Machitidu nga Akutumika 26:1-32
26 Agiripa+ wangukambiya Paulo kuti: “Sonu nditikuzomereza kuti nawi ulongoropu chigaŵa chaku.” Ndipu Paulo wangutambasuwa janja laki ndi kwamba kulongoro mwakujivikiliya kuti:
2 “Fumu Agiripa, pa nkhani zosi zo Ayuda atindimba nazu mulandu,+ msanawale nde wakukondwa chifukwa ndijivikiliyengi pa masu pinu,
3 ukongwa chifukwa chakuti yimwi mutiyiziŵa umampha midawuku yosi ndipuso nkhani zo Ayuda apindana. Mwaviyo nditikupemphani kuti mundivwisiyi mwakuzikira.
4 “Kukamba uneneska, mo ndajaliyanga kutuliya pa unyamata wangu pakati pa ŵanthu amtundu wangu kweniso ku Yerusalemu, Ayuda wosi aziŵa umampha,+
5 wo atindiŵanika kwamba kali. Asani angakhumba, angandipereke ukaboni wakuti ndenga mu kagulu ka Afarisi+ ko kasopa mwakunonopesa vinthu.+
6 Kweni sonu ndimbika mulandu pa nkhani ya chilindizga cho Chiuta wakulayizga apapi ŵidu akali.+
7 Layizgu lenili ndilu mafuku ngidu 12 ngalindizga kuziwona kufiskika kwaki ndipu ngatimuchitiya uteŵeti wakupaturika ndi mtima wosi, usiku ndi msana. Chilindizga chenichi ndichu Ayuda atindimba nachu mulandu,+ Fumu yangu.
8 “Ntchifukwa wuli mwaŵanthu yimwi muwona* kuti vingachitika cha kuti Chiuta wayuski ŵanthu akufwa?
9 Ini pakundija, ndingusimikiza kuti nditenere kuchita vinthu vinandi vakususkana ndi zina laku Yesu waku Nazareti.
10 Venivi ndivu ndachitanga nadi mu Yerusalemu ndipu akupaturika anandi ndaŵajaliyanga mujeri,+ pakuti ŵara ŵa asembi angundipaska mazaza.+ Kweniso asani akupaturika ŵenaŵa akhumbika kubayika, ini ndazomerezanga kuti abayiki.
11 Kanandi ndaŵalanganga mumasinagogi ngosi ndipu ndaŵachichizganga kuti aleki vo agomezganga, ndipuso chifukwa chakuti ndinguŵakwiyiya ukongwa, ndalutanga chinanga ndi mumatawuni nganyaki kuchiŵatombozga.
12 “Ndichichita venivi, pa nyengu yo ndalutanga ku Damasiko mwakupaskika mazaza kweniso mwakutumika ndi ŵara ŵa asembi,
13 ndi msana panthowa, ndinguwona ukweru wakutuliya kuchanya Fumu yangu. Ukweru wo wenga ukulu kuluska kuŵala kwa lumwi ndipu ungundizunguliya limoza ndi ŵanthu wo ndenga nawu.+
14 Ndipu tosi tati tawa pasi, ndinguvwa mazu ngakundikambiya mu Chiheberi kuti: ‘Saulo, Saulo, utinditombozgiyanji? Ujipwetekengi ŵaka asani ulutirizga kupafuwa kusongu kwa mjokonyu.’*
15 Kweni ini ndingukamba kuti: ‘Ndimwi ayani Ambuya?’ Ambuya angukamba kuti: ‘Ndini Yesu yo utimutombozga.
16 Kweni yuka, umi wima. Ndawoneke kwaku yiwi kuti ndikusankhi kuja mteŵeti kweniso kaboni wa vinthu vo wawona kweniso vo ndikulongongi vakukwaskana ndi ini.+
17 Ndipu ndikutaskengi ku ŵanthu yaŵa kweniso ku ŵanthu amitundu yinyaki yo ndikutumengeku+
18 kuti ukaŵajuli masu,+ ukaŵatuzgi mu mdima+ kuluta ku ukweru,+ kweniso ukaŵatuzgi ku nthazi yaku Satana+ kuluta kwaku Chiuta, kuti agowokerekengi maubudi ngawu+ ndipuso kuti alonde chihara pakati pa ŵanthu wo atoweseka chifukwa cha chivwanu chawu mwaku ini.’
19 “Mwaviyo Fumu Agiripa, ini ndingukana cha kuvwiya chiwona chakutuliya kuchanya.
20 Kweni ndinguchipereka uthenga kakwamba ku ŵanthu a ku Damasiko,+ pavuli paki, ku ŵanthu a ku Yerusalemu+ ndi ŵanthu wosi a muchigaŵa cha Yudeya ndipuso ku ŵanthu amitundu yinyaki kuti alapi ndi kung’anamukiya kwaku Chiuta mwakuchita ntchitu zakukoliyana ndi kulapa.+
21 Venivi ndivu vinguchitiska kuti Ayuda andiko munyumba yakusopiyamu ndi kukhumba kundibaya.+
22 Kweni chifukwa chakuwovyeka ndi Chiuta, ndilutirizga mpaka sonu kupereka ukaboni ku ŵanthu ambula kuzirwa ndi akuzirwa. Ndipu ndikamba kanthu kekosi cha, kupatuwaku vo achimi akulemba kweniso vo Mozesi wakulemba kuti vichitikengi,+
23 kuti Khristu watenere kusuzgika+ ndipuso nge munthu wakwamba kuyuskika ku nyifwa,+ wazamupharazga ukweru ku ŵanthu yaŵa ndi ku ŵanthu amtundu yinyaki.”+
24 Sonu Paulo wachijivikiliya ndi fundu zenizi, Fesito wangudaniriza kuti: “Wazunguliya mutu Paulo! Kusambira ukongwa kwayamba kukuzunguza mutu!”
25 Kweni Paulo wangukamba kuti: “Wakutumbikika Fesito, ini ndazunguliya mutu cha, kweni vo ndikamba vauneneska, mutu wangu utenda umampha.
26 Kukamba uneneska, fumu yo ndilongoro nayu mwakufwatuka yitiviziŵa umampha vinthu venivi ndipu ndisimikiza kuti pa vinthu vo ndikamba palivi cho yileka kuziŵa, pakuti palivi cho chikuchitikiya kuseri.+
27 Fumu Agiripa, kumbi mutivigomezga vo achimi akulemba? Ndiziŵa kuti mutivigomezga.”
28 Kweni Agiripa wangukambiya Paulo kuti: “Mu kanyengu kamanavi ungandikopa kuti ndije Mkhristu.”
29 Wati wakamba venivi, Paulo wangukamba kuti: “Ndipempha kwaku Chiuta kuti kwali ndi mu kanyengu kamanavi, kwali ndi mu nyengu yitali, yimwi pe cha kweni ŵanthu wosi wo atindivwa msanawale, mphanyi anguja nge ini kupatuwaku simbi izi za ukayidi.”
30 Pavuli paki, fumu yingusoka ndipu nduna kweniso Berenike limoza ndi ŵanthu wo ŵenga nawu, nawu angusoka.
31 Kweni achituwa, angwamba kukambiskana kuti: “Munthu uyu wachita chinthu chechosi cha chakwenere kuti wabayikiyi pamwenga kuti waŵikikiyi mujeri.”+
32 Pavuli paki, Agiripa wangukambiya Fesito kuti: “Munthu uyu watingi wafwatulikengi asani wanguleka kupempha kuti Kayisara wakayiwoni so nkhani yaki.”+
Mazu Ngam'mphata
^ Mazu ngaki chayingu, “muyeruzga.”
^ Mjokonyu wo ukambika yapa ndi nthonga yakuthwa yakukhweme nyama.
