ʻAisea 40:1-31
40 “Mou fakafiemālieʻi, mou fakafiemālieʻi ʻa hoku kakaí,” ko e folofola ia ʻa homou ʻOtuá.+
2 “Lea ke aʻu ki he loto ʻo Selusalemá,*Pea fakahā kiate ia kuo lava ʻa ʻene ngāue fakapōpulá,Kuo totongi ʻosi ʻa ʻene hiá.+
Kuó ne maʻu ʻa e totongi kakato* ki heʻene angahalá kotoa mei he nima ʻo Sihová.”+
3 ʻOku ʻi ai ha leʻo ʻo ha taha ʻoku kalanga ʻi he toafá:
Fakaʻataʻatā* ʻa e ʻalunga ʻo Sihová!+
ʻAi ke hangatonu ʻa e hala lahi+ ʻi he toafá maʻa hotau ʻOtuá.+
4 Tuku ke tanu ʻa e teleʻa kotoa pē,Pea ke holoki hifo ʻa e moʻunga mo e foʻi māʻolunga kotoa pē.
Ko e kelekele tafungofungá kuo pau ke fakatokalelei,Pea ko e kelekele tokakoví ke hoko ko ha teleʻa lautoka.+
5 ʻE fakaeʻa ʻa e lāngilangi ʻo Sihová,+Pea ko e kakano kotoa pē* te nau sio kotoa ki ai,+He kuo folofolaʻaki ia ʻe Sihova.”
6 Fanongo! ʻOku pehē ʻe ha tokotaha: “Fai ha fanongonongo!”
ʻOku ʻeke ʻe ha tokotaha: “Ko e hā te u fanongonongó?”
“Ko e kakano kotoa pē* ko e mohuku lanu mata.
Ko e kotoa ʻo ʻenau ʻofa mateakí ʻoku hangē ko e fisi ʻo e ʻakau ʻo e vaó.+
7 ʻOku mōmoa ʻa e mohuku lanu matá,ʻOku mae ʻa e fisí,+Koeʻuhí ʻoku puhi mai ki ai ʻa e mānava ʻa* Sihová.+
Ko e moʻoni ko e kakaí ko e mohuku lanu mata pē.
8 ʻOku mōmoa ʻa e mohuku lanu matá,ʻOku mae ʻa e fisí,Ka ko e folofola ʻa hotau ʻOtuá ʻoku tolonga ʻo taʻengata.”+
9 ʻAlu hake ki ha moʻunga māʻolunga,ʻA koe fefine ʻokú ke ʻomi ʻa e ongoongo lelei ki Saioné.+
Hiki hake ho leʻó ke mālohi,ʻA koe fefine ʻokú ke ʻomi ʻa e ongoongo lelei ki Selusalemá.
Hiki hake ia, ʻoua ʻe ilifia.
Fanongonongo ki he ngaahi kolo ʻo Siutá: “Ko eni ʻa homou ʻOtuá.”+
10 Vakai! ʻE hāʻele mai ʻi he mālohi ʻa e ʻEiki Hau ko Sihová,Pea ko hono nimá ʻe pule maʻana.+
Vakai! ʻOku ʻiate ia ʻa ʻene palé,Pea ko e totongi te ne ʻoatú ʻoku ʻi hono ʻaó.+
11 Te ne tokangaʻi* ʻa ʻene tākangá ʻo hangē ha tauhi-sipí.+
Te ne tānaki fakataha ʻa e fanga lamí ʻaki hono nimá,Pea te ne fua kinautolu ʻi hono fatafatá.
Te ne taki fakaalaala ʻa e fanga manu ʻoku toutamá.+
12 Ko hai kuó ne fua ʻa e ngaahi vaí ʻi hono ʻaofinimá+Peá ne fua ʻa e* ngaahi langí ʻaki ʻa e hanga ʻo hono nimá?*
Ko hai kuó ne tānaki ʻi ha ipu ʻa e efu ʻo e māmaní+Pe fua ʻa e ngaahi moʻungá ʻi he meʻafua tautaúPea mo e ngaahi foʻi māʻolungá ʻi he meʻafuá?
13 Ko hai kuó ne fua* ʻa e lahi ʻo e laumālie ʻo Sihová,Pea ko hai ʻe lava ke ne fakahinohinoʻi ia ʻi he tuʻunga ko ʻene tokotaha faleʻi?+
14 Ko hai ia naʻá ne kumi faleʻi ki ai ke ne maʻu ʻa e mahinó,Pe akoʻi kiate ia ʻa e hala ʻo e fakamaau totonú,Pe akoʻi kiate ia ʻa e ʻiló,Pe fakahā kiate ia ʻa e hala ʻo e mahino moʻoní?+
15 Vakai! Ko e ngaahi puleʻangá ʻoku nau hangē ha tulutā vai mei ha kané,Pea ʻoku vakai kiate kinautolu ʻoku nau hangē ha meʻi efu ʻi ha meʻafuá.+
Vakai! ʻOkú ne hiki hake ʻa e ngaahi motú ʻo hangē ha meʻi efu valevalé.
16 Naʻa mo e ʻuluʻakau ʻo Lepanoní ʻoku ʻikai lahi feʻunga ia ke tafu ʻaki ha afi ke ulo ai pē,*Pea ko ʻene fanga manu kaivaó ʻoku ʻikai lahi feʻunga ia ki ha feilaulau tutu.
17 Ko e kotoa ʻo e ngaahi puleʻangá ko ha foʻi noa pē ia ʻi hono ʻaó;+ʻOkú ne vakai ki ai ko e koto halaʻatā, ko ha koto ngeʻesi.+
18 Ko hai ʻe lava ke mou fakahoa ki ai ʻa e ʻOtuá?+
Ko e hā te mou lava ke fakatatau ia ki aí?+
19 Ko e tangata nima-meaʻá ʻokú ne ngaohi ha ʻaitoli,*Ko e tokotaha tuki ukameá ʻokú ne kofuʻaki ia ʻa e koula,+Pea ʻokú ne tuki ha ngaahi sēini siliva.
20 ʻOku fili ʻe ha tokotaha ha fuʻu ʻakau ko ʻene meʻa foaki,+Ha fuʻu ʻakau ʻa ia ʻe ʻikai popó.
ʻOkú ne kumi ki ha tangata nima-meaʻa pōtoʻiKe ne ngaohi ha ʻīmisi kuo tongi ʻa ia ʻe ʻikai ke tō ki lalo.+
21 ʻOku ʻikai koā ke mou ʻilo?
Kuo ʻikai koā te mou fanongo ai?
Kuo ʻikai koā ke tala atu kiate kimoutolu talu mei he kamataʻangá?
Kuo ʻikai koā ke mou mahinoʻi talu mei he tanupou ʻo e māmaní?+
22 ʻOku ʻi ai ʻa e Tokotaha ʻoku ʻafio ʻi ʻolunga ʻi he takatakai* ʻo e māmaní,+Pea ko hono kakaí ʻoku nau hangē ko e fanga heʻé.
ʻOkú ne falō atu ʻa e ngaahi langí ʻo hangē ha tupenu manifí,Pea ʻokú ne folahi atu ia ʻo hangē ha tēniti ke nofo aí.+
23 ʻOkú ne tuku hifo ʻa e kau māʻolungá ke nau hoko ko e meʻa noa pēPeá ne ʻai ʻa e kau fakamaau* ʻo e māmaní ko ha koto ngeʻesi.
24 Ko e tuai pē ke tō hifo kinautolú,Ko e tuai pē ke tūtuuʻi kinautolú,Ko e tuai pē ke faiaka honau vaʻá ʻi he kelekelé,Kuo puhiʻi kinautolu ʻo nau mōmoa.
Pea ʻave kinautolu ʻe he matangí ʻo hangē ha kafukafú.+
25 “Ko hai ʻe lava ke mou fakatatau au ki ai ke ʻai au ke ma tataú?” Ko e folofola ia ʻa e Tokotaha Māʻoniʻoní.
26 “Hanga hake homou matá ki he langí pea vakai.
Ko hai kuó ne fakatupu ʻa e ngaahi meʻá ni?+
Ko e Tokotaha ia ʻokú ne ʻomi ʻa honau kongakaú ʻi honau tokolahí;ʻOkú ne ui kinautolu kotoa ʻaki honau hingoá.+
Koeʻuhí ko e lahi ʻo hono fuʻu iví mo hono mālohi fakaofó,+ʻOku ʻikai ha taha ʻo kinautolu ʻe tō.
27 Ko e hā ʻokú ke pehē ai, ʻe Sēkope, ko e hā ʻokú ke fanongonongo ai, ʻe ʻIsileli,‘ʻOku fufū ʻa hoku halá meia Sihova,Pea ʻoku ʻikai te u maʻu ha fakamaau totonu mei he ʻOtuá’?+
28 ʻOku ʻikai koā ke ke ʻilo? Kuo ʻikai koā ke ke fanongo ai?
Ko Sihova, ʻa e Tokotaha-Fakatupu ʻo e ngaahi ngataʻanga ʻo e māmaní, ko ha ʻOtua ia ʻi he kotoa ʻo ʻitānití.+
ʻOku ʻikai ʻaupito te ne helaʻia pe ongosia.+
Ko ʻene mahinó ʻoku ʻikai ala fakatotoloa.*+
29 ʻOkú ne foaki ʻa e mālohi ki he tokotaha helaʻiáMo e mālohi kakato ki he faʻahinga ʻoku ʻikai hanau mālohí.*+
30 ʻE helaʻia ʻa e tamaiki tangatá pea nau ongosia,Pea ko e kau talavoú te nau humu pea tō,
31 Ka ko kinautolu ʻoku ʻamanaki kia Sihová te nau maʻu ʻa e mālohi.
Te nau puna ʻo hangē ʻoku nau maʻu ha kapakau ʻo e fanga ʻīkalé.+
Te nau lele pea ʻe ʻikai te nau ongosia;Te nau lue ʻo ʻikai ke helaʻia.”+
Fakamatala ‘i Lalo
^ Pe “Lea fakafiemālie ki Selusalema.”
^ Pe “totongi liunga ua.”
^ Pe “Teuteu.”
^ Pe “faʻahinga kotoa pē ʻo e tangatá.”
^ Pe “Ko e faʻahinga kotoa pē ʻo e tangatá.”
^ Pe “laumālie ʻo.”
^ Pe “tauhi.”
^ Pe “fua ʻa e lahi ʻo e.”
^ Ko e mamaʻo ʻi he vahaʻa ʻo e ngataʻanga ʻo e motuʻa-tuhú mo e louhiʻinima siʻisiʻí ʻi he taimi ʻoku mafola ai ʻa e nimá. Sio ki he Fakamatala Fakalahi E14.
^ Pe ngalingali, “makupusi.”
^ Pe “ʻikai lava ke maʻu ai ha fefie lahi feʻunga.”
^ Pe “ha ʻīmisi kuo haka.”
^ Pe “fuopotopoto.”
^ Pe “kau pule.”
^ Pe “ʻikai lava ke maaʻusia.”
^ Pe “te nau ivi lahí.”
