Ki he Kau Loma 12:1-21
12 Ko ia ai, ʻoku ou kōlenga atu kiate kimoutolu ʻi he manavaʻofa ʻa e ʻOtuá, fanga tokoua, ke mou ʻoatu homou sinó+ ko ha feilaulau ʻoku moʻui, toputapu+ pea mo fakahōifua ki he ʻOtuá, ko ha ngāue toputapu ʻo ngāueʻaki hoʻomou mafai fakaefakaʻuhingá.+
2 Pea tuku hono fakafuo kimoutolu ki he fokotuʻutuʻu ko ení,* ka ke fai homou liliú ʻaki hono fakafoʻou homou ʻatamaí,+ koeʻuhi ke mou lava ʻo fakamoʻoniʻi kiate kimoutolu+ ʻa e finangalo lelei mo fakahōifua mo haohaoa ʻo e ʻOtuá.
3 He fakafou ʻi he ʻofa maʻataʻatā kuo foaki mai kiate aú, ʻoku ou tala ai ki he tokotaha kotoa ʻi hena ʻi homou lotolotongá ke ʻoua ʻe fakakaukau kiate ia tonu ʻo mahulu hake ia ʻi he meʻa ʻoku totonu ke fakakaukau ki aí,+ ka ke fakakaukau ʻi ha founga ʻoku hā ai ʻa hono maʻu ʻa e fakakaukau leleí, ʻa e tokotaha taki taha ʻo fakatatau ki he lahi ʻo e tui kuo ʻoange* kiate ia ʻe he ʻOtuá.+
4 He hangē tofu pē ko ʻetau maʻu ʻi he sino pē taha ʻa e ngaahi kupu lahi,+ ka ʻoku ʻikai maʻu ʻe he ngaahi kupú kotoa ʻa e ngafa tatau,
5 ʻoku pehē pē mo kitautolu, neongo ʻoku tau tokolahi, ʻoku tau sino pē taha ʻo fāʻūtaha mo Kalaisi, ka ʻi he fakatāutahá ko e ngaahi kupu kitautolu ʻoku tau fekauʻaki.+
6 Ko ia ai, koeʻuhi ʻoku tau maʻu ʻa e ngaahi meʻaʻofa ʻoku kehekehe ʻo fakatatau ki he ʻofa maʻataʻatā kuo foaki mai kiate kitautolú,+ kapau ko e kikite, tuku ke tau kikite ʻo fakatatau ki heʻetau tuí;
7 pe kapau ko ha ngāue ʻi he fakatahaʻangá, tuku ke tau hokohoko atu ai pē ʻi he ngāué ni; pe ko e tokotaha ʻoku faiako, tuku ke ne hokohoko atu ai pē ʻi heʻene faiakó;+
8 pe ko e tokotaha ʻokú ne fai ʻa e fakalototoʻá,* tuku ke ne fai ʻa e fakalototoʻá;*+ ko e tokotaha ʻokú ne fai ʻa e foakí,* tuku ke ne fai vēkeveke ia;+ ko e tokotaha ʻokú ne fai ʻa e tauhí,* tuku ke ne fai tōtōivi ia;+ ko e tokotaha ʻokú ne fakahāhā ʻa e manavaʻofá,* tuku ke ne fai fiefia ia.+
9 ʻAi ke taʻemālualoi hoʻomou ʻofá.+ Fakaliliʻa ki he meʻa ʻoku fulikivanú;+ pīkitai ki he meʻa ʻoku leleí.
10 ʻI he ʻofa fakatokouá mou maʻu ʻa e femanavaʻofaʻaki loloto. ʻI he fakahāhā ʻo e fefakaʻapaʻapaʻakí, mou takimuʻa ai.*+
11 Hoko ʻo faʻa ngāue,* ʻoua ʻe fakapikopiko.*+ Hoko ʻo loto-māfana ʻi he laumālié.+ Ngāue fakatamaioʻeiki kia Sihova.*+
12 Fiefia ʻi he ʻamanakí. Kātaki ʻi he mamahí.+ Kītaki ʻi he lotu.+
13 Vahevahe atu ki he kakai tapú ʻo fakatatau ki heʻenau ngaahi fiemaʻú.+ Muimui ʻi he ʻalunga ʻo e anga-talitali kakaí.+
14 Hanganaki tāpuakiʻi ʻa e faʻahinga ʻoku nau fakatangaʻi koé;+ tāpuakiʻi pea ʻoua ʻe talatukiʻi.+
15 Fiefia mo e faʻahinga ʻoku fiefiá; tangi mo e faʻahinga ʻoku tangí.
16 Maʻu ʻa e fakakaukau tatau ki he niʻihi kehé ʻo hangē pē ko hoʻomou fakakaukau hifo kiate kimoutolú; ʻoua ʻe ohi ʻa e fakakaukau hīkisiá, kae maʻu ha fakakaukau fakatōkilalo.+ ʻOua ʻe hoko ʻo poto ʻi he vakai pē ʻa kimoutolú.+
17 ʻOua ʻe fetongi ʻa e koví ʻaki ʻa e kovi ki ha taha.+ Fakakaukau ki he meʻa ʻoku lelei ʻi he anga ʻo e vakai* ki ai ʻa e tangata kotoa pē.
18 ʻO ka ala lava, ʻo fakatatau ki he lahi taha ʻo hoʻomou malavá, mou nofo melino mo e tangata kotoa pē.+
19 ʻOua te mou faisāuni maʻamoutolu, siʻi faʻahinga ʻofeina, kae tuku ia ki he houhaú;*+ he kuo tohi: “‘Ko e sāuní ʻoku ʻaʻaku ia; te u fai ʻe au ʻa e totongi fakafokí,’ ko e folofola ia ʻa Sihová.”*+
20 Ka “ʻo kapau ʻoku fiekaia ho filí, fafanga ia; kapau ʻokú ne fieinua, ʻoange ha meʻa ke ne inu; he ʻi he fai ʻo e meʻá ni te ke fokotuʻu ai ha ngaahi malalaʻi afi kakaha ki hono ʻulú.”*+
21 ʻOua naʻa tuku ke ikunaʻi koe ʻe he koví, ka ke hanganaki ikunaʻi ʻa e koví ʻaki ʻa e leleí.+
Fakamatala ‘i Lalo
^ Pe “kuonga ko ení.” Sio ki he Lea mo Hono ʻUhinga.
^ Pe “tufa; vaheʻi.”
^ Pe “mēsí.”
^ Pe “takimuʻá.”
^ Pe “tokoní.”
^ Pe “enginakí.”
^ Pe “enginakí.”
^ Pe “tamuʻomuʻa ai.”
^ Pe “ʻo tōtōivi; ʻo faivelenga.”
^ Pe “ʻOua ʻe fakatōtōʻohi ʻi hoʻomou ngāué.”
^ Sio ki he Fakamatala Fakalahi A5.
^ Pe “ʻi he mamata.”
^ ʻA ia, ko e houhau ʻa e ʻOtuá.
^ Sio ki he Fakamatala Fakalahi A5.
^ ʻA ia, ke fakamolū hifo ai ʻa e tokotahá pea ʻai ai ke vaia hifo ʻa ʻene anga-fefeká.
