Palōveepi 14:1-35
14 Ko e fefine poto moʻoní ʻokú ne langa hake hono falé,+Ka ko e fefine valé ʻokú ne holoki hifo ia ʻaki hono nimá.
2 Ko e tokotaha ʻoku ʻaʻeva ʻi heʻene anga-tonú ʻokú ne manavahē kia Sihova,Ka ko e tokotaha ʻoku pikopiko ʻa hono ngaahi ʻalungá ʻokú ne taʻetokaʻi Ia.
3 Ko e vaʻakau ʻo e hīkisiá ʻoku ʻi he ngutu ʻo e valé,Ka ko e loungutu ʻo e kau potó te ne maluʻi kinautolu.
4 ʻI he ʻikai ke ʻi ai ha fanga pulú ʻoku maʻa ʻa e ʻaiʻanga kaí,Ka ko e mālohi ʻo ha pulu ʻoku maʻu ai ha fuʻu utu-taʻu lahi.
5 Ko ha fakamoʻoni falalaʻanga ʻe ʻikai te ne loi,Ka ko ha fakamoʻoni loi ʻokú ne loi ʻi heʻene mānava kotoa pē.+
6 ʻOku kumi ʻa e tokotaha manukí ki he potó pea ʻikai maʻu ha meʻa,Ka ʻoku maʻungofua ʻa e ʻiló ʻe he tokotaha ʻokú ne maʻu ʻa e mahinó.+
7 Fakamamaʻo mei he tangata valé,Koeʻuhi heʻikai te ke maʻu ha ʻilo ʻi hono loungutú.+
8 ʻI he potó ʻoku mahinoʻi ai ʻe he tangata fakapotopotó ʻa e hala ʻokú ne ʻalu aí,Ka ʻoku kākaaʻi ʻa e seselé ʻe heʻenau* valé.+
9 ʻOku fakakataʻaki ʻe he kau valé ʻa e faikoví,*+Ka ʻi he haʻohaʻonga ʻo e anga-tonú, ʻoku ʻi ai ha loto-lelei ki ha fakalelei.
10 ʻOku ʻilo ʻe he lotó ʻa ʻene mamahi ʻaʻaná,Pea ʻoku ʻikai ha taha mei tuʻa ʻe lava ke ʻinasi ʻi heʻene fiefiá.
11 Ko e fale ʻo e fulikivanú ʻe fakaʻauha,+Ka ko e tēniti ʻo e anga-tonú ʻe lakalakaimonū.
12 ʻOku ʻi ai ha hala ʻoku hā ngali totonu ki ha tangata,+Ka ʻi he ʻosi angé ʻoku iku atu ia ki he mate.+
13 Naʻa mo e lolotonga ʻa e katá ʻoku ongoʻi mamahi nai ʻa e lotó,Pea ʻe iku nai ʻa e fiefiá ki he mamahi.
14 Ko e tokotaha ʻoku taʻemapuleʻi hono lotó te ne utu ʻa e nunuʻa ʻo hono ngaahi ʻalungá,+Ka ko e tangata leleí te ne utu ʻa e pale ʻo ʻene ngaahi ngāué.+
15 Ko e tokotaha taʻefakapotopotó* ʻokú ne tui ki he lea kotoa pē,Ka ko e tokotaha fakapotopotó ʻokú ne fakakaukauʻi ʻene laka taki taha.+
16 Ko e tokotaha potó ʻoku tokanga pea afe mei he koví,Ka ko e tokotaha valé ʻoku taʻetokanga* pea falala tōtuʻa.
17 Ko e tokotaha ʻoku vave ki he ʻitá ʻokú ne fai ha meʻa ngalivale,+Ka ko e tangata ʻokú ne fakakaukauʻi ʻa e ngaahi meʻá* ʻoku fehiʻanekina.
18 Ko e tokotaha taʻefakapotopotó* ko hono tofiʻá ko e vale,Ka ko e kau fakapotopotó ʻoku nau kalauniʻaki ʻa e ʻiló.+
19 Ko e kakai koví kuo pau ke nau punou ʻi he ʻao ʻo e kau faileleí,Pea ko e kau fulikivanú te nau punou ʻi he ngaahi matapā ʻo e tokotaha māʻoniʻoní.
20 Ko e tangata masivá ʻoku fehiʻanekinaʻi ʻo aʻu pē ki hono fehiʻanekinaʻi ʻe hono ngaahi kaungāʻapí,+Ka ʻoku tokolahi ʻa e ngaahi kaumeʻa ʻo e tokotaha koloaʻiá.+
21 Ko e tokotaha ʻokú ne taʻetokaʻi ʻa hono kaungāʻapí ʻoku faiangahala,Ka ʻilonga ʻa ia ʻokú ne manavaʻofa ki he māʻulaló ʻokú ne fiefia.+
22 ʻIkai ʻe ʻalu hē ʻa e faʻahinga ʻoku nau faʻufaʻu ha koví?
Ka ko e faʻahinga ʻoku nōfoʻi ʻi hono fai ʻa e meʻa ʻoku leleí te nau maʻu ʻa e ʻofa mateaki mo e faitōnunga.+
23 ʻOku ʻaonga ʻa e faʻahinga kotoa pē ʻo e ngāue mālohí,Ka ʻoku iku ki he masiva ʻa e talanoa ʻataʻatā peé.+
24 Ko e kalauni ʻo e potó ʻa ʻenau koloá;Ka ko e vale ʻa e seselé ko e koto vale ai pē.+
25 Ko ha fakamoʻoni ʻoku moʻoni ʻoku fakahaofi ai ha ngaahi moʻui,Ka ko ha tokotaha kākā ʻokú ne loi ʻi heʻene mānava kotoa pē.
26 ʻOku ʻi ai ha loto-falala mālohi ʻi he manavahē kia Sihová,+Pea ʻe hoko ia ko ha hūfangaʻanga ki heʻene fānaú.+
27 Ko e manavahē kia Sihová ko ha matavai ia ʻo e moʻui,Ke fakahaofi ai ha taha mei he ngaahi tauhele ʻa maté.
28 Ko ha fuʻu kakai tokolahi ko e ngeia ia ʻo ha tuʻi,+Ka ko ha pule ʻoku ʻikai hano kakaí ko e lusa pē.
29 Ko e tokotaha ʻoku fakatuotuai ki he ʻitá ʻokú ne maʻu ha ʻiloʻilo lahi,+Ka ko e tokotaha taʻefaʻakātakí ʻokú ne fakahaaʻi atu ʻa ʻene valé.+
30 Ko ha loto ʻoku nonga ʻokú ne ʻoatu ʻa e moʻui ki he sinó,Ka ko e meheká ko e popoʻanga ia ʻo e ngaahi huí.+
31 Ko e tokotaha ʻokú ne kākaaʻi ʻa e tokotaha māʻulaló ʻokú ne fakalotomamahiʻi ʻa hono Tokotaha-Ngaohí,+Ka ʻilonga ʻa ia ʻokú ne manavaʻofa ki he masivá ʻokú ne fakalāngilangiʻi Ia.+
32 ʻE lī ki lalo ʻa e tokotaha fulikivanú ʻe heʻene kovi pē ʻaʻaná,Ka ʻe maʻu ʻe he tokotaha māʻoniʻoní hano hūfangaʻanga ʻi heʻene anga-tonú.+
33 ʻOku nofo nonga ʻa e potó ʻi he loto ʻo ha tokotaha ʻokú ne maʻu ʻa e mahinó,+Ka kuo pau ke fakaeʻa atu ia ʻe he seselé ʻi hono haʻohaʻongá.
34 ʻOku hakeakiʻi ʻe he māʻoniʻoní ha puleʻanga,+Ka ko ha meʻa fakamā ʻa e angahalá ki ha kakai.
35 ʻOku hōhōʻia ʻa e tuʻí ʻi ha sevāniti ʻokú ne ngāueʻaki ʻa e vavanga fakaefakakaukaú,+Ka ʻoku tō ʻene houhaú ki he tokotaha ʻoku tōʻonga fakamaá.+
Fakamatala ‘i Lalo
^ Pe ngalingali, “ʻoku kākaaʻi ʻe he seselé ʻa e niʻihi kehé ʻaki ʻenau.”
^ Pe “ʻa hono fai ha kole fakamolemolé.”
^ Pe “taʻetaukeí.”
^ Pe “anga-ʻaʻahu.”
^ Pe “tangata ʻokú ne ngāueʻaki ʻene malava fakaefakakaukaú.”
^ Pe “taʻetaukeí.”
