SAMBIRU 7
Kumbi Ufumu Waku Chiuta Ntchinthu Wuli?
1. Kumbi Ufumu waku Chiuta ntchinthu wuli?
Kumbi ntchinthu wuli cho chichitisa kuti Yesu waje Fumu yamampha ukongwa?—MARIKO 1:40-42.
Ufumu waku Chiuta ndi boma lakuchanya. Boma lenili ndilu lazamusere mumalu mwa maboma ngosi ngo ngalipu sonu ndipu Chiuta wazakuligwiriskiya ntchitu kuti wafiski khumbu laki kuchanya ndi pacharu chapasi. Vakukondwesa ukongwa kuti Chiuta wazamugwiriskiya ntchitu Ufumu waki munthowa yeniyi. Ŵanthu akhumba boma lamampha. Mwaviyo, Ufumu waku Chiuta wo ndi boma laki ndiwu ufiskengi vo ŵanthu akhumba. Wazamuchitiska kuti ŵanthu wosi azije mwakukoliyana pacharu chapasi.—Ŵerengani Daniyeli 2:44; Mateyu 6:9, 10; 24:14.
Ufumu utenere kuja ndi fumu yaki. Yehova wakusankha Mwana waki Yesu Khristu kuti waje Fumu ya Ufumu Waki.—Ŵerengani Chivumbuzi 11:15.
Woneriyani vidiyo yakuti Kumbi Ufumu Waku Chiuta Nchinthu Wuli?
2. Ntchifukwa wuli Yesu ndi Fumu yamampha ukongwa?
Yesu, Mwana waku Chiuta ndi Fumu yamampha ukongwa chifukwa chakuti ngwalisungu kweniso watanja urunji. (Mateyu 11:28-30) Iyu we ndi nthazi zakukwana zakuti wangawovye ŵanthu chifukwa wazamulamuliya charu chapasi we kuchanya. Wati wayuskika, iyu wanguluta kuchanya ndipu wanguchija kujanja lamaryi laku Yehova, kulindizga kuti wamupaski Ufumu. (Aheberi 10:12, 13) Pavuli paki, Chiuta wangumupaska nthazi zakuti wayambi kulamuliya.—Ŵerengani Daniyeli 7:13, 14.
3. Kumbi mbayani wo amulamuliya ndi Yesu?
Gulu lo lidanika kuti “ŵanthu akupaturika,” ndilu lamulamuliya ndi Yesu kuchanya. (Daniyeli 7:27) Akutumika aku Yesu ndiwu ŵenga akwamba kusankhika. Yehova walutirizga kusankha ŵanthu akupaturika mpaka sonu. Asani ŵafwa, yiwu ayuka ndi liŵavu lauzimu nge po Yesu wanguchitiya.—Ŵerengani Yohane 14:1-3; 1 Akorinto 15:42-44.
Kumbi mbanthu alinga wo akengi kuchanya? Yesu wangukamba kuti ŵanthu ŵenaŵa adanika kuti “a kamskambu kamana.” (Luka 12:32). Wosi pamoza akwana 144,000. Yiwu amulamuliya charu chapasi pamoza ndi Yesu.—Ŵerengani Chivumbuzi 14:1.
4. Ntchinthu wuli chinguchitika Yesu wati wayamba kulamuliya?
Ufumu waku Chiuta ungwamba kulamuliya mu 1914. * Yesu wati wayamba kulamuliya nge Fumu wanguponya dankha Satana ndi viŵanda vaki pacharu chapasi. Venivi vingumukwiyisa ukongwa Satana ndipu wangwambisa masuzgu pacharu chosi chapasi. (Chivumbuzi 12:7-10, 12) Kwambiya nyengu yeniyi, masuzgu nga ŵanthu ngamala cha. Nkhondu, nja, miliri ndipuso vidilirisi, ntchigaŵa cha “chisimikizu” chakuti pambula kuswera yapa, Ufumu waku Chiuta uyambengi kulamuliya charu chapasi.—Ŵerengani Luka 21:7, 10, 11, 31.
5. Kumbi ndi vinthu wuli vo Ufumu waku Chiuta wafiska?
Ntchitu yakupharazga yo yichitika pacharu chosi chapasi yayambapu kali kuwovya ŵanthu a mskambu ukulu akutuliya mumitundu yosi kuti ajengi mwachimangu. Ŵanthu akufwasa mamiliyoni nganandi alongozgeka ndi Yesu yo ndi Fumu. Ufumu waku Chiuta wazakuŵavikiliya pa nyengu yo mgonezu uheni uwu wazamutuzgikapu pacharu chapasi. Mwaviyo, wosi wo akhumba kuzikondwa ndi Ufumu waku Chiuta atenere kuvwiya Yesu.—Ŵerengani Chivumbuzi 7:9, 14, 16, 17.
Mu nyengu ya vyaka 1,000, Ufumu wazamufiska vo Chiuta wakhumbanga kuchitiya ŵanthu pakwamba. Charu chosi chazamuja paradayisu. Pakumaliya, Yesu wazamuweze Ufumu kwa Awisi. (1 Akorinto 15:24-26) Kumbi pe munthu yo mungayanja kumukambiyaku va Ufumu waku Chiuta?—Ŵerengani Masalimo 37:10, 11, 29.
^ ndimi 6 Kuti muziwi vinandi, vakukwaskana ndi uchimi wa mu Bayibolu wo ukamba va chaka cha 1914, wonani buku lakuti Kumbi Tingasambiranji m’Bayibolu? peji 217-220.
