ŴANTHU ŵati ayamba kwandana, ubudi ndi vinthu viheni vingusapaliya mwaliŵi pacharu chosi. Mchimi munyaki zina laki Enoke, wangutcheŵesa kuti zuŵa linyaki Chiuta wazamunanga ŵanthu wo aleka kumuwopa. Chinanga wuli venga viyo, uheni ungulutiriya mbwenu panthazi. Angelu anyaki angugarukiya Yehova, ndipu angusiya malu ngawu ngo angupaskika kuchanya ndi kusintha maliŵavu ngawu kuja nge ŵanthu ndipu mwambunu angujitole anthukazi kuti aje awolu ŵawu. Kutolana kwambura kwenere kwenuku, kunguchitisa kuti abali ŵana anthazi ukongwa wo adanikanga kuti Anefilimi, wo angupangisa kuti chiwawa ndi kubayana viluti panthazi. Vingumupweteka ukongwa Chiuta, kuwona ŵanthu achisuzgika pacharu chapasi.

Enoke wati wafwa, penga munthu munyaki yo wenga wamampha m’charu cho mwenga ŵanthu aheni. Zina laki wenga Nowa. Iyu ndi banja laki angwesesa kuchita vinthu vamampha paurongo paku Chiuta. Chiuta wati waŵanaŵana za kunanga ŵanthu aheni a m’charu cho, iyu wakhumbanga kuti wataski Nowa ndi nyama za mitundumitundu. Sonu Chiuta wangukambiya Nowa kuti wakhomi chingaraŵa chikulu. M’chingaraŵa chenichi, ndimu Nowa ndi banja laki angusungikiyamu limoza ndi mitundu yakupambanapambana ya nyama, ku zandi yo wanguza pacharu chosi. Nowa wanguvwiya Chiuta. Kwa vyaka pafufupi 40 pamwenga 50 vo Nowa wanguja wachimanga chingaraŵa, iyu wenga ‘mpharazgi wa urunji.’ (2 Petro 2:5) Nowa wangutcheŵeska ŵanthu za kuza kwa Zandi, kweni ŵanthu aziŵanizanga. Sonu nyengu yingufika yakuti Nowa ndi banja laki asere m’chingaraŵa pamoza ndi nyama. Yiwu ŵati asere, Chiuta wangujala chisasa cha chingaraŵa. Pavuli paki vuwa yingwamba kuwa.

Kunguwa chivuwa chikulu ukongwa kwa mazuŵa 40, msana ndi usiku mpaka charu chosi chapasi chingubila. Ŵanthu wosi aheni angumala. Pavuli pa myezi yimanavi, maji ngangwamba kuphwa ndipu chingaraŵa chingujarikika pa phiri. Pa nyengu yo ŵanthu wo wenga m’chingaraŵa angutuliya kubwalu ndipu amala chaka chimoza ŵe m’chingaraŵa. Nowa wangupereka sembi yakuwonga Yehova. Ndipu Chiuta wangusimikiziya Nowa ndi banja laki kuti, Iyu wanangengi so cha chamoyu chechosi cha pacharu chapasi ndi zandi. Yehova wanguŵika chiŵingavuwa kuti chije layizgu lakuwoneka ndi masu ndipuso chikumbusu chakulongo vo wangulayizga.

Pavuli pa Zandi, Chiuta wanguŵapaska marangu ngafya. Iyu wanguŵazomereza kuti aryengi nyama kweni wanguŵakaniza kurya ndopa. Yehova wangukambiya so mphapu yaku Nowa kuti yisapaliyi pacharu chosi chapasi kweni anyaki anguvwiya cha. Ŵanthu angukoliyanaku ndi Nimirode, iyu wanguja mulongozgi wawu ndipu angwamba kuzenga chinyumba chitali mu msumba wa Babele wo unguzidanika kuti Babiloni. Chilatu chawu chenga chakukana vo Chiuta wanguŵakambiya kuti asapaliyi pacharu chosi chapasi. Kweni Chiuta wanguŵatondekesa ŵanthu akugaruka wo, ndipu wangutimbanyiza chineneru chawu ndi kuŵapangisa kuti aŵereŵetengi vineneru vakupambanapambana. Chifukwa chakuti atondekanga kuvwanana, anguleka kuzenga ndipu angumbininika.

​—Nkhani iyi yatuliya pa Chiyambo chaputala 6 mpaka 11; Yuda 14, 15.