Kia Taitusi 2:1-15
2 Kae kehe, ko koe, hanganaki leaʻaki ʻa e meʻa ʻoku huʻufataha mo e akonaki leleí.*+
2 Tuku ki he kau tangata matuʻotuʻa angé ke nau hoko ʻo anga-fakamaʻumaʻu ʻi heʻenau ngaahi tōʻongá, anga-fakamātoato, fakakaukau lelei, tuʻu maʻu* ʻi he tuí, ʻi he ʻofá, ʻi he kātakí.
3 Pehē foki, tuku ki he kau fefine taʻumotuʻa angé ke nau hoko ʻo anga-ʻapasia ʻi honau ʻulungāngá, ʻo ʻikai ke laukovi loi, ʻikai ke pōpula ki ha inu uaine lahi, ko e kau faiako ʻo e meʻa ʻoku leleí,
4 ke lava ke nau faleʻi* ʻa e kau fefine taʻu siʻi angé ke nau ʻofa ki honau ngaahi husepānití, ke nau ʻofa ki heʻenau fānaú,
5 ke nau fakakaukau lelei, anga-maʻa, ngāue ʻi ʻapi,* failelei, ke nau anganofo ki honau ngaahi husepānití,+ koeʻuhi ke ʻoua naʻa lauʻikoviʻi ʻa e folofola ʻa e ʻOtuá.
6 Pehē foki, hanganaki enginaki ki he kau tangata taʻu siʻi angé ke nau hoko ʻo fakakaukau lelei,+
7 fakahāhaaʻi atu koe ko ha faʻifaʻitakiʻanga ʻo e ngaahi ngāue leleí ʻi he tafaʻaki kotoa pē. Faiakoʻaki ʻa e meʻa ʻoku haohaoá* ʻaki ʻa e fakamātoato fakaʻaufuli,+
8 ʻo ngāueʻaki ʻa e lea lelei* ʻa ia heʻikai lava ke fakaangaʻi,+ koeʻuhi ke ʻai ai ʻa e faʻahinga ko ia ʻoku fakafepaki maí ke nau hoko ʻo mā, ʻi he ʻikai ha meʻa ʻoku kovi* ke nau leaʻaki fekauʻaki mo kitautolú.+
9 Tuku ki he kau tamaioʻeikí ke nau moʻulaloa ki honau kau pulé ʻi he ngaahi meʻa kotoa pē,+ ʻo feinga ke fakahōhōʻiaʻi kinautolu, ʻo ʻoua ʻe taungutu,
10 ʻo ʻoua ʻe kaihaʻa meiate kinautolu,+ kae fakahāhā ʻa e alafalalaʻanga kakato, koeʻuhi ke nau ʻai ke teungaʻia ʻi he tafaʻaki kotoa pē ʻa e akonaki ʻa hotau Fakamoʻuí, ʻa e ʻOtuá.+
11 He ko e ʻofa maʻataʻatā ʻa e ʻOtuá kuo fakaeʻa ia, ʻo ʻomi ai ʻa e fakamoʻuí ki he faʻahinga kakai kotoa pē.+
12 ʻOku akoʻi ai kitautolu ke tau talitekeʻi ʻa e anga-taʻefakaʻotuá mo e ngaahi holi fakamāmaní+ pea ke tau moʻui ʻaki ʻa e fakakaukau leleí mo e māʻoniʻoní mo e anga-līʻoa fakaʻotuá ʻi he lotolotonga ʻo e fokotuʻutuʻu lolotonga ko ʻení,*+
13 lolotonga ia ʻetau tatali ki he ʻamanaki fakafiefia+ mo e fakaeʻa lāngilangiʻia mai ʻa hotau ʻOtua lahí pea mo e fakaeʻa mai ʻa Sīsū Kalaisi, ko hotau Fakamoʻuí,
14 ʻa ia naʻá ne foaki ʻa ia tonu maʻatautolu+ ke fakatauʻatāinaʻi*+ kitautolu mei he faʻahinga kotoa pē ʻo e maumau-laó pea ke fakamaʻa ha kakai maʻana ʻa ia ko ʻene koloa makehe, ʻoku nau faivelenga maʻá e ngaahi ngāue leleí.+
15 Hanganaki leaʻaki ʻa e ngaahi meʻá ni mo enginaki* mo valoki ʻaki ʻa e mafai kakato kuó ke maʻú.+ ʻOua naʻa tuku ke siolalo atu ha taha kiate koe.
Fakamatala ‘i Lalo
^ Pe “fakatupu moʻuí; ʻaongá.”
^ Fakafoʻilea, “moʻui lelei.”
^ Pe “fakafokifoki mai ʻa e fakakaukau lelei; akoʻi.”
^ Pe “tokangaʻi honau ʻapí.”
^ Pe ngalingali, “ʻoku maʻá.”
^ Pe “fakatupu moʻui; ʻaonga.”
^ Pe “meʻa palakū.”
^ Pe “kuonga lolotonga ko ʻení.” Sio ki he Lea mo Hono ʻUhinga.
^ Fakafoʻilea, “ke huhuʻi.”
^ Pe “mo fai ha fakalototoʻa.”
