Yehova wakhumba kuti ŵanthu akutorana ajengi akugomezgeka ku phanganu la nthengwa. Pa nyengu yo Yehova wangwambisa nthengwa yaku Adamu ndi Eva, wangukamba kuti: ‘Munthurumi . . . wajibatiki ku muwolu waki, ndipu atenere kuja liŵavu limoza.’ Pavuli paki Yesu Khristu wangukamba so kuti: “Viyo  chenicho Chiuta wamangirizga pamoza munthu wangafwatuwanga cha.” (Chiyambo 2:24; Mateyu 19:3-6) Mwaviyo, Yehova ndi Yesu awona kuti nthengwa yitenere cha kumala, kupatuwaku asani yumoza wafwa. (1 Ŵakorinte 7:39) Chifukwa chakuti nthengwa njakupaturika yitenere cha kumala pa vifukwa vambula kuvwika. Kukamba uneneska, Yehova watinkha kupatana kwambula vifukwa va m’Malemba.—Malaki 2:15, 16.

Kumbi Bayibolo likamba kuti nthengwa yingamala pa chifukwa wuli? Yehova watinkha ureŵi. (Chiyambo 39:9; 2 Samuele 11:26, 27; Sumu 51:4) Iyu wawona kuti kuchita ureŵi mbukazuzi ukulu ukongwa, ndichu chifukwa chaki wazomerezga kuti ŵanthu angapatana. (Kuti muziŵi vo ureŵi ung’anamuwa, wonani Mutu 9 ndimi 7.) Yehova wakupereka wanangwa ku munthurumi pamwenga munthukazi wakusankha kumaliska nthengwa pamwenga kulutirizga kuja ndi murumu pamwenga muwolu waki yo wachita ureŵi. (Mateyu 19:9) Mwaviyo, asani munthu wasankha kupatana ndi murumu pamwenga muwolu waki yo wachita ureŵi, ndikuti iyu wananga cha pa masu paku Yehova. Chinanga kuti ve viyo, mpingu wachikhristu uchiska cha kuti ŵanthu apatanengi. Pa vifukwa vinyaki, munthu wangalutirizga kuja ndi murumu pamwenga muwolu waki yo wachita ureŵi, ukongwa asani yo wabuda walapa kutuliya pasi pa mtima. Chinanga kuti pangaŵa chifukwa chakupatiyana, Mkhristu yo wakhumba kupata munyaki watenere kusankha yija ndipuso kuzomerezga masuzgu ngo wangakumana nangu chifukwa cha vo wasankha.—Ŵagalatia 6:5.

Pe vifukwa vinyaki vikuluvikulu, vo vichitiska Akhristu anyaki kusankha kupatana pamwenga kupatukana chinanga kuti munthu yo akutorana nayu wachita ureŵi cha. Asani ve viyo, Bayibolo likamba kuti munthu yo wasankha kutuwaku ku munyaki ‘waje wambula kuyirwa, pamwenga waweliyaniso’ ndi munthu yo wangutorana nayu. (1 Ŵakorinte 7:11) Mkhristu yo wasankha kuchita viyo walivi wanangwa wakuyirwa pamwenga kuto. (Mateyu 5:32) Tiyeni tikambiskani vifukwa vinyaki vo Akhristu anyaki awona kuti nkhwamampha kupatukana.

Asani munthurumi waleke dala kuphwere banja laki. Banja lingayamba kusuzgika ukongwa, kusoŵa vinthu vakukhumbika pa umoyu chifukwa chakuti munthurumi waleke dala kuphwere banja laki chinanga kuti wangafiska kuchita viyo. Bayibolo likamba  kuti: ‘Kweni asani munthu waleka kulongosole [kuphwere] . . . ŵapaki pa nyumba, wakana chivwanu, ndipu ndi muheni kwakuruska mzira chivwanu.’ (1 Timote 5:8) Asani munthurumi yo wakana kusintha jalidu laki, munthukazi wangasankha kupatukana nayu ndi chilatu chakuti waphwere umoyu waki ndipuso wa ŵana ŵaki. Kweni ŵara atenere kweruzga mwakuphwere nkhani yakuti Mkhristu munyaki wakana kuphwere banja laki. Kukana kuphwere banja kungachitiska kuti munthu wasezgeki.

Asani ngwankhaza. Munthu wankhaza wangachita vinthu mwachiwawa vo vingachitiska kuti umoyu wa munthu yo wakutolana nayu uje pa ngozi. Asani Mkhristu ndiyu wachita nkhaza, ŵara m’mpingu atenere kuyiwona umampha nkhani yo. Munthu wangasezgeka asani we ndi jalidu lakufya mtima kweniso kuchita ndewu.—Ŵagalatia 5:19-21.

Asani umoyu wauzimu we pangozi. Munthurumi pamwenga munthukazi wangachitiska kuti munyaki waleki kusopa kwauneneska pamwenga kumuchichizga kuti waswi marangu ngaku Chiuta. Asani ve viyo, munthukazi pamwenga munthurumi wangawona asani kupatukana ndiyu nthowa yija yo yingamuchitiska “kuvwiya Chiuta kwakuruska munthu.”—Machitidu 5:29.

Pa vifukwa vikuluvikulu vo vakonkhoskeka, palivi munthu yo watenere kuchichizga munthurumi pamwenga munthukazi yo waleka kunanaga kuti wapatukani ndi munyaki pamwenga walutirizgi kuja nayu. Chinanga kuti Akhristu anyaki akukhwima mwauzimu ndi ŵara angapereka ulongozgi wa m’Bayibolo kweni angaziŵa vosi cha vo vichitika pakati pa munthurumi ndi munthukazi yo. Yehova pe ndiyu wangaziŵa. Mwaviyo, asani Mkhristu wakuskiyaku masuzgu ngo wenangu ndi chilatu chakuti wapatukani ndi murumu waki pamwenga muwolu waki, ndikuti watumbika Chiuta cha pamwenga nthengwa. Yehova waziŵa chilatu cho munthu yo wakhumbiya kupatukana ndi murumu waki pamwenga muwolu waki chinanga wangabisa wuli. Kukamba uneneska, “vosi ve nkhuli ndi mwazi pa masu ngaku mweniyo te ŵachifukwa nayu.” (Ŵahebere 4:13) Kweni asani masuzgu ngo ngafika pakofya ndipu ngalutiriya, ŵanthu angamususkanga cha Mkhristu yo wasankha kuti wapatukani ndi munthu yo wakutorana nayu chifukwa iyu ndiyu wakumana ndi masuzgu. Pakumaliya, “tosi tamukuma paurongo pa chitengu chakweruzgiyapu chaku Chiuta.”—Ŵaroma 14:10-12.