Ŵanaŵaniyani chakuchitika ichi: Pajumpha myezi yiŵi pe kutuliya po Heather anguziŵiyana ndi Mike. Kweni iyu wafwatuka nayu ukongwa nge kuti wakuziŵana nayu kali. Alembiyana mameseji pafupipafupi, akambisana pafoni kwa nyengu yitali ndipuso akambisana nkhani zachisisi. Kweni Mike wakhorwa cha kuti akambisanengi waka.

M’myezi yiŵi yo yajumpha, Mike ndi Heather aja achikolana manja ndipuso kukisana kwa kanyengu kamanavi. Heather wakhumba cha kuti agonani. Kweni wakhumba so cha kuti Mike wamuleki. Veviyo chifukwa chakuti palivi yo watimuyanja ukongwa kweniso kumulumba kuti wakutowa nge mo Mike wachitiya. Ndipu walongoro yija kuti, ‘Ini ndi Mike te pa chibwezi chakuti . . . ’

Asani mwafika pa msinkhu wakuti mungaja ndi chibwezi, kumbi mungachita wuli asani mungakumana ndi vo Heather wangukumana navu?

Asani mwaswa dangu la boma, nge lakuti mungalutanga cha kucharu chinyaki kwambula makalata nga boma, mukhoza kumangika. Ivi viyanana waka asani mungaleka kuvwiya dangu lakuti: “Mungachitanga cha ureŵi.”—1 Ŵatesalonika 4:3.

Kumbi ntchinthu wuli cho chichitika asani munthu waleka kuvwiya dangu ili? Bayibolu likamba kuti: “Yosi yo wachita ureŵi wanangiya liŵavu laki.” (1 Ŵakorinte 6:18) Ntchifukwa wuli tingakamba kuti fundu iyi njaunenesa?

 Kafukufuku walongo kuti achinyamata anandi wo akugonanapu ndi munthu ŵechendatolani akumana ndi masuzu yanga.

• KUJIMBA MULANDU. Achinyamata anandi wo akugonanapu ndi munthu ŵechendatolani asuzika maŵanaŵanu ukongwa.

• KUKAYIKIYANA. Asani amaliza waka kugonana, weyosi watijifumba kuti, ‘Kumbi munyangu uyu wakugonanapu so ndi munthu munyaki cha?’

• KUGUŴA. Kukamba unenesa asungwana akhumba munthurumi yo wangaŵavikiliya m’malu mwa munthurumi yo wakhumba waka kugonana nawu. Anyamata anandi akopeka cha ndi msungwana yo wazomela kugonana nawu.

• Fundu yakukhumbika ukongwa: Asani muzomela kugonana ndi munthu mwechendatolani ndikuti mutijilengesa ndipu ŵanthu akutumbikeningi so cha. (Ŵaroma 1:24) Liŵavu linu ndakuzirwa ukongwa ndipu mukhumbika kulitumbika!

Longoni kuti mwe ndi nthazi ‘zakukaniya ureŵi.’ (1 Ŵatesalonika 4:3) Asani mwazitolana ndipu mwazamuyamba kugonana. Pa nyengu iyi mwazamukondwa ukongwa ndipu mwazamudandawula cha pamwenga kujimba mlandu nge mo achitiya ŵanthu wo akugonanapu ŵechendatolani.—Nthanthi 7:22, 23; 1 Ŵakorinte 7:3.

• Kumbi munthu yo watikuyanjani nadi wangakuchitiyani vinthu vo vingaŵika umoyu winu pangozi?

• Kumbi munthu yo watikuŵanaŵaniyani wangazomeleza kuti muchiti vinthu vo vingananga ubwezi winu ndi Chiuta?—Ŵahebere 13:4.