Hapakuke 2:1-20
2 Te u tuʻu ai pē+ ʻi hoku feituʻu leʻó,Pea te u ʻi hoku tuʻuʻangá ʻi he fakatafunga kelekelé.
Te u leʻo ai pē ke vakai pe ko e hā ʻa e meʻa ʻokú ne loto ke u leaʻakíPea ko e hā haʻaku tali ʻe fai ʻi he taimi ʻe valokiʻi ai aú.
2 Naʻe tali mai leva ʻe Sihova:
“Tohi ʻa e vīsoné, pea hiki ia ke mahino ʻi ha ngaahi lauʻimaka,+Koeʻuhí ke faingofua*+ hano lau leʻo-lahi ia ʻe ha tokotaha.
3 He ko e vīsoné ʻoku tuʻu ia ki hono taimi kuo kotofa,Pea ʻoku vave ke aʻu ia ki hono ngataʻangá,* pea ʻe ʻikai loi ia.
Neongo kapau ʻe toloi ia,* hanganaki ʻamanaki pē ki ai!*+
He kuo pau ke hoko moʻoni ia.
ʻE ʻikai ke tōmui!
4 Vakai ki he tokotaha ʻoku pōlepolé;ʻOku ʻikai ke ne faitotonu ʻiate ia tonu.
Ka ko e tokotaha māʻoniʻoní te ne moʻui ʻi heʻene faitōnungá.*+
5 Ko e moʻoni, koeʻuhi ko e uainé ʻoku kākā,Heʻikai aʻusia ai ʻe he tangata hīkisiá ʻa ʻene taumuʻá.
ʻOkú ne ʻai ke lahi ʻa ʻene ʻuakaí ʻo hangē ko e Faʻitoká;*ʻOkú ne hangē ko e maté ʻo ʻikai lava ke ne mākona.
ʻOkú ne hanganaki fakatahatahaʻi mai ʻa e kotoa ʻo e ngaahi puleʻangáPea tānaki mai kiate ia ʻa e kotoa ʻo e ngaahi kakaí.+
6 ʻIkai ʻe leaʻaki ʻe he faʻahingá ni kotoa ha lea fakaefakatātā, ha lea heliaki, mo ha ngaahi tupuʻa kiate ia?+
Te nau pehē:
‘ʻOiauē ʻa ia ʻokú ne tātānaki ʻa e meʻa ʻoku ʻikai ʻaʻaná—Ko e hā hono fuoloá?—Pea ʻokú ne ʻai ke toe lahi ange ʻa hono moʻuá!
7 ʻIkai ʻe tuʻu fakafokifā hake ʻa e faʻahinga ʻokú ke moʻua ki aí?
Te nau ʻā hake ʻo luluʻi koe,Pea te ke hoko ko ha meʻa ke nau faʻao fakamālohi.+
8 Koeʻuhí naʻá ke fai ʻa e faʻao fakamālohi mei he ngaahi puleʻanga lahi,Ko e toenga kotoa ʻo e ngaahi kakaí te nau fai ha faʻao fakamālohi meiate koe,+Koeʻuhí ko hoʻo lilingi ʻa e toto ʻo e faʻahinga ʻo e tangatáPea mo hoʻo faifakamālohi ki he māmaní,Ki he ngaahi koló pea ki he faʻahinga ʻoku nofo ʻi aí.+
9 ʻOiauē ʻa e tokotaha ʻokú ne tānaki ha tupu taʻetotonu maʻa hono falé,Koeʻuhi ke fokotuʻu ʻa hono punungá ʻi he taukakapá,Ke hao mei hono maʻu ia ʻe he faingataʻá!
10 Kuó ke faʻufaʻu ha meʻa ke hoko ʻo fakamā ki ho falé.
ʻI hono tafiʻi atu ʻa e ngaahi kakai lahí ʻokú ke angahala ai ʻiate koe tonu.+
11 He ʻe tangi ha maka mei he ʻaá,Pea ʻe fai ha tali ki ai ʻe ha sā mei he ʻató.
12 ʻOiauē ʻa e tokotaha ʻokú ne langa ha kolo ʻaki ʻa e lingitotó,Pea ʻokú ne fokotuʻu ha kolo ʻaki ʻa e taʻemāʻoniʻoní!
13 Vakai! ʻIkai ʻoku meia Sihova ʻo e ngaahi kau taú ʻa e ngāue mālohi ʻa e ngaahi kakaí ki he meʻa ʻe iku atu ki he afí,Pea ko e ngaahi puleʻangá ʻoku nau fakaongosia noa pē?+
14 He ko e māmaní ʻe fonu ʻi he ʻilo ki he lāngilangi ʻo SihováʻO hangē ko hono ʻufiʻufi ʻe he vaí ʻa e tahí.+
15 ʻOiauē ʻa e tokotaha ʻokú ne ʻoange ha meʻa ke inu ʻe hono ngaahi kaungāmeʻá,ʻO tānaki ki ai ʻene ʻitá mo ʻene lilí, ke ʻai kinautolu ke nau konā,Koeʻuhi ke ne sio ki heʻenau telefuá!
16 ʻE fakafonu koe ʻaki ʻa e taʻetokaʻi ʻo ʻikai ko e lāngilangi.
Ko koe foki—ke ke inu pea fakaeʻa atu ʻa ho tuʻunga taʻekamú.*
Ko e ipu ʻi he nima toʻomataʻu ʻo Sihová ʻe ʻoatu ia kiate koe,+Pea ko e fakamaá te ne ʻufiʻufi ho lāngilangí.
17 He ko e fakamālohi kuo fai ki Lepanoní te ne ʻufiʻufi koe,Pea ko e fakaʻauha kuó ne fakailifiaʻi ʻa e fanga manú ʻe hoko kiate koe,Koeʻuhí ko hoʻo lilingi ʻa e toto ʻo e faʻahinga ʻo e tangatáPea mo hoʻo faifakamālohi ki he māmaní,Ki he ngaahi koló pea ki he faʻahinga ʻoku nofo ʻi aí.+
18 Ko e hā hono ʻaonga ʻo ha ʻīmisi kuo tongiʻI he ʻosi hono tā-tongitongi ia ʻe hono tokotaha-ngaohí?
Ko e hā hono ʻaonga ʻo ha ʻīmisi mētale* mo ha faiako ʻo e loí,Neongo ʻoku falala ki ai ʻa hono tokotaha-ngaohí,ʻO ne ngaohi ha ngaahi ʻotua taʻeʻaonga ʻoku ʻikai ke nau lava ʻo leá?+
19 ʻOiauē ʻa e tokotaha ʻokú ne pehē ki ha konga ʻakau, “ʻĀ hake!”
Pe ki he maka ʻoku ʻikai lava ʻo leá, “Ofo hake! Fakahinohinoʻi kimautolu!”
Vakai! ʻOku kofuʻaki ia ʻa e koula mo e siliva,+Pea ʻoku ʻikai ʻaupito ha mānava ʻiate ia.+
20 Ka ko Sihova ē ʻoku ʻi hono temipale tapú.+
Ke sīlongo ʻi hono ʻaó, ʻa e kotoa ʻo māmaní!’”+
Fakamatala ‘i Lalo
^ Pe “tafe lelei.”
^ Pe “fakahokó.”
^ Pe “kapau ʻoku hā ngali toloi ia.”
^ Pe “tatali vēkeveke pē ki ai!”
^ Pe ngalingali, “ʻi heʻene tuí.”
^ Pe “ko Seolí,” ʻa ia, ko e faʻitoka anga-maheni ʻo e faʻahinga ʻo e tangatá. Sio ki he Lea mo Hono ʻUhinga.
^ Pe ngalingali, “peá ke tāsipa.”
^ Pe “ʻīmisi mētale kuo haka.”
