Ki he Kau Loma 13:1-14
13 Ke fakamoʻulaloa ʻa e tokotaha kotoa pē ki he ngaahi mafai māʻolungá,+ he ʻoku ʻikai ʻi ai ha mafai ka ʻi hono fakaʻatā pē ʻe he ʻOtuá;+ ko e ngaahi mafai ʻoku tuʻú ni ko e fokotuʻu kinautolu ki honau ngaahi tuʻunga kehekehé ʻe he ʻOtuá.+
2 Ko ia ai, ʻilonga ʻa ia ʻoku fakafepaki ki he mafaí kuó ne fakafepaki ki he fokotuʻutuʻu ʻa e ʻOtuá; ko e faʻahinga kuo nau fakafepaki ki aí ʻe fakamāuʻi kinautolu.
3 He ko e faʻahinga ʻoku pulé ʻoku ʻikai ko ʻenau ʻi aí koeʻuhí ke manavahē ki ai ʻa e faʻahinga ʻoku faileleí, ka ke manavahē ki ai ʻa e faʻahinga ʻoku faikoví.+ ʻOkú ke fie tauʻatāina mei he manavahē ki he maʻu mafaí? Hanganaki failelei,+ pea te ke maʻu ha fakahīkihiki mei ai;
4 he ko e sevāniti ia ʻa e ʻOtuá kiate koe ki ha lelei maʻau. Ka ʻo kapau ʻokú ke fai ʻa e meʻa ʻoku koví, ke ke manavahē, he ʻoku ʻikai taʻeʻiai hano taumuʻa ʻa ʻene toʻo ʻa e heletaá. Ko e sevāniti ia ʻa e ʻOtuá, ko ha tokotaha faisāuni ke fakahāhā ʻa e houhau* ki he tokotaha ʻokú ne tōʻongaʻaki ʻa e meʻa ʻoku koví.
5 Ko ia ai, ʻoku ʻi ai ʻa e ʻuhinga kuo pau ai kiate kimoutolu ke mou fakamoʻulaloá, ʻo ʻikai koeʻuhí pē ko e houhau ko iá ka koeʻuhí foki ko homou konisēnisí.+
6 Ko e ʻuhinga ia ʻoku mou totongi foki ai ʻa e ngaahi tukuhaú; he ko e kau sevāniti kinautolu ʻa e ʻOtuá ʻoku nau ngāue maʻu pē ki he taumuʻa tofu pē ko ení.
7 ʻOatu ki he tokotaha kotoa ʻa e meʻa ʻoku totonu ke ʻanautolú: ʻA e tukuhaú, ki he tokotaha ʻoku totonu ke ʻoange ki ai ʻa e tukuhaú;+ ʻa e totongí, ki he tokotaha ʻoku totonu ke fai ki ai ʻa e totongí; ʻa e manavaheé, ki he tokotaha ʻoku totonu ke fai ki ai ʻa e manavaheé;+ ʻa e fakaʻapaʻapá, ki he tokotaha ʻoku totonu ke fai ki ai ʻa e fakaʻapaʻapá.+
8 ʻOua te mou moʻuaʻaki ha meʻa ki ha taha tuku kehe pē ke mou feʻofaʻaki;+ he ʻilonga ʻa ia ʻoku ʻofa ki hono kaungā-faʻahinga ʻo e tangatá kuó ne fakahoko kakato ʻa e laó.+
9 He ko e ngaahi tuʻutuʻuni eni ʻa e laó, “Kuo pau ke ʻoua naʻá ke tono,+ kuo pau ke ʻoua naʻá ke fakapō,+ kuo pau ke ʻoua naʻá ke kaihaʻa,+ kuo pau ke ʻoua naʻá ke mānumanu,”+ pea ʻilonga ha toe fekau kehe pē ʻoku ʻi ai, ʻoku fālute kotoa ia ʻi he leá ni: “Kuo pau ke ke ʻofa ki ho kaungāʻapí ʻo hangē pē ko hoʻo ʻofa kiate koé.”+
10 Ko e ʻofá ʻoku ʻikai ke ne fai ha ngāue kovi ki hono kaungāʻapí;+ ko ia ai, ko e ʻofá ko hono fakahoko kakato ia ʻo e laó.+
11 Pea mou fai eni, koeʻuhí he ʻoku mou ʻilo ʻa e kuongá, he kuo ʻosi hoko ʻa e houa ke mou ʻā hake ai mei he mohé,+ he ʻoku ofi ange he taimí ni hotau fakamoʻuí ʻi he taimi ne tau hoko ai ko e kau tuí.
12 Kuo māʻuloloa ʻa e poó; kuo ofi mai ʻa e ʻahó. Ko ia ai, tuku ke tau liʻaki atu ʻa e ngaahi ngāue ʻo e fakapoʻulí+ pea ke tau ʻai ʻa e ngaahi meʻatau ʻo e māmá.+
13 Tuku ke tau ʻaʻeva taau+ ʻo hangē ko ia ʻi he ʻahó, ʻo ʻikai ʻi he ngaahi paati uatau* mo e konā, ʻikai ʻi he fehokotaki fakasino taʻetaau mo e faikovi taʻemīngao,*+ ʻikai ʻi he fekeʻikeʻi mo e meheka.+
14 Ka mou faʻifaʻitaki ki he* ʻEiki ko Sīsū Kalaisí,+ pea ʻoua naʻa tomuʻa fai ha faʻufaʻu ke fai ʻa e ngaahi holi ʻo e kakanó.+
Fakamatala ‘i Lalo
^ Pe “ke ne ʻomai ʻa e tautea.”
^ Pe “ʻi he ngaahi fakafiefia longoaʻa.”
^ Pe “ngaahi tōʻonga taʻenā.” Ko e pulula ia ʻo e foʻi lea faka-Kalisi ko e a·selʹgei·a. Sio ki he Lea mo Hono ʻUhinga.
^ Fakafoʻilea, “kofuʻaki ʻa e.”
