Ua Kolinitō 4:1-18
4 Ko ia ai, koeʻuhi ʻoku mau maʻu ʻa e ngāué ni fakafou ʻi he ʻaloʻofa* kuo fakahāhā mai kiate kimautolú, ʻoku ʻikai ai ke mau foʻi.
2 Ka kuo mau siʻaki ʻa e ngaahi meʻa fakamā mo fai fakafufuú, ʻo ʻikai ʻaʻeva ʻi he kākā pe ko hano huʻi ʻa e folofola ʻa e ʻOtuá;+ ka ʻi hono ʻai ke eʻa ʻa e moʻoní, ʻoku mau hoko ai ko e faʻifaʻitakiʻanga lelei ki he konisēnisi fakaetangata kotoa pē ʻi he ʻafio mai ʻa e ʻOtuá.+
3 Kapau ko hono moʻoní, ko e ongoongo lelei ʻoku mau talakí ʻoku fakapūlouʻi, ʻoku fakapūlouʻi ia ʻi he lotolotonga ʻo e faʻahinga ʻoku huʻu atu ki he ʻauhá,
4 ʻa ia kuo fakakuihi ʻi honau lotolotongá ʻe he ʻotua ʻo e fokotuʻutuʻu ko ení*+ ʻa e ʻatamai ʻo e kau taʻetuí,+ koeʻuhí ke ʻoua naʻa ulo mai kiate kinautolu ʻa e maama ʻo e ongoongo lelei lāngilangiʻia+ fekauʻaki mo e Kalaisí, ʻa ia ko e ʻīmisi ʻo e ʻOtuá.+
5 He ʻoku mau malanga, ʻo ʻikai fekauʻaki mo kimautolu tonu, kae fekauʻaki mo Sīsū Kalaisi ko e ʻEikí pea ko kimautolú ko hoʻomou kau tamaioʻeiki maʻa Sīsū.
6 He ko e ʻOtuá ʻa e tokotaha naʻá ne folofola: “Tuku ke ulo mai ʻa e māmá mei he fakapoʻulí,”+ pea kuó ne fakamaama homau lotó+ ʻaki ʻa e ʻilo lāngilangiʻia fekauʻaki mo ia fakafou ʻi he fofonga ʻo Kalaisí.
7 Kae kehe, ʻoku mau maʻu ʻa e koloá ni+ ʻi ha ngaahi ipu ʻumea,*+ koeʻuhi ke ʻa e ʻOtuá ai pē ʻa e mālohi ʻoku mahulu atu ia ʻi he tuʻunga anga-mahení ʻo ʻikai meiate kimautolu.+
8 ʻOku lōmia kimautolu ʻi he founga kotoa pē, ka ʻoku ʻikai te mau fihiatuʻu ʻo taʻelava ai ha ngaue takai holo; ʻoku mau hēhētuʻu, ka ʻoku ʻikai ʻaupito ke taʻeʻiai hamau haoʻanga;*+
9 ʻoku fakatangaʻi kimautolu, ka ʻoku ʻikai liʻekina;+ ʻoku lī kimautolu ki lalo, ka ʻoku ʻikai fakaʻauha.+
10 ʻOku mau kātakiʻi maʻu pē ʻi homau sinó ʻa e fehangahangai mo e maté ʻa ia naʻe faingataʻaʻia ai ʻa Sīsuú,+ ke mau maʻu ai ha moʻui ʻo hangē ko e moʻui ʻa Sīsuú.*
11 ʻI heʻemau moʻuí, ʻoku mau fehangahangai mata ki he mata maʻu ai pē mo e maté+ koeʻuhiā ko Sīsū, koeʻuhi ke hoko foki ai ʻo fakaeʻa ʻa e moʻui ʻa Sīsuú ʻi homau kakano matengofuá.
12 Ko ia ʻoku ngāue ʻa e maté ʻiate kimautolu, ka ko e moʻuí ʻiate kimoutolu.
13 Pea koeʻuhi ko ʻemau maʻu ʻa e laumālie tatau ʻo e tuí ʻo hangē ko ia kuo tohi: “Naʻá ku ngāueʻi ʻa e tuí, ko ia ai naʻá ku lea”;+ ʻoku mau ngāueʻi foki ʻa e tuí pea ko ia ai ʻoku mau lea,
14 ʻi hono ʻiloʻi ko e Tokotaha ko ē naʻá ne fokotuʻu hake ʻa Sīsuú te ne toe fokotuʻu hake foki kimautolu ʻo hangē tofu pē ko hono fokotuʻu hake ʻo Sīsuú pea te ne ʻoatu fakataha kimautolu mo kimoutolu.+
15 He ko e ngaahi meʻá ni kotoa ko e lelei pē maʻamoutolu, koeʻuhi ke hoko ai ʻa e ʻofa maʻataʻatā ʻa e ʻOtuá ʻo toe fakautuutu ange; ʻoku fakautuutu ia ʻi he taimi ʻoku fakahīkihiki ai ʻe he kakai tokolahi ange ʻa e ʻOtuá fakafou ʻi hono fai ʻa e fakafetaʻi kiate iá.+
16 Ko ia ai, ʻoku ʻikai te tau foʻi, ka neongo kapau ʻoku fakaʻaʻau ke mole atu hotau tangata ʻi tuʻá, ko e moʻoni ko hotau tangata ʻi lotó ʻoku fakafoʻou ia ʻi he ʻaho ki he ʻaho.
17 He neongo ko e mamahí* ʻoku fakataimi pē mo maʻamaʻa, ʻokú ne fakatupu mai ʻe ia maʻatautolu ha lāngilangi ʻa ia ʻoku mātuʻaki lahi* faufaua ange pea ʻoku taʻengata;+
18 lolotonga ia ʻetau hanganaki fakahangataha hotau matá, ʻo ʻikai ki he ngaahi meʻa ʻoku hā maí, ka ki he ngaahi meʻa ʻoku taʻehāmaí.+ He ko e ngaahi meʻa ʻoku hā maí ʻoku fakataimi pē, ka ko e ngaahi meʻa ʻoku taʻehāmaí ʻoku taʻengata.
Fakamatala ‘i Lalo
^ Pe “meesi.”
^ Pe “kuonga ko ení.” Sio ki he Lea mo Hono ʻUhinga.
^ Pe “ngaahi siā ʻumea.”
^ Pe ngalingali, “ka ʻoku ʻikai tuku ai pē ke siva ʻemau ʻamanakí.”
^ Fakafoʻilea, “ke fakaeʻa ʻa e moʻui ʻa Sīsuú ʻi homau sinó.”
^ Pe “ʻahiʻahí.”
^ Fakafoʻilea, “mamafa.”
