ʻUluaki Kolinitō 7:1-40
7 Pea ʻi he fekauʻaki mo e ngaahi meʻa ʻa ia naʻa mou tohi mai ʻo kau ki aí, ʻoku lelei ange ki ha tangata ke ʻoua te ne ala* ki ha fefine;
2 ka koeʻuhi ko e hulutuʻa ʻa e fehokotaki fakasino taʻetāú,* tuku ki he tangata taki taha ke ne maʻu hono uaifi pē ʻoʻona pea ki he fefine+ taki taha ke ne maʻu hono husepāniti pē ʻoʻona.+
3 Tuku ki he husepānití ke ne fai ki hono uaifí ʻa e meʻa totonu ʻoku fiemaʻu* ʻe hono uaifí, pea tuku ki he uaifí ke ne fai pehē foki ki hono husepānití.+
4 Ko e uaifí ʻoku ʻikai te ne maʻu ʻa e mafai ke pule ki hono sino ʻoʻoná, ka ʻoku maʻu ia ʻe hono husepānití; pehē pē foki, ko e husepānití ʻoku ʻikai te ne maʻu ʻa e mafai ke pule ki hono sino ʻoʻoná, ka ʻoku maʻu ia ʻe hono uaifí.
5 ʻOua ʻe fetaʻofiʻaki tuku kehe pē ʻi ha felotoi ki ai ki ha taimi kuo vaheʻi, ke mo lava ai ʻo līʻoa ha taimi ki hono fai ʻo e lotú pea ke mo toe fakataha mai, koeʻuhi ke ʻoua naʻa kei ʻahiʻahiʻi ai pē ʻe Sētane kimoua ʻi he ʻikai te mo maʻu ʻa e mapuleʻi-kitá.
6 Kae kehe, ʻoku ou leaʻaki ení ko ha meʻa ʻe ala fai, ka ʻoku ʻikai ko ha tuʻutuʻuni.
7 Ka ʻoku ou fakaʻamu ne hangē ʻa e tangata kotoa pē ko aú. Neongo ia, ʻoku maʻu ʻe he tokotaha taki taha ʻene meʻaʻofa pē ʻaʻana+ mei he ʻOtuá, ko e taha ke pehē, pea ko e taha ke pehē.
8 ʻOku ou lea eni ki he faʻahinga ʻoku teʻeki ai ke nau malí pea ki he kau uitoú ʻoku lelei ange kiate kinautolu kapau te nau nofo ai pē ʻo hangē ko aú.+
9 Ka ʻo kapau ʻoku ʻikai te nau maʻu ʻa e mapuleʻi-kitá, tuku ke nau mali, he ʻoku lelei ange ke mali ʻi ha vela ʻi he holí.+
10 Ki he kakai ʻosi malí ʻoku ou ʻoatu ki ai ha ngaahi fakahinohino, ʻo ʻikai ko au ka ko e ʻEikí, ʻoku totonu ke ʻoua naʻa māvae ha uaifi mo hono husepānití.+
11 Ka ʻo kapau te ne māvae mo hono husepānití, tuku ke ne nofo taʻemali ai pē, pea ka hala aí ko haʻane fakalelei mo hono husepānití; pea ʻoku ʻikai totonu ke liʻaki ʻe ha husepāniti ʻa hono uaifí.+
12 Ka ki he niʻihi kehé ʻoku ou pehē ʻe au, ʻio, ʻe au, kae ʻikai ko e ʻEikí:+ Kapau ʻoku maʻu ʻe ha tokoua ha uaifi taʻetui pea ʻoku loto-lelei pē ʻa e uaifí ke ne nofo fakataha mo ia, tuku ke ʻoua te ne liʻaki hono uaifí;
13 pea kapau ʻoku maʻu ʻe ha fefine ha husepāniti taʻetui, pea ʻoku loto-lelei pē ʻa e husepānití ke ne nofo fakataha mo ia, tuku ke ʻoua te ne liʻaki hono husepānití.
14 He ko e husepāniti taʻetuí kuo fakatoputapuʻi ia koeʻuhi ko hono vahaʻangatae mo hono uaifí, pea ko e uaifi taʻetuí kuo fakatoputapuʻi ia koeʻuhi ko hono vahaʻangatae mo e husepāniti tuí; he ka ne ʻikai ia, ʻe taʻemaʻa ʻa hoʻomou fānaú, ka ko eni ʻoku nau māʻoniʻoni.
15 Ka ʻo kapau ʻoku fili ʻa e tokotaha taʻetuí ke mavahe,* tuku ke ne mavahe; ko ha tokoua pe ko ha tuofefine ʻoku ʻikai ke kei haʻisia ia ki he tuʻunga ko iá, ka kuo ui kimoutolu ʻe he ʻOtuá ki he melino.+
16 He ko koe uaifi, te ke ʻilo fēfē heʻikai te ke malava ʻo fakahaofi ho husepānití?+ Pe ko koe, husepāniti, te ke ʻilo fēfē heʻikai te ke malava ʻo fakahaofi ho uaifí?
17 Ka neongo ia, hangē tofu pē ko e tufakanga kuo foaki ʻe Sihova* ki he tokotaha taki taha, tuku ki he tokotaha taki taha ke ne ʻaʻeva ʻo hangē ko ia kuo ui ia ki ai ʻe he ʻOtuá.+ Pea ko ia ʻoku ou ʻoatu ʻa e fakahinohino ko ení ki he ngaahi fakatahaʻangá kotoa.
18 Naʻe ʻosi kamu ha tangata ʻi he taimi naʻe ui mai ai iá?+ Tuku ke ne ʻi he tuʻunga ai pē ko iá. Kuo ui mai ha tangata lolotonga ʻene taʻekamú? Tuku ke ʻoua naʻa kamu ia.+
19 Ko e kamú ʻoku ʻikai mahuʻinga ia, pea ko e taʻekamú ʻoku ʻikai mahuʻinga ia;+ ko e meʻa ʻoku mahuʻingá ko hono tauhi ʻa e ngaahi fekau ʻa e ʻOtuá.+
20 Pe ko e hā pē ʻa e tuʻunga ne ʻi ai ha taha ʻi hono uí, tuku ke ne nofo ai pē ai.+
21 Naʻe ui mai koé lolotonga hoʻo hoko ko ha tamaioʻeikí? ʻOua ʻe tuku ia ke ne fakahohaʻasi koe;+ ka ʻo kapau ʻe malava ke ke hoko ʻo tauʻatāina, puke leva ʻa e faingamālié.
22 He ko ha taha pē naʻe ui ʻi he ʻEikí lolotonga ia ko ha tamaioʻeiki iá ko e tangata tauʻatāina ia ʻa e ʻEikí;+ pehē foki ko ha taha pē naʻe ui lolotonga ia ko ha tangata tauʻatāina iá ko ha tamaioʻeiki ia ʻa Kalaisi.
23 Naʻe fakatau mai kimoutolu ʻaki ha totongi;+ tuku hoʻomou hoko ko e kau tamaioʻeiki ʻa e tangatá.
24 Pe ko e hā pē ʻa e tuʻunga ne ʻi ai ha taha ʻi hono uí, fanga tokoua, tuku ke ne nofo ai pē ai ʻi he ʻao ʻo e ʻOtuá.
25 ʻI he fekauʻaki leva mo e faʻahinga ʻoku kei nofo anga-maʻá,* ʻoku ʻikai te u maʻu ha fekau ki ai mei he ʻEikí, ka ʻoku ou ʻoatu ʻeku fakakaukaú+ ʻi he tuʻunga ko e tokotaha naʻe fakahā mai ki ai ʻe he ʻEikí ʻa e mēsí koeʻuhi ke u hoko ai ʻo faitōnunga.
26 Ko ia ai, ʻoku ou fakakaukau ʻoku lelei tahá ki ha tangata ke hoko atu ai pē ʻi he tuʻunga ʻokú ne ʻi aí koeʻuhi ʻoku tau ʻi he ngaahi taimi faingataʻa.
27 ʻOku haʻisia koe ki ha uaifi? Tuku e feinga ke ʻataʻatā mei aí.+ ʻOkú ke tauʻatāina mei ha uaifi? Tuku e feinga ke maʻu ha uaifí.
28 Ka neongo kapau naʻá ke mali, ʻoku ʻikai ko haʻo fakahoko ia ha angahala. Pea kapau naʻe mali ha tokotaha kei nofo anga-maʻa, ʻoku ʻikai ko ha fakahoko ia ʻe he tokotaha ko iá ha angahala. Kae kehe, ko e faʻahinga ʻoku malí ʻe ʻi ai ʻa e mamahi ʻi honau kakanó. Ka ʻoku ou feingá ke haofaki kimoutolu.
29 ʻIkai ko ia pē, ʻoku ou leaʻaki eni, fanga tokoua, ko e taimi ʻoku toé ʻoku tātāiʻi.+ Mei he taimí ni ʻo faai atu, tuku ki he faʻahinga ʻoku maʻu uaifí ke hangē kuo ʻikai te nau maʻu uaifí,
30 pea ko e faʻahinga ʻoku tangí ke hangē ko ha faʻahinga ʻoku ʻikai ke tangí, pea ko e faʻahinga ʻoku fiefiá ke hangē ko ha faʻahinga ʻoku ʻikai ke fiefiá, pea ko e faʻahinga ʻoku nau fai ʻa e fakatau maí ke hangē ko ha faʻahinga ʻoku ʻikai te nau maʻu iá,
31 pea ko e faʻahinga ʻoku nau ngāueʻaki ʻa e māmaní ke hangē ko ha faʻahinga ʻoku ʻikai te nau ngāueʻaki ke ʻosiki iá; he ʻoku feliuliuaki ʻa e tuʻunga ʻo e māmani ko ení.
32 Ko e moʻoni, ʻoku ou loto ke mou ʻataʻatā mei he loto-moʻuá. Ko e tangata taʻemalí ʻoku loto-moʻua ia ki he ngaahi meʻa ʻa e ʻEikí, pe ʻe anga-fēfē haʻane maʻu ʻa e hōifua ʻa e ʻEikí.
33 Ka ko e tangata malí ʻoku loto-moʻua ia ki he ngaahi meʻa ʻo e māmaní,+ pe ʻe anga-fēfē haʻane maʻu ʻa e hōhōʻia ʻa hono uaifí,
34 pea ʻoku māvahevahe ʻene fakakaukaú. Pehē foki, ko e fefine taʻemalí, pea pehē ki he fefine kei nofo anga-maʻá, ʻoku loto-moʻua ia ki he ngaahi meʻa ʻa e ʻEikí,+ ke ne hoko ai ʻo māʻoniʻoni fakatouʻosi ʻi hono sinó pea ʻi hono laumālié. Kae kehe, ko e fefine malí ʻoku loto-moʻua ia ki he ngaahi meʻa ʻo e māmaní, pe ʻe anga-fēfē haʻane maʻu ʻa e hōhōʻia ʻa hono husepānití.
35 Ka ʻoku ou leaʻaki ení ke hoko ia ko ha lelei fakafoʻituitui kiate kimoutolu, ʻo ʻikai ko haʻaku fakataputapui* kimoutolu, ka ke ueʻi kimoutolu ki he meʻa ko ia ʻoku totonú pea ke līʻoa maʻu pē ki he ʻEikí ʻo taʻeʻiai ha fakahohaʻa.
36 Ka ʻo kapau ʻoku ʻikai lava ke mapuleʻi ʻe ha taha ʻa ʻene holi fakaefehokotaki fakasinó,* pea kapau ʻokú ne mahili atu mei he tuʻunga ʻo e kei talavoú, ko e meʻa leva eni ʻoku totonu ke hokó: Tuku ke ne fai ʻa e meʻa ʻokú ne loto ki aí; ʻoku ʻikai te ne fai ai ha angahala. Tuku ke nau mali.+
37 Ka ʻo kapau ʻoku fakapapauʻi ʻe ha taha ʻi hono lotó pea ʻikai te ne ongoʻi ko ha fiemaʻu pau ia, ka ʻokú ne mapuleʻi ʻa e meʻa ʻokú ne loto ki aí pea kuó ne ʻosi fai ʻa e fili ʻi hono loto ʻoʻoná ke nofo taʻemali ai pē,* ʻe lelei ia kiate ia.+
38 Pehē foki, ʻilonga ʻa ia ʻoku malí* ʻoku lelei ia, kae ʻilonga ʻa ia ʻoku ʻikai te ne malí ʻe toe lelei ange ia.+
39 ʻOku haʻisia ha uaifi ʻi he kei moʻui ʻa hono husepānití.+ Ka ʻo kapau ʻe mohe ʻi he maté ʻa hono husepānití, ʻokú ne ʻataʻatā ke mali mo ha taha pē ʻokú ne loto ki aí, ʻi he ʻEikí pē.+
40 Ka ʻi he lau ʻaʻakú, ʻokú ne fiefia ange ʻo kapau te ne kei nofo ai pē ʻi he tuʻunga ʻokú ne ʻi aí; pea ʻoku ou tuipau foki ʻoku ou maʻu ʻa e laumālie ʻo e ʻOtuá.
Fakamatala ‘i Lalo
^ ʻA ia, ko e fehokotaki fakasino.
^ Ko e pulula ia ʻo e foʻi lea faka-Kalisi ko e por·neiʹa. Sio ki he Lea mo Hono ʻUhinga.
^ ʻA ia, ko hono fakahoko ʻa e ngaahi fiemaʻu fakaefehokotaki fakasinó.
^ Pe “māvae.”
^ Sio ki he Fakamatala Fakalahi A5.
^ Pe “faʻahinga kuo teʻeki ai ʻaupito ke nau malí.”
^ Fakafoʻilea, “noʻo fakapona.”
^ Fakafoʻilea, “kapau ʻokú ne fakakaukau ʻokú ne fai taʻetotonu ki hono tuʻunga kei nofo anga-maʻá.”
^ Pe “ke tauhi ai pē hono tuʻunga kei nofo anga-maʻá.”
^ Pe “ʻoku ne foaki atu hono tuʻunga kei nofo anga-maʻá ʻi he malí.”
