Dotoronome 17:1-20
17 “Ungaperekanga cha kwaku Yehova Chiuta waku ng’ombi pamwenga mbereri yo ye ndi kalema pamwenga yo ye ndi suzgu yinyaki, pakuti Yehova Chiuta waku waseruka nayu.+
2 “Asani mutawuni yeyosi, pa matawuni ngo Yehova Chiuta waku watikupaska, mwasanirika munthulumi pamwenga munthukazi yo wachita vinthu viheni pa masu paku Yehova Chiuta waku ndipuso watuswa phanganu laki,+
3 ndipu walanda, wasopa achiuta anyaki ndi kuŵasindamiya, pamwenga wasindamiya lumwi, mwezi pamwenga mizinda yosi yakuchanya,+ chinthu cho ndikulamula cha,+
4 ndipu munthu munyaki wakukambiya nkhani yo pamwenga wayivwa wija, utenere kuyifufuza mwakuphwere nkhani yo. Asani mbuneneska+ kuti chinthu chaukazuzi cho chachitika nadi mu Isirayeli,
5 munthulumi pamwenga munthukazi yo wachita chinthu chiheni cho ulutengi nayu ku geti la tawuni, ndipu munthulumi pamwenga munthukazi yo waponyeki mya kuti wafwi.+
6 Munthu wakwenere nyifwa wabayiki asani wasimikizika ndi* akaboni ŵaŵi pamwenga atatu.+ Iyu wangabayikanga cha asani wasimikizika ndi kaboni yumoza pe.+
7 Akaboni wo ndiwu adankhengi kumuponya ndi mya kuti wafwi, pavuli paki ŵanthu wosi. Mutenere kutuzgapu chinthu chiheni pakati pinu.+
8 “Asani mu yimoza mwa matawuni nginu mwabuka nkhani yakusuzga kuyeruzga, kwali ndi nkhani yakukwaskana ndi kubaya munthu,+ ŵanthu amangalana, kwachitika viwawa pamwenga asani ŵanthu apindana, ulutengi ndi nkhani yo kumalu ngo Yehova Chiuta waku wasankha.+
9 Ulutengi ndi nkhani yo kwa asembi wo Mbalevi kweniso kwa wakweruzga+ yo wateŵete mu nyengu yo, uŵakonkhoskiyengi nkhani yo, ndipu yiwu akukambiyengi cheruzgu chawu.+
10 Pavuli paki, uchitengi mwakukoliyana ndi cheruzgu cho akukambiya kumalu ngo Yehova wasankha. Uwonesesi kuti wachita vosi vo akukambiya.
11 Utenere kuchita mwakukoliyana ndi dangu lo akulongo kweniso mwakukoliyana ndi cheruzgu cho akukambiya.+ Ungatuwangaku cha ku cheruzgu cho akupaska, kwali nkhuluta kumaryi pamwenga kumazge.+
12 Munthu yo wajikuzga mwakuleka kuvwiya wasembi yo wateŵete Yehova Chiuta waku pamwenga wakweruzga, watenere kubayika.+ Mutenere kutuzgapu chinthu chiheni pakati pa Ayisirayeli.+
13 Asani ŵanthu wosi azivwa, azamuchita mantha ndipu azakujikuzga so cha.+
14 “Asani mwazisere mucharu cho Yehova Chiuta winu watikupaskani ndipu mwachito kuja chinu kweniso mwayamba kujamu, ndipu mukamba kuti, ‘Tiyeni tisankhi fumu kuti yitilamuliyengi nge mo viliri ndi mitundu yo yatizunguliya,’+
15 asani vaziŵa viyo, mungazitondekanga cha kuŵika fumu yo Yehova Chiuta winu wasankha.+ Muzisankhengi fumu pakati pa abali ŵinu. Muzomerezeka cha kusankha mulendu yo ndi mubali winu cha kuti waje fumu yinu.
16 Kweni fumu yo, yingazijiwunjikiyanga mahachi nganandi cha+ pamwenga kuchitiska ŵanthu kuti awere ku Ijipiti kuti akasaniyi mahachi+ nganandi, pakuti Yehova wangukukambiyani kuti, ‘Mungaweriyanga ku nthowa iyi cha.’
17 Fumu yo yingazitonga anthukazi anandi cha, kuti mtima waki uzileki kulanda;+ ndipuso yingazijiwunjikiyanga siliva ndi golidi munandi cha.+
18 Asani fumu yayamba kulamuliya mu ufumu waki, yizikopiyengi buku la Dangu ili kutuliya mubuku lo asembi wo Mbalevi asunga.+
19 “Buku lo lizijengi ndi iyu, ndipu waziliŵerengengi mu mazuŵa ngosi nga umoyu waki,+ kuti wazisambiri kopa Yehova Chiuta waki ndi kusunga mazu ngosi nga mu Dangu ili ndipuso kulondo fundu zaki.+
20 Wazichitengi venivi kuti mtima waki uzileki kujikuzga pakati pa abali ŵaki, ndipuso kuti wazileki kutuwapu pa dangu ili, kuluta kumaryi pamwenga kumazge, kuti iyu ndi ŵana ŵaki anthulumi azilamuliyi kwa nyengu yitali mu ufumu waki, pakati pa Ayisirayeli.
Mazu Ngam'mphata
^ Mazu ngaki chayingu, “wabayiki pa mulomu wa.”
