ʻUluaki Kolinitō 10:1-33
10 Ko ia ʻoku ou loto ke mou ʻilo, fanga tokoua, ko ʻetau fanga kuí naʻa nau ʻi he malumalu kotoa ʻo e konga ʻaó+ pea naʻa nau fou kotoa atu ʻi he tahí+
2 ʻo nau papitaiso kotoa pē lolotonga ʻenau muimui ʻia Mōsese ʻi he malumalu ʻo e konga ʻaó pea ʻi he tahí,
3 pea naʻa nau kai kotoa pē ʻa e meʻakai fakalaumālie tatau+
4 pea naʻa nau inu kotoa pē ʻa e inu fakalaumālie tatau.+ He naʻa nau faʻa inu mei he maka fakalaumālie ko ia naʻe ʻalu holo mo kinautolú, pea ko e maka ko iá ʻoku ʻuhinga iá ki he Kalaisí.+
5 Ka neongo ia, naʻe ʻikai ke hōifua ʻa e ʻOtuá ki he tokolahi taha ʻo kinautolu, he naʻe taaʻi kinautolu ʻi he toafá.+
6 Ko ia naʻe hoko ʻa e ngaahi meʻá ni ko ha ngaahi fakatātā kiate kitautolu, koeʻuhi ke ʻoua te tau holi ki he ngaahi meʻa ʻoku koví, hangē ko ia naʻa nau holi ki aí.+
7 Pea ʻoua ʻe hoko ko ha kau tauhi ʻaitoli, ʻo hangē ko ia naʻe fai ʻe he niʻihi ʻo kinautolú; hangē tofu pē ko ia kuo tohí: “Naʻe tangutu hifo ʻa e kakaí ke nau kai mo inu. Pea naʻa nau tuʻu hake leva ke fakafiefia.”+
8 Pea ʻoua naʻa tau tōʻongaʻaki ʻa e fehokotaki fakasino taʻetāú,* ʻo hangē ko ia ko e fehokotaki fakasino taʻetaau* naʻe fai ʻe he niʻihi ʻo kinautolu, ʻo tō ai ʻa e toko 23,000 ʻo kinautolu ʻi he ʻaho pē ʻe taha.+
9 Pea ʻoua naʻa tau ʻahiʻahiʻi ʻa Sihova,* ʻo hangē ko hono ʻahiʻahiʻi+ ia ʻe he niʻihi ʻo kinautolu, ʻo fakaʻauha ai kinautolu ʻe he fanga ngatá.+
10 Pea ʻoua ʻe hoko ko ha kau lāunga, ʻo hangē ko e niʻihi ʻo kinautolu naʻe lāungá,+ ʻo fakaʻauha ai kinautolu ʻe he tokotaha faifakaʻauhá.*+
11 Ko e ngaahi meʻa naʻe hoko kiate kinautolú naʻe tohi ia ko hotau fakahinohino,+ koeʻuhi ko e faʻahinga ko ia ʻo kitautolu ʻoku moʻui ʻi he ngataʻanga ʻo e fokotuʻutuʻu ko ení ke ʻoua naʻa tau hangē ko kinautolú.
12 Ko ia tuku ki he tokotaha ʻokú ne fakakaukau ʻokú ne tuʻú ke ne tokanga telia naʻá ne tō.+
13 ʻOku ʻikai ha ʻahiʻahi kuo hoko mai kiate kimoutolu tuku kehe pē ʻa ia ʻoku anga-maheni ki ai ʻa e tangatá.+ Ka ko e ʻOtuá ʻoku faitōnunga, pea ʻe ʻikai te ne tuku ke ʻahiʻahiʻi kimoutolu ʻo fakalaka atu ia ʻi he meʻa ʻoku malava ke mou kātekiná,+ kae fakataha mo e ʻahiʻahí te ne ʻai foki mo ha haoʻanga koeʻuhi ke mou malava ai ke kātakiʻi ia.+
14 Ko ia ai, siʻoku ngaahi ʻofaʻanga, hola mei he tauhi ʻaitolí.+
15 Ko e kau tangata ʻiloʻilo kimoutolu, ko ia mou fili pe ko e meʻa ʻoku ou leaʻakí ʻoku tonu pe ʻikai.
16 Ko e ipu ʻo e tāpuakí ʻa ia ʻoku tau tāpuakiʻí, ʻikai ko ha kaungāʻinasi ia ʻi he taʻataʻa ʻo e Kalaisí?+ Ko e mā ʻa ia ʻoku tau pakipakí, ʻikai ko ha kaungāʻinasi ia ʻi he sino ʻo e Kalaisí?+
17 Koeʻuhi ʻoku taha pē ʻa e maá, ko kitautolú, neongo ʻetau tokolahí, ʻoku tau sino pē taha,+ he ʻoku tau maʻu ʻinasi kotoa ʻi he mā pē ʻe taha ko iá.
18 Fakakaukau atu ki he kau ʻIsilelí. ʻI heʻenau kai ʻa e feilaulau naʻe ʻoatu ʻi he ʻōlitá, ʻikai naʻe hangē ia naʻa nau kai fakataha mo e ʻOtuá?+
19 ʻI hono leaʻaki ení, ʻoku ou ʻuhingá: ʻOku mahuʻinga ʻa e ʻaitolí pea mo e ngaahi meʻa ʻoku feilaulauʻaki ki he ʻaitolí?
20 ʻIkai; ka ʻoku ou pehē ko e meʻa ko ia ʻoku feilaulauʻaki ʻe he ngaahi puleʻangá, ʻoku nau feilaulauʻaki ki he fanga tēmeniō ʻo ʻikai ki he ʻOtuá;+ pea ʻoku ʻikai te u loto ke mou hoko ʻo kaungāʻinasi mo e fanga tēmenioó.+
21 Heʻikai malava ke mou inu ʻi he ipu ʻa Sihová* pea mo e ipu ʻa e fanga tēmenioó; heʻikai malava ke mou kai ʻi he “tēpile ʻa Sihová”*+ pea mo e tēpile ʻa e fanga tēmenioó.
22 Pe ‘ʻoku tau langaʻi koā ʻa Sihova* ke fuaʻa’?+ ʻOku ʻikai ke tau mālohi ange ʻiate ia, ʻikai ko ia?
23 ʻOku ngofua* ʻa e ngaahi meʻa kotoa pē, ka ʻoku ʻikai ke ʻaonga ʻa e ngaahi meʻa kotoa pē. ʻOku ngofua ʻa e ngaahi meʻa kotoa pē, ka ʻoku ʻikai ke fakatupu langa hake ʻa e ngaahi meʻa kotoa pē.+
24 Tuku ki he tokotaha taki taha ke ne hanganaki kumi, ʻo ʻikai ki he lelei pē ʻaʻaná, ka ki he lelei ʻa e tokotaha kehé.+
25 Kai ha meʻa pē ʻoku fakatau atu ʻi ha fakatauʻanga kakanoʻi-manu, ʻo ʻoua ʻe toe fai ha fakaʻekeʻeke koeʻuhi ko homou konisēnisí,
26 he “ʻoku ʻa Sihova* ʻa e māmaní mo e meʻa kotoa ʻoku ʻi aí.”+
27 Kapau ʻe fakaafeʻi kimoutolu ʻe ha tokotaha taʻetui pea ʻoku mou loto ke mou ʻalu ki ai, kai ha meʻa pē ʻoku tuku atu kiate kimoutolu, ʻo ʻoua ʻe toe fai ha fakaʻekeʻeke telia homou konisēnisí.
28 Ka ʻo ka pehē atu ʻe ha taha kiate kimoutolu: “Ko e meʻa eni ia naʻe feilaulauʻaki ki ha ngaahi ʻaitoli,” ʻoua ʻe kai koeʻuhi ko e tokotaha naʻá ne tala atu iá pea koeʻuhi ko e konisēnisí.+
29 ʻOku ʻikai te u ʻuhingá ki ho konisēnisi ʻoʻoú, ka ki he konisēnisi ʻo e tokotaha kehé. He ko e hā ke fakamāuʻi ai ʻeku tauʻatāiná ʻaki ʻa e konisēnisi ʻo ha taha kehe?+
30 Neongo kapau ʻoku ou kai mo fakafetaʻi ki he ʻOtuá ki he meʻakaí, ʻoku totonu ke u kai ia kapau ʻoku ʻai ai ʻa e niʻihi kehé ke nau fakaangaʻi au?+
31 Ko ia ai, pe ko hoʻomou kai pe inu pe ko hono fai ha faʻahinga meʻa pē, fai ʻa e ngaahi meʻa kotoa pē maʻá e lāngilangi ʻo e ʻOtuá.+
32 Hanganaki fakaʻehiʻehi mei he hoko ko ha ngaahi fakatūkiaʻanga ki he kau Siú pea pehē ki he kau Kalisí pea ki he fakatahaʻanga ʻa e ʻOtuá,+
33 ʻo hangē tofu pē ko ʻeku feinga ke fakafiemālieʻi ʻa e kakai kotoa pē ʻi he ngaahi meʻa kotoa pē, ʻo ʻikai te u kumi ki ha lelei pē maʻaku,+ ka ki he lelei ʻa e tokolahí, koeʻuhi ke fakahaofi ai kinautolu.+
Fakamatala ‘i Lalo
^ Sio ki he Lea mo Hono ʻUhinga.
^ Sio ki he Lea mo Hono ʻUhinga.
^ Sio ki he Fakamatala Fakalahi A5.
^ ʻOku ʻuhinga nai ki he ʻāngelo ʻa e ʻOtuá.
^ Sio ki he Fakamatala Fakalahi A5.
^ Sio ki he Fakamatala Fakalahi A5.
^ Sio ki he Fakamatala Fakalahi A5.
^ Pe “ʻatā.”
^ Sio ki he Fakamatala Fakalahi A5.
