Kalata Yakuluta kwa Aefeso 3:1-21
3 Pa chifukwa chenichi, ini Paulo mukayidi+ waku Khristu Yesu chifukwa chaku yimwi ŵanthu amitundu yinyaki . . .
2 yimwi mukuvwa nadi kuti ndikupaskika uteŵeti wakuwonere+ kuti ndikuwovyeni kuti muyanduwi ndi wezi ukulu waku Chiuta,
3 kuti chisisi chakupaturika chinguvumbulika kwaku ini, nge mo ndingukulembiyanipu kali mwakudumuwa.
4 Mwaviyo muchiŵerenga kalata iyi, muwonengi kuti ndivwisa ukongwa chisisi chakupaturika+ chaku Khristu.
5 Mu migonezi yinyaki, chisisi chenichi chaziŵikanga cha ku ŵana a ŵanthu nge mo sonu mwakugwiriskiya ntchitu mzimu, chavumbulikiya kwa akutumika ndi achimi ŵaki akupaturika.+
6 Chisisi chenichi ntchakuti mwakukoliyana ndi Khristu Yesu ndipuso kuporote mu uthenga wamampha, ŵanthu amitundu yinyaki nawu aje akuhara kweniso aje viŵalu va liŵavu limoza,+ ndipuso akusangana nasi mu layizgu.
7 Ndinguŵa mteŵeti wa chenichi mwakukoliyana ndi mphasu ya wezi ukulu waku Chiuta yo ndikupaskika kuporote mu nthazi yaki yo yigwira ntchitu.+
8 Wezi ukulu wenuwu unguperekeka kwaku ini+ ndamunthu mumana kuluska mumana ukongwa pa akupaturika wosi,+ kuti ndipharazgi uthenga wamampha ku ŵanthu amitundu yinyaki wakukwaskana ndi chuma chambula kuŵerengeka chaku Khristu
9 ndipuso kuti ndiwovyi weyosi kuti wawoni mo chisisi chakupaturika+ chigwiriya ntchitu, cho chabisika kwa vyaka vinandi mwaku Chiuta yo wakulenga vinthu vosi.
10 Ivi venga viyo kuti sonu maboma kweniso wo alamuliya mumalu ngakuchanya aziŵi zeru zikulu ndipuso zakupambanapambana zaku Chiuta+ kuporote mu mpingu.+
11 Venivi vikoliyana so ndi khumbu lamuyaya lo wakunozga mwakukoliyana ndi Khristu+ Yesu Ambuyafwi,
12 mweniyo kuporote mwaku iyu, te ndi wanangwa wenuwu wakulongoro kweniso wakufika kwaku Chiuta+ ndi mtima wosi chifukwa chakuti te ndi chivwanu mwaku iyu.
13 Mwaviyo, nditikupemphani kuti muleki kuwere vuli chifukwa cha masuzgu ngo ndikumana nangu chifukwa chaku yimwi, pakuti venivi mbunkhankhu winu.+
14 Pa chifukwa chenichi, ndijikama kwa Ada,
15 wo apereka zina ku banja lelosi, kuchanya ndi pacharu chapasi.
16 Ndipemphera kuti kuporote mu unkhankhu wawu ukulu, yiwu akuzomerezeni kuti mukati mwinu yimwi muje munthu wanthazi,+ chifukwa cha nthazi ya mzimu wawu,
17 ndipuso kuti chifukwa cha chivwanu chinu, muje ndi Khristu mumitima yinu limoza ndi chanju.+ Mume misisi+ ndi kujalikiskika pafawundeshoni,+
18 kuti pamoza ndi akupaturika wosi, muvwisi umampha ukongwa usani, utali, kukwera, ndi kusere
19 kweniso kuti muziŵi chanju chaku Khristu+ cho chiluska kuziŵa vinthu, kuti muzaziki ndi vinthu vosi vakukwana vo Chiuta wapereka.
20 Sonu kwaku yo wangachita vinthu vikulu ukongwa kuluska vinthu vosi vo tipempha pamwenga kuziŵa,+ yo wachita mwakukoliyana ndi nthazi zaki zo zigwira ntchitu mwaku isi,+
21 kwaku iyu kuŵi unkhankhu kuporote mu mpingu ndipuso mwaku Khristu Yesu ku migonezi yosi muyaya mpaka muyaya. Ame.
