuá. ʻI he lotú, naʻe leaʻaki ʻe Sīsū kia Sihova: “Kuó u ʻai ke nau [kau ākonga ʻa Sīsuú] ʻilo ho huafá pea te u ʻai ia ke ʻiloa.” Ko e hā naʻe ʻai ai ʻe Sīsū ke ʻiloa ʻa e huafa fakaʻotuá ki heʻene kau ākongá? Naʻá ne hoko atu: “Koeʻuhi ke ʻiate kinautolu ʻa e ʻofa naʻá ke [ʻOtuá] ʻofa ʻaki kiate aú pea ʻoku ou fāʻūtaha mo kinautolu.”—Sione 17:26.

“Ko ha tangata ʻoku ʻikai ke ne ʻiloʻi ʻa e huafa ʻo e ʻOtuá ʻoku ʻikai ke ne ʻiloʻi moʻoni ko ha tokotaha ia,” ko e tohi ia ʻa e teolosia ko Walter Lowrie, “pea heʻikai malava ke ne ʻofa ki ai kapau ko ʻene fakakaukaú ko ha mālohi pē ia ʻoku mahulu hake ʻi he tangatá.”

Ko ha tangata ko Victor naʻá ne maʻu lotu fakauike, ka naʻe ʻikai ke ne ongoʻi ʻokú ne ʻiloʻi moʻoni ʻa e ʻOtuá. “Naʻá ku ako ko e huafa ʻo e ʻOtuá ko Sihova pea ʻoku hangē ia ha fakafeʻiloaki fakaʻofisiale kiate iá”, ko ʻene laú ia. “Kuo faifai ange peá u ongoʻi kuó u fetaulaki mo e Tokotaha ne u faʻa fanongo lahi fekauʻaki mo iá. Ne u hoko ʻo ʻiloʻi ko ha Tokotaha moʻoni ia pea fakatupulekina ha kaumeʻa mo ia.”

ʻI he tafaʻaki ʻe tahá ʻoku ʻunuʻunu ofi ʻa Sihova ki he faʻahinga ʻoku nau ngāueʻaki hono huafá. ʻI he fekauʻaki mo e faʻahinga ʻoku nau “tokaʻi hono huafa,” ko e talaʻofa ia ʻa e ʻOtuá: “Te u maemaeʻekina kinautolu hange ko e maemaeʻekina ʻe ha tangata hono foha ʻoku ngaue kiate ia.” (Malakai 3:16, 17) ʻOku toe fakapaleʻi ʻe he ʻOtuá ʻa e faʻahinga ʻoku ui ki hono huafá. ʻOku pehē ʻe he Tohi Tapú: “Ko e tokotaha kotoa pē ʻoku ui ki he huafa ʻo Sihová ʻe fakahaofi.”—Loma 10:13.