ʻUluaki Kolinitō 4:1-21
4 ʻOku totonu ke lau ʻe ha tangata kimautolu ko e kau sevāniti ʻa Kalaisi mo e kau tamaioʻeiki kuo tuku ki ai ke nau tokangaʻi ʻa e ngaahi fakalilolilo toputapu ʻa e ʻOtuá.+
2 ʻI he meʻá ni, ko e meʻa ʻoku ʻamanekina mei he kau tamaioʻeikí ke nau faitōnunga.
3 Pea kiate aú ʻoku ʻikai ke fuʻu mahuʻinga ia pe te mou sivisiviʻi au pe ko e fai ʻe ha fakamaauʻanga fakaetangata. Ko hono moʻoní, ʻoku ʻikai te u teitei sivisiviʻi au.
4 He ʻoku ʻikai te u lāuʻilo ki ha meʻa ʻoku hala ʻiate au. Ka ʻi he meʻá ni ʻoku ʻikai ke fakamoʻoniʻi kuó u māʻoniʻoni; ko e tokotaha ʻokú ne sivisiviʻi aú ko Sihova.*+
5 Ko ia ai, ʻoua ʻe fakamāuʻi+ ha meʻa ki muʻa ʻi hono taimi totonú, kae ʻoua ke toki haʻu ʻa e ʻEikí. Te ne ʻomi ʻa e ngaahi meʻa fufū ʻo e fakapoʻulí ki he māmá pea ʻai ke ʻilo ʻa e ngaahi taumuʻa ʻo e lotó, pea ko e tokotaha taki taha leva te ne maʻu hono fakahīkihikí mei he ʻOtuá.+
6 Ko eni, fanga tokoua, ko e ngaahi meʻa ko eni naʻá ku leaʻakí, ʻoku ou hoko ai mo ʻApolosi+ ko e ongo faʻifaʻitakiʻanga ia ki haʻamou lelei, koeʻuhi ke mou ako ai ʻa e tuʻutuʻuni ko ení: “Mou fai pē ki he ngaahi meʻa kuo tohí.” ʻI hono fai ení heʻikai te mou hoko ai ʻo hīkisia+ pea ʻe ʻikai te mou filifilimānako ai pe siolalo ki ha taha.
7 He ko hai ia ʻokú ne ʻai koe ke ke kehe mei he tokotaha ʻe tahá? Ko hono moʻoní, ko e hā ha meʻa ʻokú ke maʻu naʻe ʻikai ko e maʻu ʻi he foaki atu?+ Kapau leva ko hono moʻoní naʻe foaki atu ia, ko e hā ʻokú ke pōlepole ai ʻo hangē naʻe ʻikai te ke maʻu ia ʻi hano foaki atú?
8 Kuo mou ʻosi mākona koā? Kuo mou ʻosi koloaʻia koā? Kuo mou ʻosi kamata pule koā ko e ngaahi tuʻi+ ʻo taʻekau ai kimautolu? ʻOku ou fakaʻamu moʻoni kuo mou ʻosi kamata pule ko e ngaahi tuʻi, koeʻuhi ke mau lava foki ai ʻo pule fakataha mo kimoutolu ko e ngaahi tuʻi.+
9 He ʻoku hā mai kiate au kuo tuku ʻe he ʻOtuá ʻa kimautolu kau ʻapositoló ke mau hoko ko e tā-tuku ia ʻo e fakaʻaliʻalí ʻi he tuʻunga ko ha kau tangata kuo fakahalaia ki he maté,+ koeʻuhi he kuo mau hoko ko ha mamataʻanga ki he māmaní,+ pea ki he kau ʻāngeló pea ki he tangatá.
10 ʻOku lau kimautolu+ ko e kau vale koeʻuhi ko Kalaisi, ka ʻoku lau kimoutolu ʻoku mou fakapotopoto koeʻuhi ko Kalaisi; ʻoku mau vaivai, ka ʻoku mou mālohi kimoutolu; ʻoku fakaʻapaʻapaʻi kimoutolu, ka ʻoku taʻefakaʻapaʻapaʻi kimautolu.
11 ʻOku aʻu mai ki he houa tonu ko ení mo e kei hokohoko atu pē ʻemau fiekaiá+ mo e fieinuá+ pea mo e masiva kofú* pea mo hono hahá*+ pea mo e ʻikai ha ʻapí
12 pea mo e fakaongosiá, ʻo mau ngāueʻaki homau ongo nimá.+ ʻI hono leakoviá, ʻoku mau taliʻaki ha lea lelei;+ ʻi hono fakatangaʻí, ʻoku mau kātekina pē;+
13 ʻi hono lauʻikovi loí, ʻoku mau tali anga-malū;*+ kuo mau hoko ko e veve ʻo e māmaní, ko e kinohaʻa ʻo e meʻa kotoa pē, ʻo aʻu mai ki he taimí ni.
14 ʻOku ou tohi atu ʻa e ngaahi meʻá ni, ʻo ʻikai ko e ʻai ke fakamaaʻi kimoutolu, ka ke enginaki atu kiate kimoutolu ʻi he tuʻunga ko ʻeku fānau ʻofeina.
15 He neongo ʻoku mou maʻu nai ha kau faiako ʻe toko 10,000 ʻoku nau akoʻi atu ʻa e founga ke muimui ai ʻia Kalaisí, ka ʻoku ʻikai te mou maʻu ha ngaahi tamai tokolahi. Koeʻuhi ko e fāʻūtaha mo Kalaisi Sīsuú, kuó u hoko ai ko hoʻomou tamai ʻaki hono akoʻi kiate kimoutolu ʻa e ongoongo leleí.+
16 Ko ia ai, ʻoku ou enginaki atu kiate kimoutolu, ke mou hoko ko e kau faʻifaʻitaki kiate au.+
17 Ko hono ʻuhinga ia ʻoku ou fekau atu ai ʻa Tīmote kiate kimoutolú, koeʻuhi ko hoku foha ʻofeina mo faitōnunga ia ʻi he ʻEikí. Te ne fakamanatu atu kiate kimoutolu ʻa ʻeku ngaahi foungá* ʻi he felāveʻi mo Kalaisi Sīsuú,+ hangē tofu pē ko ia ʻoku ou faiakoʻaki ʻi he feituʻu kotoa pē ʻi he fakatahaʻanga kotoa pē.
18 Ko e niʻihi ʻoku nau fakafuofuolahi ʻi he hīkisiá, ʻo hangē ia heʻikai te u ʻalu atu kiate kimoutolú.
19 Kapau ko e finangalo ia ʻo Sihová* ʻe vavé ni ʻeku ʻalu atú. ʻOku ou loto ke sio ki he kau hīkisiá, ʻo ʻikai ko e ʻai ke u ʻilo ki heʻenau leá, ka ke ʻilo pe ʻoku nau maʻu ʻa e mālohi ʻo e ʻOtuá pe ʻikai.
20 He ko e Puleʻanga ʻo e ʻOtuá ʻoku ʻikai fakahāhaaʻi ia ʻaki ʻa e lea, ka ko e mālohi ʻo e ʻOtuá.
21 Ko fē ʻoku mou saiʻia ange aí? Te u ʻalu atu kiate kimoutolu mo ha vaʻakau+ pe ko e ʻofa mo e laumālie anga-malū?
Fakamatala ‘i Lalo
^ Sio ki he Fakamatala Fakalahi A5.
^ Pe “ngaohikoviá.”
^ Fakafoʻilea, “telefuá.”
^ Fakafoʻilea, “kōlenga.”
^ Fakafoʻilea, “hoku ngaahi ʻalungá.”
^ Sio ki he Fakamatala Fakalahi A5.
