Ŵanthu angukwaskika ukongwa ŵati awona kuti Yesu waryiska ŵanthu masawuzandi nganandi mwakuziziswa, ndipu angukamba kuti: “Uyu ndi Mchimi nadi yo wangukambikiya limu kuti wazengi pacharu chapasi.” Achikamba kuti mchimi, akambanga Mesiya ndipu anguwona kuti Yesu wangaja fumu yawu chifukwa wangafiska kuchita vo yiwu akhumbanga. (Yohane 6:14; Marangu 18:18) Mwaviyo, ŵanthu ŵenaŵa akhumbanga kuko Yesu kuti amuvwaliki ufumu.

Kweni Yesu wanguziŵa vo ŵanthu ŵenaŵa akhumbanga kuchita. Mwaviyo, wanguŵakambiya kuti akengi ndipu wangukambiya akusambira ŵaki kuti akweri boti. Kumbi yiwu anguluta nunkhu? Yiwu anguselere ku Betisayida ndipu pavuli paki anguluta ku Kaperenao. Pa nyengu yeniyi, Yesu wanguluta yija kuphiri kuti wakapempheri ndi usiku.

Kwati kwaja kamanavi kucha, Yesu wanguwona boti lo lenga chapataliku chifukwa chakuti kwenga mwezi. Panyanja penga mphepu yanthazi yo yachitiskanga mayiŵa ndipu akutumika ‘asuzgikanga kuvuŵa, chifukwa alutanga ko kwatuliyanga mphepu.’ (Mariko 6:48) Yesu wangusika kuphiri ndi kwamba kwenda pamaji ndipu walazanga ko kwenga akutumika. Pa nyengu iyi, ndipu yiwu “avuŵa kwa makilomita pafufupi 5 pamwenga 6.” (Yohane 6:19) Akusambira anguja nge awona Yesu wachijumpha pafupi ndi yiwu ndipu angudaniriza kuti: “Ndi malotu kwali!”—Mariko 6:49.

Yesu wanguŵachiska po wangukamba kuti: “Khwimani mtima! Ndini, mungawopanga cha.” Kweni Peturo wangukamba kuti: “Ambuya, asani ndimwi nadi, ndilamuleni kuti ndiyendi pamaji ndizi kwaku yimwi.” Yesu wangumuka kuti: “Zanga!” Sonu Peturo wangusika muboti ndi kwamba kwenda pamaji kuluta ko kwenga Yesu. Kweni wati wawona chimphepu, Peturo wanguchita mantha ndipu wangwamba kubira. Iyu wangudaniriza kuti: “Ambuya, nditaskeni!” Pavuli paki, Yesu wangutambasuwa janja laki ndi kumuko, ndipu wanguti: “Wa munthu wachivwanu chimana yiwi, ntchifukwa wuli ungwamba kukayika?”—Mateyu 14:27-31.

Pavuli paki, Peturo ndi Yesu angukwera muboti ndipu chimphepu chinguleka. Akusambira ŵaki anguzizwa ukongwa. Kweni kumbi yiwu akhumbikanga nadi kuzizwa? Yiwu angumuwona Yesu wachiryisa ŵanthu masawuzandi nganandi mwakuziziswa. Asani anguvwisa “vo viŵandi viya vang’anamuwanga,” pa chakuziziswa chenichi, atingi azizwengi cha kuwona Yesu wachiyenda pamaji kweniso kulekeska mphepu yanthazi. Chifukwa cha vo vinguchitika, yiwu angumugwadiya ndipu angukamba kuti: “Ndimwi nadi Mwana waku Chiuta.”—Mariko 6:52; Mateyu 14:33.

Pati pajumpha nyengu yimanavi, yiwu angufika muchigaŵa chakutowa kweniso chanyata cha Genesareti cho chenga kumwera kwa Kaperenao. Angusiya maboti ngawu kwenuku ndipu anguluta ku mtunda. Ŵanthu a kwenuku angumuziŵa Yesu ndipuso anyaki a muvigaŵa vakufupi, anguza ndi ŵanthu wo atamanga kuti Yesu waŵachizgi. Asani ŵanthu wo atamanga ako ŵaka chakuvwala chaku Yesu, achiranga nyengu yeniyo.

Venivi vichichitika, ŵanthu wo Yesu wanguŵaryisa mwakuziziswa, anguziŵa kuti iyu watuwamu muchigaŵa chawu. Mwaviyo, maboti ngamanangamana ngakutuwa ku Tiberiya ngati ngafika, yiwu angukwera maboti ngenanga ndi kuluta ku Kaperenao kuti akapenji Yesu. Ŵati amusaniya angumufumba kuti: “Rabi, mwaza zuŵanji kunu?” (Yohane 6:25) Kweni Yesu wanguŵachenya ndipu nkhani yakulondopu yikonkhoskengi chifukwa cho iyu wanguŵachenye.