Nthanthi 19:1-29
19 Nkhanthu kuja mukavu ndi kwenda mwakugomezgeka+Kuluska kuja muzereza ndi kukamba maboza.+
2 Munthu yo waleka kuziŵa vinthu ngwamampha cha,+Ndipu yo wachita vinthu mwakupupuluma* wabuda.
3 Uzereza wa munthu ndiwu utimbanyizga nthowa yaki,Ndipu mtima waki ukwiyiya Yehova.
4 Chuma chichitiska kuti munthu waje ndi mabwezi nganandi,Kweni munthu mukavu watimuthaŵa chinanga ndi mubwezi waki.+
5 Kaboni waboza walekengi cha kulangika,+Ndipu weyosi yo wapusika nyengu yeyosi yo walongoro, waponengi cha.+
6 Ŵanthu anandi akhumba kwanjika ndi munthu wakuzirwa,*Ndipu weyosi ndi mubwezi wa munthu yo wapereka mphasu.
7 Abali wosi a munthu mukavu atimutinkha;+Ndipu abwezi ŵaki atimugwentha ukongwa!+
Iyu watiŵalondo kuti waŵapemphi, kweni palivi yo wamuka.
8 Weyosi yo wasaniya zeru* watanja umoyu waki.+
Weyosi yo ngwakuwamu, vinthu vimuyendiyengi umampha.*+
9 Kaboni waboza walekengi cha kulangika,Ndipu weyosi yo wapusika nyengu yeyosi yo walongoro, waparanyikengi.+
10 Ntchinthu chambula kwenere kuti muzereza wajengi umoyu wamampha;Mwakuyanana ŵaka, ntchinthu chambula kwenere ukongwa kuti mteŵeti walamuliyengi alongozgi!+
11 Zeru za munthu zichitiska kuti ukali waki ugowoki,+Ndipu kuziŵaniza* vo munthu wamunangiya,* kuchitiska kuti wawoneki wakutowa.+
12 Ukali wa fumu we nge kukoroma kwa nkharamu,*+Kweni lisungu laki le nge dungwi lo lawiya pa vakume.
13 Mwana muzereza wachitiska kuti awisi asuzgiki,+Ndipu munthukazi wapamulomu* we nge nyumba yo yilekeza cha kusuluwa.+
14 Ŵana ahara nyumba ndi chuma kutuliya kwa awusewu,Kweni munthukazi wazeru watuliya kwaku Yehova.+
15 Ulesi uchitiska kuti munthu wagoni tulu takufwa natu,Ndipu munthu wamanja ngakulombotoka wajengi ndi nja.+
16 Munthu yo wasunga marangu wasunga umoyu waki;+Kweni yo watenda mwambula kuphwere wafwengi.+
17 Yo wachitiya lisungu munthu wakusika, wabwerekesa Yehova,+Ndipu Iyu wamuweziyengi pa vo wachita.+
18 Langa mwana waku peche chilindizga,+Ndipu ungajanga ndi mulandu wa* nyifwa yaki cha.+
19 Munthu mukali walangikengi;Asani uyesengi kumutaska, uchitengi venivi kaŵikaŵi.+
20 Vwiya ulongozgi ndipu zomera kuchenyeka,+Kuti uzije ndi zeru kunthazi.+
21 Mumtima mwaki, munthu waŵanaŵana vinandi vakuti wachiti,Kweni ulongozgi waku Yehova ndiwu ufiskikengi.*+
22 Chanju chambula kumala ndichu chinthu chakuzirwa ukongwa mwa munthu;+Ndipu nkhanthu kuja mukavu kuluska kuja waboza.
23 Kopa Yehova kulongozge ku umoyu;+Yo wachita venivi wajengi mwakufwasa, kwambula kopa chechosi.+
24 Munthu mulesi wasereza janja laki mumbali ya chakurya,Kweni watondeka kuliweza kuti liluti pamulomu waki.+
25 Puma munthu wakunyoza,+ kuti yo waleka kuziŵa vinandi wachenje,+Kweniso chenya munthu yo wavwisa vinthu, kuti iyu wasazgiyeku kuziŵa vinthu.+
26 Munthu yo watombozga awisi kweniso wadikisa anyinaNdi mwana wakuchitiska soni kweniso wakulengesa.+
27 Wamwana wangu, asani ulekengi kuvwiya ulongozgi,Utuwengepu pa mazu ngazeru.
28 Kaboni waŵakaŵaka wanyoza urunji,+Ndipu mulomu wa munthu muheni, umeza viheni.+
29 Cheruzgu chasungikiya ŵanthu wo anyoza,+Ndipu malikhwechu ngasungikiya msana wa ŵanthu azereza.+
Mazu Ngam'mphata
^ Pamwenga kuti, “watchimbiya ndi maphazi ngaki.”
^ Pamwenga kuti, “wakupaska.”
^ Mazu ngaki chayingu, “wasaniyengi vamampha.”
^ Mazu ngaki chayingu, “mtima.”
^ Pamwenga kuti, “kujumphapu ŵaka pa.”
^ Pamwenga kuti, “ubudi.”
^ Pamwenga kuti, “nkharamu yimana yanthazi.”
^ Pamwenga kuti, “wakusuzga.”
^ Pamwenga kuti, “Ungakhumbanga.” Mazu ngaki chayingu, “Ungasoskiyanga umoyu waku pa.”
^ Pamwenga kuti, “khumbu laku Yehova ndilu lifiskikengi.”
