ʻUluaki Kolinitō 1:1-31
1 Ko au Paula, naʻe ui ke hoko ko ha ʻapositolo+ ʻa Kalaisi Sīsū fakafou ʻi he finangalo ʻo e ʻOtuá, pea mo Sositene ko hotau tokouá,
2 ko e tohi atu ki he fakatahaʻanga ʻa e ʻOtuá ʻa ia ʻoku ʻi Kolinitoó,+ kiate kimoutolu kuo fakatoputapuʻi ʻo fāʻūtaha mo Kalaisi Sīsuú,+ ʻa ia kuo ui ke hoko ko e kakai tapu, fakataha mo kinautolu kotoa ʻi he feituʻu kotoa pē ʻa ia ʻoku nau ui ki he huafa ʻo hotau ʻEiki ko Sīsū Kalaisí,+ ʻa ia ko honau ʻEiki pea ko hotau ʻEiki:
3 Fakatauange ke mou maʻu ʻa e ʻofa maʻataʻatā mo e melino mei he ʻOtuá ko ʻetau Tamaí pea mo e ʻEiki ko Sīsū Kalaisí.
4 ʻOku ou fakamālō maʻu pē ki hoku ʻOtuá fekauʻaki mo kimoutolu ʻi he vakai atu ki he ʻofa maʻataʻatā ʻa e ʻOtuá ʻa ia kuo foaki kiate kimoutolu ʻia Kalaisi Sīsuú;
5 koeʻuhi ʻoku mou fāʻūtaha mo Kalaisi, ʻoku mou maʻu ʻa e meʻa kotoa pē ʻo kau ai ʻa e malava ke talaki lelei ʻa e folofola ʻa e ʻOtuá mo ʻilo lelei ki ai,+
6 ʻo hangē tofu pē ko hoʻomou hoko ʻo tuʻumaʻu ʻi he fakamoʻoni fekauʻaki mo e Kalaisí,+
7 koeʻuhí ke ʻoua naʻa mou teitei masiva ʻi ha meʻaʻofa ʻe taha, lolotonga ia hoʻomou tatali vēkeveke atu ki he fakahā mai ʻa hotau ʻEiki ko Sīsū Kalaisí.+
8 Te ne toe ʻai foki kimoutolu ke mou tuʻu maʻu ʻo aʻu ki he ngataʻangá koeʻuhi ke ʻoua naʻa teitei ʻi ai ha meʻa ʻe ala tukuakiʻi ai kimoutolu ʻi he ʻaho ʻo hotau ʻEiki ko Sīsū Kalaisí.+
9 Ko e ʻOtuá ʻoku faitōnunga,+ ʻa ia ko ia naʻá ne ui kimoutolu ke mou kaungāfeohi* mo hono ʻAló, ʻa Sīsū Kalaisi ko hotau ʻEikí.
10 ʻOku ou enginaki atu leva kiate kimoutolu, fanga tokoua, fakafou ʻi he huafa ʻo hotau ʻEiki ko Sīsū Kalaisí, ʻoku totonu ke mou lea loto-taha kotoa pē pea ʻoku totonu ke ʻoua naʻa ʻi ai ha ngaahi māvahevahe ʻi homou lotolotongá,+ ka ke mou hoko ʻo fāʻūtaha kakato ʻi he ʻatamai tatau mo e fakakaukau tatau.+
11 He ko e niʻihi mei he fale ʻo Koloí kuo nau fakahā mai ha meʻa kiate au ʻo kau kiate kimoutolu, ʻe hoku fanga tokoua, ʻo pehē ʻoku ʻi ai ha ngaahi felotokehekeheʻaki ʻi homou lotolotongá.
12 ʻOku ou leaʻaki ení koeʻuhi ʻoku pehē ʻe he niʻihi ʻo kimoutolu: “ʻOku ʻo Paula au,” ʻoku pehē ʻe he niʻihi: “ʻOku ʻo ʻApolosi au,”+ ʻoku pehē ʻe he niʻihi ia: “ʻOku ʻo Kīfasi* au,” pea ʻoku pehē ʻe he niʻihi ia, “ʻOku ʻo Kalaisi au.”
13 ʻOku māvahevahe ʻa e Kalaisí? Naʻe ʻikai ke tautau ʻa Paula ʻi he ʻakaú maʻamoutolu, ʻikai ko ia? Pe naʻa mou papitaiso koā ʻi he hingoa ʻo Paulá?
14 ʻOku ou fakamālō ki he ʻOtuá naʻe ʻikai te u papitaiso ha taha ʻo kimoutolu tuku kehe pē ʻa Kalisipō+ mo Keio,+
15 koeʻuhí ke ʻoua naʻa pehē ʻe ha taha naʻa mou papitaiso ʻi hoku hingoá.
16 ʻIo, naʻá ku toe papitaiso foki ʻa e faʻahinga ʻi he fale ʻo Setivená.+ Pea ko hono toé, ʻoku ʻikai te u ʻilo pe naʻá ku toe papitaiso ha taha.
17 He naʻe fekau au ʻe Kalaisí, ʻo ʻikai ki he faipapitaiso, ka ke talaki ʻa e ongoongo leleí;+ ʻo ʻikai faiʻaki ha poto ʻi he leá,* koeʻuhi ke ʻoua naʻa hoko ʻa e ʻakau fakamamahi* ʻo e Kalaisí ʻo ʻikai hano ʻaonga.
18 Ko e moʻoni ko e pōpoaki fekauʻaki mo e ʻakau fakamamahí* ko e koto vale ia ki he faʻahinga ʻe fakaʻauhá,+ ka kiate kitautolu kuo fakahaofí, ko e mālohi ia ʻo e ʻOtuá.+
19 He kuo tohi: “Te u ʻai ʻa e poto ʻo e kau tangata potó ke ʻauha, pea ko e ʻatamaiʻia ʻa e kau tangata ʻatamaiʻiá te u talitekeʻi.”*+
20 Ko fē ʻa e tangata potó? Ko fē ʻa e sikalaipé?* Ko fē ʻa e tokotaha fakakikihi ʻo e fokotuʻutuʻu ko ení?* ʻIkai kuo ʻai ʻe he ʻOtuá ʻa e poto ʻo e māmaní ko e vale?
21 He ko e kakai ʻo e māmaní, koeʻuhi ko ʻenau falala ki honau potó,+ ʻoku ʻikai ai te nau ʻilo ʻa e ʻOtuá.+ Ko e meʻa ʻoku tau malangaʻakí ko e koto taʻeʻaonga ia ki he niʻihi kehé, kae fakafou ʻi he pōpoaki ko iá kuo fili ai ʻe he ʻOtuá ke fakahaofi ʻa e faʻahinga ʻoku tuí.+ ʻI he foungá ni kuo fakahaaʻi ai ʻa e poto ʻo e ʻOtuá.
22 He ʻoku kole ʻa e kau Siú ki ha ngaahi fakaʻilonga+ pea ʻoku kumi ʻa e kau Kalisí ki ha poto;
23 ka ʻoku tau malangaʻi naʻe tautau ʻa Kalaisi ʻi he ʻakaú, ʻa ia ko ha tūkiaʻanga ia ki he kau Siú, ka ko e koto vale ia ki he ngaahi puleʻangá.+
24 Kae kehe, ki he faʻahinga kuo uí, fakatouʻosi ʻa e kau Siú mo e kau Kalisí, ko Kalaisí ko e mālohi ia ʻo e ʻOtuá pea mo e poto ʻo e ʻOtuá.+
25 Ko e ngaahi meʻa mei he ʻOtuá ʻoku lau ʻe he tangatá ko e koto valé ʻoku poto ange ia ʻi he tangatá, pea ko e ngaahi meʻa mei he ʻOtuá ʻoku lau ʻe he tangatá ʻoku vaivaí ʻoku mālohi ange ia ʻi he tangatá.+
26 He ʻoku mou sio ki heʻene ui kimoutolú, fanga tokoua, ʻoku ʻikai tokolahi ʻa e faʻahinga ʻoku poto ʻi he tuʻunga fakaekakanó,*+ ʻoku ʻikai tokolahi ʻa e faʻahinga ʻoku mālohí, ʻoku ʻikai tokolahi ʻa e faʻahinga ʻoku tupuʻi-ʻeikí,*+
27 ka naʻe fili ʻe he ʻOtuá ʻa e ngaahi meʻa ʻo e māmaní ʻoku hā ko e valé ke fakamaaʻi ʻa e kau tangata potó; pea naʻe fili ʻe he ʻOtuá ʻa e ngaahi meʻa ʻo e māmaní ʻoku hā vaivaí ke fakamaaʻi ʻa e ngaahi meʻa ʻoku mālohí;+
28 pea naʻe fili ʻe he ʻOtuá ʻa e ngaahi meʻa ʻikai mahuʻinga ʻo e māmaní pea mo e ngaahi meʻa ʻoku fai ʻa e siolalo ki aí, ʻa e ngaahi meʻa ʻoku lau ko e koto noá, ke ʻai ke hā ko e koto noa ʻa e ngaahi meʻa ʻoku lau ʻoku mahuʻingá,+
29 koeʻuhi ke ʻoua naʻa pōlepole ha taha* ʻi he vakai mai ʻa e ʻOtuá.
30 Ka koeʻuhí ko e ʻOtuá ʻoku mou fāʻūtaha ai mo Kalaisi Sīsuú, ʻa ia kuó ne fakaeʻa mai kiate kitautolu ʻa e poto ʻo e ʻOtuá pehē foki ki heʻetau maʻu ʻa e tuʻunga māʻoniʻoní,+ ko e tuʻunga toputapú+ pea mo hotau fakatauʻatāina fakafou ʻi he huhuʻí,+
31 koeʻuhi ke hangē tofu pē ko ia kuo tohí: “Ko e tokotaha ʻoku pōlepolé, tuku ke ne pōlepole ʻia Sihova.”*+
Fakamatala ‘i Lalo
^ Pe “kau fakataha.”
^ ʻOku toe ui foki ko Pita.
^ Pe “ha pōtoʻi lea.”
^ Sio ki he Lea mo Hono ʻUhinga.
^ Sio ki he Lea mo Hono ʻUhinga.
^ Pe “taʻetokaʻi.”
^ ʻA ia, ko ha mataotao ʻi he Laó.
^ Pe “kuonga ko ení.” Sio ki he Lea mo Hono ʻUhinga.
^ Pe “ʻi he ngaahi tuʻunga fakaetangatá.”
^ Pe “ʻoku tupu mei he ngaahi fāmili māʻolungá.”
^ Fakafoʻilea, “kakano.”
^ Sio ki he Fakamatala Fakalahi A5.
