CHIFUKWA chakuti tija mucharu chamasuzgu, tikhumbika kuyesesa kuti tije ndi chimangu. Kweni chinanga tingaja ndi nachu, kanandi chiswera cha kumala. Kumbi Mazu ngaku Chiuta ngakamba kuti ndi vinthu wuli vo vingatiwovya kuti tisaniyi chimangu cheneku? Kumbi tingaŵawovya wuli ŵanthu kuti asaniyi chimangu?

Tija ndi chimangu cheneku asani tileka kopa kweniso kufipa mtima ndi chinthu chinyaki chechosi. Tikhumbika so kuja pa ubwezi ndi ŵanthu. Kweni chakukhumbika ukongwa nkhuja pa ubwezi ndi Chiuta. Kumbi tingachita wuli venivi?

Tilongo kuti tigomezga Yehova kweniso kuti tikhumba kuja nayu pa ubwezi asani tivwiya marangu ngaki. (Yere. 17:7, 8; Yako. 2:22, 23) Asani tichita viyo, nayu wandere kwaku isi ndipu watitipaska chimangu cha mumtima. Lemba la Yesaya 32:17 likamba kuti: ‘Urunji weneku utovya kuti paje chimangu, ndipu chipasu cha urunji weneku ndi bata ndi chimangu chambula kumala.’ Mwaviyo, tingasaniya chimangu cha mumtima asani tivwiya Yehova ndi mtima wosi.—Yesa. 48:18, 19.

Chinthu chinyaki cho chititiwovya kuja ndi chimangu, ndi mzimu wakupaturika wo Ada ŵidu akuchanya atitipaska.—Machi. 9:31.

Pa mijalidu 9 yo Paulo wangukamba kuti “mzimu utuzga,” chimangu che pa nambala 3. (Aga. 5:22, 23) Mzimu waku Chiuta ndiwu utitiwovya kuja ndi chimangu. Mwaviyo, tikhumbika kulongozgeka ndi mzimu uwu kuti tije ndi chimangu cheneku. Kumbi mzimu waku Chiuta utitiwovya wuli kuja ndi chimangu? Tiyeni tiwoni nthowa ziŵi.

 Chakwamba, tija ndi chimangu asani tiŵerenga mazu ngaku Chiuta kaŵikaŵi. (Sumu 1:2, 3) Asani tiŵanaŵaniyapu vo taŵerenga mu Bayibolu, mzimu waku Chiuta utitiwovya kuziŵa maŵanaŵanu ngaku Yehova pa nkhani zakupambanapambana. Mwakuyeruzgiyapu, tiwona mo iyu wachitiya vinthu mwachimangu kweniso chifukwa cho iyu watanjiya chimangu. Asani tigwiriskiya ntchitu vo tisambira mu Mazu ngaku Chiuta tija ndi chimangu chikulu.—Nthanthi 3:1, 2.

Chachiŵi, titenere kupemphera kwaku Chiuta kuti watipaski mzimu wakupaturika. (Luka 11:13) Yehova wakamba kuti asani titimupempha kuti watiwovyi, ‘chimangu chaki cho chiluska kuziŵa vinthu kosi, chivikiliyengi mitima yidu ndi maŵanaŵanu ngidu kuporote mwaku Khristu Yesu.’ (Afi. 4:6, 7) Asani nyengu zosi tipemphera kwaku Yehova kuti watipaski mzimu waki, iyu watitipaska chimangu cha mumtima cho ŵanthu wo ŵenayu pa ubwezi atuŵa nachu.—Aro. 15:13.

Anyaki asintha nkharu yawu chifukwa cha kugwiriskiya ntchitu ulongozgi wa mu Malemba. Ivi vitiŵawovya kuja pa chimangu ndi Yehova ndi ŵanthu anyawu. Vitiŵawovya so kuja ndi chimangu cha mumtima. Kumbi achita wuli venivi?

Mumpingu mazuŵa nganu mwe anyaki wo “ayanjanga kukalipa” kweni sonu mbalisungu, mbakuzizipizga kweniso achita vinthu mwachimangu ndi anyawu. * (Nthanthi 29:22) Ivi ndivu anguchita apharazgi ŵaŵi. Yiwu anguwovyeka kuleka mtima wa kunjoŵi ndi kwamba kuchita vinthu mwachimangu ndi anyawu.

David wayanjanga kukamba vinthu viheni chifukwa cha maŵanaŵanu ngaheni ngo wenga nangu. Wechendasambiri uneneska, kanandi iyu wakambanga vinthu viheni va anyaki ndipu wakalipiyanga apapi ndi abali ŵaki. David wanguwona kuti wakhumbikanga kusintha ndi kwamba kuchita vinthu mwachimangu ndi anyaki. Kumbi wanguchita wuli kuti wasaniyi chimangu? Iyu wanguti: “Ndingwamba kugwiriskiya ntchitu fundu za mu Bayibolu pa umoyu wangu ndipu ivi vinguwovya kuti tiyambi kupaskana ulemu mubanja mwidu.”

 Chifukwa cha mo wangulereke, Rachel wenga ndi mtima wakunjoŵi. Iyu wangukamba kuti, “Mpaka sonu ndeche kusuzgika ndi mtima wakunjoŵi chifukwa mubanja mwidu weyosi wenga mukali.” Kumbi ntchinthu wuli cho chingumuwovya kuti wasinthi? Iyu wangukamba kuti, “Ndapempheranga kwaku Yehova kaŵikaŵi kuti wandiwovyi.”

David ndi Rachel ndi vakuyeruzgiyapu viŵi pe vo vilongo kuti tija achimangu asani tigwiriskiya ntchitu ulongozgi wa mu Malemba ndi kugomezga mzimu waku Chiuta kuti utiwovyi. Chinanga kuti tija mucharu chiheni, tingaja ndi chimangu chamumtima cho chingatiwovya kuti tikoliyanengi ndi wanthu a mubanja lidu ndipuso Akhristu anyidu. Kweni Yehova watitipempha kuti ‘tijengi mwachimangu ndi ŵanthu wosi.’ (Aro. 12:18) Kumbi ivi vingachitika nadi? Kumbi tisaniya vitumbiku wuli asani titesesa kuja mwachimangu ndi anyidu?

Asani tipharazgiya ŵanthu Ufumu waku Chiuta, titiŵawovya kuti aje ndi chimangu. (Yesa. 9:6, 7; Mate. 24:14) Vakukondwesa kuti ŵanthu anandi avwisiya. Uthenga uwu utiŵawovya kuti aleki kufipa mtima pamwenga kukwiya chifukwa cha vo vichitika mucharu. Mumalu mwakukwiya, yiwu alindizga vinthu vamampha kunthazi ndipu ‘apenja chimangu ndi kuchilondo.’—Sumu 34:14.

Kweni mbanthu wosi cha wo avwisiya uthenga wo tipharazga. (Yoha. 3:19) Chinanga kuti ve viyo, mzimu waku Chiuta utitiwovya kuti tikambiskanengi nawu mwachimangu kweniso mwaulemu asani titiŵapharazgiya. Asani tichita viyo, tilondo ulongozgi wo Yesu wangukamba pa Mateyu 10:11-13. Iyu wanguti: “Muchisere munyumba, tawuzgani ŵanthu a munyumba yo. Asani nyumba yo njakwenere, chimangu cho mutiyikhumbiya chiŵi panyumba yo; kweni asani njambula kwenere, chimangu chinu chiwere kwaku yimwi.” Asani tilondo ulongozgi wo Yesu wangukamba, tija ndi chimangu mumtima kweniso tigomezga kuti munthu yo wakana wangazivwisiya kunthazi.

Tija so mwachimangu ndi ŵanthu asani tikambiskana ndi arara aboma mwaulemu, chinanga angaŵa wo asuska ntchitu yidu. Mwakuyeruzgiyapu, boma linyaki kunu ku Africa lingukaniza abali kuzenga Nyumba za Ufumu chifukwa cha kuŵatinkha. Kuti amalisi nkhani iyi mwachimangu, mubali yo wanguteŵetiyapu nge mumishonale mucharu ichi, wangutumika kuti wakakambiskani ndi kazembi wa charu ichi yo waja mutawuni ya London, ku England. Iyu wangukambiya kazembi uyu ntchitu yo Akaboni achita mucharu chaki. Kumbi ivi vinguwovya wuli?

Mubali uyu wangukamba kuti, “Ndati ndafika pakufikiya alendu, ndinguziŵiya malaya kuti munthukazi yo wangundilonde wenga wa chineneru cho ini ndingusambira. Mwaviyo ndingumutawuzga mu chineneru chaki. Chifukwa cha kuzizwa iyu wangundifumba kuti, ‘Tikuwovyeni wuli?’ Ndingumukambiya mwaulemu kuti ndikhumba kukumana ndi Kazembi. Iyu wangumumbiya foni kazembi ndipu wati waza wangunditawuza mu chineneru chaki. Pavuli paki, ndingumukambiya vo Akaboni aku Yehova achita ndipu iyu wanguvwisiya mwakuphwere.”

Chifukwa chakuti mubali uyu wangukonkhoska mwaulemu, vinguwovya kuti kazembi uyu waleki kuja ndi maŵanaŵanu ngaheni ngakukwaskana ndi ntchitu yidu. Pati pajumpha nyengu boma linguŵazomereza abali kuzenga Nyumba za Ufumu. Abali angukondwa ukongwa. Pade pa chimangu, tisaniya so vitumbiku vinyaki vinandi asani titumbika anyidu.

Mazuŵa nganu, ŵanthu aku Yehova aja mwachimangu pakati pawu. Asani namwi muyesesengi kuja ndi jalidu ili, muwovyengi kuti chimangu ichi chilutiliyi. Chakuzirwa ukongwa ntchakuti asani muchitengi viyo, Yehova wakuyanjeningi ndipu mwazamusaniya chimangu chambula kumala mucharu chifya.—2 Petu. 3:13, 14.