Dotoronome 5:1-33
5 Pavuli paki, Mozesi wangudana Ayisirayeli wosi, ndipu wanguŵakambiya kuti: “Yimwi Ayisirayeli, vwani marangu kweniso vyeruzgu vo nditikukambiyani msanawale, ndipu muvisambirengi ndi kuvisunga mwakuphwere.
2 Yehova Chiuta widu wanguchita nasi phanganu ku Horebu.+
3 Yehova wanguchita phanganu ili ndi apapi ŵidu cha, kweni wanguchita ndi isi, isi tosi te amoyu msanawale.
4 Yehova wangulongoro namwi masu ndi masu muphiri, kutuliya mumotu.+
5 Pa nyengu yeniyo, ini ndinguma pakati paku Yehova ndi yimwi+ kuti ndikukambiyeni mazu ngaku Yehova, pakuti munguwopa motu ndipu mungukwera cha paphiri.+ Iyu wangukamba kuti:
6 “‘Ini ndini Yehova Chiuta waku yo wakukutuzga mucharu cha Ijipiti, munyumba ya ukapolu.+
7 Ungajanga ndi achiuta anyaki cha kupatuwaku ini.*+
8 “‘Ungajipangiyanga chikozgu chakusema cha,+ pamwenga chikozgu cha chinthu chechosi chakuchanya, chapacharu chapasi pamwenga chamumaji nga pacharu chapasi.
9 Ungavisindamiyanga cha pamwenga kuviteŵete,+ pakuti ini Yehova Chiuta waku, ndini Chiuta yo wakhumba kuti ŵanthu ajiperekengi kwaku ini pe.+ Ndilanga ŵana chifukwa cha ubudi wa awusewu mpaka mugonezi wachitatu ndipuso mugonezi wachinayi wa ŵanthu wo atinditinkha,+
10 kweni ndilongo chanju chambula kumala mpaka ku mugonezi wa nambala 1,000 wa ŵanthu wo atindiyanja ndi kusunga marangu ngangu.
11 “‘Ungagwiriskiyanga ntchitu zina laku Yehova Chiuta waku mu nthowa yambula kwenere cha,+ chifukwa Yehova walekengi cha kulanga munthu yo wagwiriskiya ntchitu zina laki mu nthowa yambula kwenere.+
12 “‘Usungengi zuŵa la Sabata kuti lijengi lakupaturika, nge mo Yehova Chiuta waku wakukulamuliya.+
13 Ugwirengi ntchitu zaku zosi kwa mazuŵa 6,+
14 kweni zuŵa la 7 ndi sabata laku Yehova Chiuta waku.+ Ungagwiranga ntchitu yeyosi cha,+ kwali ndiwi, mwana waku munthulumi, mwana waku munthukazi, kapolu waku munthulumi, kapolu waku munthukazi, ng’ombi yaku, bulu waku, chiŵetu chaku chechosi pamwenga mulendu yo waja mumatawuni* ngaku,+ kuti kapolu waku munthulumi ndi kapolu waku munthukazi apumuwengi nge mo yiwi uchitiya.+
15 Ukumbukengi kuti wenga kapolu mucharu cha Ijipiti, ndipu Yehova Chiuta waku wakukutuzga mucharu cho ndi janja lanthazi ndipuso janja lakutambasuka.+ Ndichu chifukwa chaki Yehova Chiuta waku wakukulamula kuti usungengi zuŵa la Sabata.
16 “‘Utumbikengi awusu ndi anyoku+ nge mo Yehova Chiuta waku wakulamuliya, kuti uzije ndi umoyu utali kweniso kuti vinthu vizikuyende umampha mucharu cho Yehova Chiuta waku wakupaskengi.+
17 “‘Ungabayanga munthu cha.+
18 “‘Ungachitanga chigololu cha.+
19 “‘Ungabanga cha.+
20 “‘Ungaperekanga ukaboni waboza cha wakupusikiya munyaku.+
21 “‘Ungakhumbiranga muwolu wa munyaku cha.+ Ungakhumbiranga nyumba ya munyaku cha mwambunu, pamwenga munda waki pamwenga kapolu waki munthulumi pamwenga kapolu waki munthukazi pamwenga ng’ombi yaki pamwenga bulu waki pamwenga chinthu chechosi cha munyaku.’+
22 “Yehova wangukambiya mpingu winu wosi marangu* ngenanga paphiri, kutuliya mumotu, mumtambu ndipuso mu mdima ukulu.+ Iyu wangukamba mwakukweza ndipu wangusazgiyapu chinthu chinyaki cha. Pavuli paki, wangungalemba pamya yiŵi ndipu wangundipaska.+
23 “Kweni mwati mwavwa ŵaka mazu kutuliya mu mdima, phiri lichikore motu,+ alongozgi wosi a mafuku nginu kweniso ŵara anguza kwaku ini.
24 Pavuli paki, mungukamba kuti, ‘Yehova Chiuta widu watilongo unkhankhu waki kweniso ukulu waki ndipu tavwa mazu ngaki kutuliya mumotu.+ Msanawale tawona kuti Chiuta wangalongoro ndi munthu ndipu munthu yo wangalutirizga kuja ndi umoyu.+
25 Sonu tifwiyenji? Pakuti motu ukulu uwu utipirizengi. Asani tilutirizgengi kuvwisiya mazu ngaku Yehova Chiuta widu, tifwengi nadi.
26 Kumbi ndi munthu nuyu pa ŵanthu wosi yo wakuvwapu mazu ngaku Chiuta wamoyu wachilongoro kutuliya mumotu, nge mo isi tinguchitiya, ndipu munthu yo wangulutirizga kuja ndi umoyu?
27 Yimwi ndimwi muluti kufupi kuti mukavwi vosi vo Yehova Chiuta widu wakambengi, ndipu yimwi ndimwi mutikambiyengi vosi vo Yehova Chiuta widu wakukambiyeningi. Isi tivwisiyengi ndi kuchita venivo.’+
28 “Sonu Yehova wanguvwa mazu ngosi ngo mungundikambiya, ndipu Yehova wangundikambiya kuti, ‘Ndavwa mazu ngo ŵanthu yaŵa akukambiya. Vosi vo akamba vamampha.+
29 Asani nyengu zosi ajengi ndi mtima wakundiwopa+ ndi kusunga marangu ngangu ngosi,+ mbwenu yiwu pamoza ndi ŵana ŵawu vinthu viŵayendiyengi umampha mpaka muyaya!+
30 Luta kwaku yiwu, ndipu ukaŵakambiyi kuti: “Weriyani kumahema nginu.”
31 Kweni yiwi uje penipanu ndi ini kuti ndikukambiyi marangu ngosi, fundu ndipuso vyeruzgu vo utenere kuchiŵasambiza kweniso vo atenere kuchivisunga mucharu cho ndiŵapaskengi kuti chije chawu.’
32 Sonu mwaŵanthu yimwi muphwere ukongwa kuti muchiti nge mo Yehova Chiuta winu wakulamuliyani.+ Mungapetukiyanga kumaryi cha pamwenga kumazge.+
33 Muyendengi mu nthowa zosi zo Yehova Chiuta winu wakulamulani,+ kuti muje ndi umoyu, vinthu vikuyendiyeni umampha kweniso kuti muje mazuŵa nganandi mucharu cho mutongi kuja chinu.+
Mazu Ngam'mphata
^ Mazu ngaki chayingu, “achiuta anyaki cha akulimbana ndi chisku changu.”
^ Mazu ngaki chayingu, “mumageti.”
^ Mazu ngaki chayingu, “mazu.”
