Sēnesi 37:1-36
37 Naʻe hokohoko atu ʻa e nofo ʻa Sēkope ʻi he fonua ko Kēnaní, ʻa ia naʻe nofo ai ko ha muli ʻa ʻene tamaí.+
2 Ko e hisitōlia eni ʻo Sēkopé.
ʻI he taimi naʻe taʻu 17 ai ʻa Siosifá,+ naʻe tokangaʻi ʻe he talavoú ni ʻa e tākangá+ mo e ongo tamaiki ʻa Pilaá+ mo e ongo tamaiki ʻa Silipá,+ ʻa e ongo uaifi ʻo ʻene tamaí. Pea naʻe ʻoatu ʻe Siosifa ha fakamatala kovi fekauʻaki mo kinautolu ki heʻenau tamaí.
3 Pea naʻe ʻofa ʻa ʻIsileli ʻia Siosifa ʻo lahi ange ia ʻi hono ngaahi foha kehé kotoa+ koeʻuhi ko e foha ia ʻi hono taʻumotuʻá, pea naʻá ne ngaohi maʻana ha kofu tōtōlofa makehe.*
4 ʻI he sio ʻa hono fanga tokouá ʻoku ʻofa lahi ange ʻiate ia ʻa ʻenau tamaí ʻi he kotoa ʻo kinautolú, naʻe kamata ke nau fehiʻa ʻiate ia, pea naʻe ʻikai malava ke nau lea lelei* kiate ia.
5 Ki mui ai, naʻe misi ʻa Siosifa peá ne tala ange ia ki hono fanga tokouá,+ pea naʻa nau toe maʻu ai ʻa e ʻuhinga lahi ange ke fehiʻa ʻiate ia.
6 Naʻá ne pehē ange kiate kinautolu: “Mou fanongo mai muʻa ki heʻeku misi ko ení.
7 Naʻe fai ʻetau haʻi uite ʻi he loto ngoué lolotonga ia naʻe mālanga hake ʻa ʻeku haʻingá ʻo tuʻu hangatonu pea naʻe takatakai ʻa hoʻomou ngaahi haʻingá ʻo punou hifo ki heʻeku haʻingá.”+
8 Naʻe pehē ange ʻe hono fanga tokouá kiate ia: “Te ke ʻai moʻoni koā koe ko e tuʻi kiate kimautolu pea puleʻi kimautolu?”+ Ko ia naʻa nau maʻu ai ha toe ʻuhinga ke fehiʻa ʻiate ia, koeʻuhi ko ʻene ngaahi misí mo e meʻa naʻá ne leaʻakí.
9 ʻI he hili iá, naʻe toe ʻi ai ʻene misi, pea naʻá ne fakamatalaʻi ia ki hono fanga tokouá: “Naʻe toe ʻi ai ʻeku misi ʻe taha. ʻI he taimi ko ení naʻe punou mai kiate au+ ʻa e laʻaá mo e māhiná mo e ngaahi foʻi fetuʻu ʻe 11.”
10 Naʻá ne fakamatalaʻi leva ia ki heʻene tamaí pea pehē ki hono fanga tokouá, pea naʻe valokiʻi ia ʻe heʻene tamaí ʻo ne pehē kiate ia: “Ko e hā ʻa e ʻuhinga ʻo hoʻo misi ko ení? Te u haʻu moʻoni koā au pea pehē ki hoʻo faʻeé mo ho fanga tokouá ʻo punou hifo ki he kelekelé kiate koe?”
11 Pea naʻe hoko ʻo loto-kovi ʻa hono fanga tokouá kiate ia,+ ka naʻe hanganaki fakakaukau ʻa ʻene tamaí ki he leá ni.
12 Pea naʻe ʻalu ʻa hono fanga tokouá ke fakakaikai ʻa e tākanga ʻenau tamaí ʻo ofi ki Sīkemi.+
13 Naʻe pehē ange ki mui ai ʻe ʻIsileli kia Siosifa: “Ko ho fanga tokouá ʻoku nau tokangaʻi ʻa e ngaahi tākangá ʻo ofi ki Sīkemi, ʻikai ko ia? Haʻu, pea tuku ke u fekauʻi atu koe kiate kinautolu.” ʻI he meʻá ni naʻá ne pehē kiate ia: “ʻOku ou maau!”
14 Ko ia naʻá ne pehē ange kiate ia: “Kātaki muʻa ʻo ʻalu ʻo vakai pe ʻoku sai pē ʻa ho fanga tokouá. Sio pe ʻoku fēfē ʻa e tākangá, pea tala mai kiate au.” ʻI he meʻa ko iá naʻá ne fekauʻi atu ia mei he teleʻa* ʻo Hepeloní,+ pea naʻá ne ʻalu atu ki Sīkemi.
15 Ki mui ai, naʻe ʻiloʻi ia ʻe ha tangata ʻi heʻene ʻalu fano holo ʻi he vaó. Naʻe ʻeke ange ʻe he tangatá kiate ia: “Ko e hā ʻokú ke kumí?”
16 ʻI he meʻá ni naʻá ne pehē ange: “Ko ʻeku kumi ʻa hoku fanga tokouá. Kātaki muʻa ʻo tala mai kiate au pe ʻoku nau tauhi ʻi fē ʻa e ngaahi tākangá?”
17 Naʻe hoko atu ʻa e tangatá: “Kuo nau mavahe mei heni, he naʻá ku fanongo ki heʻenau pehē, ‘Tau ō ki Tōtani.’” Ko ia naʻe muimui ʻa Siosifa ki hono fanga tokouá ʻo maʻu atu kinautolu ʻi Tōtani.
18 Pea naʻa nau fakatokangaʻi mai ia mei he mamaʻó, pea ki muʻa ke ne aʻu atu kiate kinautolú, naʻa nau kamata faʻufaʻu fekauʻaki mo ia ke tāmateʻi ia.
19 Ko ia naʻa nau fepehēʻaki: “Sio atu! Ko e tama misí+ ena ʻoku haʻú.
20 ʻĒ, tau tāmateʻi leva ia pea lī ia ki he taha ʻo e ngaahi lepá, pea te tau pehē naʻe keina ia ʻe ha manu fekai. Pea tuku angé ke tau sio pe ko e hā ʻe hoko ki heʻene ngaahi misí.”
21 ʻI he fanongo ʻa Lūpeni+ ki he meʻa ko ení, naʻá ne feinga ke fakahaofi ia meiate kinautolu. Ko ia naʻá ne pehē: “Ke ʻoua naʻa tau toʻo ʻene moʻuí.”+
22 Naʻe pehē ange ʻe Lūpeni kiate kinautolu: “ʻOua ʻe lingitotó.+ Lī ia ki he lepa ko eni ʻi he toafá, kae ʻoua ʻe fai ha kovi* kiate ia.”+ Ko ʻene taumuʻá ke fakahaofi ia meiate kinautolu koeʻuhi ke fakafoki ia ki heʻene tamaí.
23 Ko ia ʻi he haʻu pē ʻa Siosifa ki hono fanga tokouá, naʻa nau hae meia Siosifa ʻa hono kofú, ʻa e kofu makehe ko ia naʻá ne tuí,+
24 pea naʻa nau ʻave ia ʻo lī ki he lepá. ʻI he taimi ko iá naʻe maha ʻa e lepá; naʻe ʻikai ʻi ai ha vai.
25 Naʻa nau tangutu hifo leva ke kai. ʻI heʻenau hanga haké, naʻe ʻi ai ha fononga ko e kau ʻIsimeʻeli+ ko ʻenau haʻu mei Kiliati. Naʻe fakaheka ʻi heʻenau fanga kāmelí ʻa e puluʻi ʻakau namu-lelei, paʻame,* mo e kiliʻiʻakau ʻoku toʻi,+ pea ko ʻenau fononga hifo ki ʻIsipite.
26 ʻI he meʻá ni naʻe pehē ʻe Siuta ki hono fanga tokouá: “Ko e hā ha meʻa ʻe maʻu kapau naʻa tau tāmateʻi hotau tokouá pea fufū ʻa hono totó?+
27 ʻĒ, tau fakatau atu ia+ ki he kau ʻIsimeʻelí, pea ʻoua naʻa tau ala kiate ia. He ko ē, ko hotau tokoua ia, ko hotau kakano.” Ko ia naʻa nau fanongo ki honau tokouá.
28 Pea ʻi he taimi naʻe ʻalu hifo ai ʻa e kau mēsianiti Mitianí,+ naʻa nau ʻohake ʻa Siosifa mei he lepá ʻo fakatau atu ia ki he kau ʻIsimeʻelí ki he konga siliva ʻe 20.+ Naʻe ʻave ʻe he kau tangatá ni ʻa Siosifa ki ʻIsipite.
29 Ki mui ai, ʻi he foki atu ʻa Lūpeni ki he lepá ʻo ne sio naʻe ʻikai ke ʻi he lepá ʻa Siosifá, naʻá ne hae hono ngaahi kofú.
30 ʻI heʻene foki ki hono fanga tokouá, naʻá ne kalanga: “Kuo pulia ʻa e tamasiʻí! Pea ko au—ko e hā ʻa e meʻa te u faí?”
31 Ko ia naʻa nau ʻave ʻa e kofu ʻo Siosifá pea tāmateʻi ha kosi tangata ʻo unu ʻa e kofú ʻi he totó.
32 ʻI he hili iá, naʻa nau fai ha fekau ke ʻoatu ʻa e kofu makehé ki heʻenau tamaí mo pehē: “Ko e meʻa eni naʻa mau maʻú. Vakaiʻi ange muʻa pe ko e kofu nai eni ʻo ho fohá pe ʻikai.”+
33 Naʻá ne vakaiʻi leva ia peá ne kalanga: “Ko e kofu ia ʻo hoku fohá! ʻOku pau pē kuo keina ia ʻe ha manu fekai! Kuo haehae moʻoni ʻa Siosifa!”
34 ʻI he meʻa ko iá naʻe hae ʻe Sēkope ʻa hono ngaahi kofú pea ʻai tauangaʻa ʻi hono kongalotó ʻo ne tengihia ʻa hono fohá ʻi he ngaahi ʻaho lahi.
35 Pea ko e kotoa ʻo hono ngaahi fohá mo e kotoa ʻo hono ngaahi ʻofefiné naʻa nau hanganaki feinga ke fakafiemālieʻi ia, ka naʻá ne hanganaki fakafisi ke tali ʻa e fakafiemālié peá ne pehē: “Te u ʻalu hifo ki he Faʻitoká*+ ʻo tengihia hoku fohá!” Pea naʻe hokohoko atu ʻa e tangi ʻa ʻene tamaí koeʻuhi ko ia.
36 Pea naʻe fakatau atu ia ʻe he kau Mitianí ʻi ʻIsipite kia Pōtifa, ko ha ʻōfisa ʻo e lotoʻā ʻo Feló+ pea ko ia ʻa e pule kaʻaté.+
Fakamatala ‘i Lalo
^ Pe “kofu lōloa fakaʻofoʻofa.”
^ Fakafoʻilea, “ʻi he melino.”
^ Pe “talalo.”
^ Pe “ala ha nima.”
^ Sio ki he Lea mo Hono ʻUhinga.
^ Pe “ki Seoli,” ʻa ia, ko e faʻitoka anga-maheni ʻo e faʻahinga ʻo e tangatá. Sio ki he Lea mo Hono ʻUhinga.
