KUMBI NAMWI mukujapu ndi maŵanaŵanu ngaviyo mwakuti mwakhumbanga kuti mufwi waka? Asani ndi viyo, mungavwisa mo Adriana wanguvwiya. Iyu wangusuzgika ukongwa maŵanaŵanu, wenga ndi chitima kweniso wengavi chilindizga. Adriana angumusaniya ndi nthenda yakusuzgika maŵanaŵanu.

Ŵanaŵaniyani so vo vinguchitikiya munthulumi munyaki wa ku Japan, zina laki Kaoru. Iyu waphweriyanga apapi ŵaki akukota wo atamanga ndipu wangukamba kuti: “Pa nyengu iyi, ndasuzgikanga maŵanaŵanu chifukwa anyangu andisuzganga ukongwa ku ntchitu. Pati pajumpha nyengu, chakurya chinguleka kundinowe ndipuso ndasuzgikanga kugona. Pakumaliya, ndingwamba kuŵanaŵana kuti masuzgu ngosi yanga ngangamala asani ndingafwa waka.”

Munthulumi munyaki wa ku Nigeria zina laki Ojebode wangukamba kuti: “Nyengu zosi ndajanga ndi chitima mwakuti mpaka ndaliyanga. Mwaviyo, ndapenjanga nthowa yakuti ndifwiyi waka.” Vakukondwesa ukongwa kuti Ojebode, Kaoru ndipuso Adriana angujibaya cha. Kweni chaka chechosi ŵanthu masauzandi nganandi atijibaya.

Anandi mwa ŵanthu wo atijibaya, mbanthulumi. Ndipu anandi mwa ŵanthu ŵenaŵa achitanga soni kupempha chovyu kwa anyawu. Yesu wangukamba kuti ŵanthu wo atama ndiwu akhumba dokotala. (Luka 5:31) Asani namwi musuzgika maŵanaŵanu ndipu mukhumba kujibaya, mungalekanga cha kupempha chovyu. Anandi mwa ŵanthu wo asuzgika maŵanaŵanu awona kuti kulonde chovyu chakuchipatala kutiŵawovya kuti avwengi umampha kweniso kuti akunthiyengepu. Ojebode, Kaoru ndipuso Adriana, wosi angulonde chovyu chakuchipatala ndipu sonu avwiyaku umampha.

Madokotala ngangagwiriskiya ntchitu munkhwala, kukambiskana ndi ŵanthu pamwenga angagwiriskiya ntchitu nthowa zosi ziŵi kuti ngawovyi ŵanthu wo asuzgika maŵanaŵanu. Ŵanthu wo atama matenda ngakusuzgika maŵanaŵanu akhumba kuti ŵanthu a m’banja lawu kweniso anyawu aŵavwisengi, achitengi nawu vinthu mwakuzikira, aŵaphweriyengi kweniso aŵawovyengi. Kweni bwezi lamampha ukongwa lo munthu weyosi wangaja nalu ndi Yehova Chiuta, yo wapereka chovyu chamampha ukongwa kuziya mu Mazu ngaki, Bayibolu.

Ŵanthu wo asuzgika maŵanaŵanu akhumbika kulonde chovyu chakuchipatala kwa nyengu yitali, kweniso akhumbika kusintha mo achitiya vinthu pa umoyu wawu. Kweni asani namwi mutama matenda ngakusuzgika maŵanaŵanu, mungaja ndi chilindizga chamampha ukongwa nge mo wanguchitiya Ojebode. Iyu wangukamba kuti: “Ndilindizga nyengu yo ndikhumba kuziwona kufiskika kwa lemba la Yesaya 33:24, lo likukambiya limu nyengu yo pacharu chapasi pazamuŵavi munthu yo wazamukamba kuti ‘Ndatama.’” Mwakuyanana ndi Ojebode, namwi muchiskikengi ndi layizgu laku Chiuta la “charu chapasi chifya” mo mwazamuŵavi “urwirwi.” (Chivumbuzi 21:1, 4) Layizgu lenili lilongo kuti kusuzgika kweniso kuvwa urwirwi, vosi vazamumaliya limu. Ndipu urwirwi wosi wo mutuvwa la urwirwi winu ‘wazamukumbukika so cha, kweniso wazamusere so mumtima [winu] cha.’—Yesaya 65:17.