Mu nkhani yo yajumpha tinguwona chisimikizu cho Yesu wangukamba. Chisimikizu chenichi chipereka ukaboni wambula kususkika wakuti Ufumu waku Chiuta ukujalikiskika kuchanya ndipu Yesu ndiyu Fumu ya Ufumu wenuwu.

Bayibolu likamba kuti Yesu wati wayamba kulamuliya, wangudikisa Satana ndi angelu ŵaki aheni kuchanya. Pasonu panu, Satana ndi angelu ŵaki atimbanyizga vinthu ukongwa pacharu chapasi ndipu venivi vachitiska kuti vinthu vinangiki ukongwa kutuliya mu chaka cha 1914.​—Chivumbuzi 12:7, 9.

Chinanga kuti vinthu vanangika ukongwa pacharu chapasi, Yesu nge Fumu ya Ufumu waku Chiuta wachitapu vinthu vinyaki kuti wawovyi ŵanthu. Titimuwonga ukongwa Yesu chifukwa chakulongozga pa ntchitu yapacharu chosi yakusambiza ŵanthu Bayibolu yo wangukambiya limu kuti yazamuchitika. Ntchitu yeniyi yitovya ŵanthu kuti agwiriskiyengi ntchitu fundu za mu Bayibolu zo asambira. (Yesaya 2:2-4) Ŵanthu mamiliyoni nganandi wo asambira Bayibolu asintha ndipu aleka kuwona ntchitu kuti ndiyu yakukhumbika ukongwa pa umoyu wawu, vinthu vitiŵayende umampha mu banja kweniso aziŵa kuti vinthu vakuliŵavu ndivu vakukhumbika ukongwa cha. Ŵanthu ŵenaŵa  asambira kuchita vinthu vo vingaŵawovya sonu ndipu asintha umoyu wawu ndikuja ŵanthu wo Chiuta wakhumba mu Ufumu waki.

Chinanga kuti Yesu wakwamba kali kulamuliya kuchanya kweni maboma nga ŵanthu nangu ngechekulamuliya pacharu chapasi. Chiuta wakutuma Yesu kuti: “Luta pakati pa arwani ŵaku ukaŵathereski.” (Sumu 110:2) Pambula kuswera yapa, Yesu watuzgiyengepu limu ŵanthu wosi wo asuskana ndi ulamuliru waki ndipu wawovyengi ŵanthu wo avwiya Chiuta kuti apumuwi kumasuzgu ngosi.

Pa nyengu iyi, Ufumu waku Chiuta

• Wazamutuzgapu visopa vosi vaboza. Visopa vosi vo visambiza vinthu vaboza vakukwaskana ndi Chiuta kweniso vo vachitiska kuti ŵanthu asuzgikengi, vazamutuwapu. Bayibolu likamba kuti visopa vosi vaboza ve nge huli. Ŵanthu anandi azamuguŵa ukongwa ndikubayika kwa huli lenili.​—Chivumbuzi 17:15, 16.

• Wazamutuzgapu maufumu ngosi nga ŵanthu. Ufumu waku Chiuta wazamutuzgapu maulamuliru ngosi nga ŵanthu.​—Chivumbuzi 19:15, 17, 18.

• Wazamutuzgapu ŵanthu wosi wo achita vinthu viheni. Kumbi ntchitu wuli cho chazamuchitikiya ŵanthu wo alimbikiya kuchita vinthu viheni ndipuso wo akana kuvwiya Chiuta? Bayibolu likamba kuti: “Kweni ŵanthu aheni adumulikengemu mucharu, ndipu ŵanthu aryarya atuzgikengemu.”​—Nthanthi 2:22.

• Wazamutuzgapu Satana ndi angelu ŵaki aheni. Satana ndi angelu ŵaki aheni azamutuzgikapu “kuti aleki kulandizga mitundu ya ŵanthu.”​—Chivumbuzi 20:3, 10.

Kumbi venivi vazakuŵawovya wuli ŵanthu wo azomera Ufumu waku Chiuta?

Po walamuliya nge Fumu kuchanya, Yesu waŵachitiyengi vinthu vinandi ŵanthu pacharu kuluska vosi vo akulamuliya achitapu. Iyu wachitengi ivi limoza ndi ŵanthu akukwana 144,000 wo akusankhika kutuliya pacharu chapasi kuti akalamuliyi nayu limoza. (Chivumbuzi 5:9, 10; 14:1, 3) Yesu wawonesesengi kuti khumbu laku Chiuta lafiskika pacharu chapasi. Kumbi Ufumu waku Chiuta uŵachitiyengenji ŵanthu pacharu?

• Wazamutuzgapu matenda ndi nyifwa. “Palivi wakuja mucharu cho yo wazamukamba kuti: ‘Ndatama,’” ndipu “nyifwa yazamuŵaku so cha.”​—Yesaya 33:24; Chivumbuzi 21:4.

• Wazamuwovya ŵanthu kuti azijengi mwachimangu kweniso mwakuvikilirika. “Chimangu cha ŵana ŵaku chazamuja chikulu,” ndipu “weyosi wazamuja pasi pa chimiti chaki cha mphereska kweniso pasi pa chimiti chaki cha mkuyu, ndipu palivi munthu yo wazakuŵawofya.”​—Yesaya 54:13; Mika 4:4.

• Wazamuwovya ŵanthu kuti azigwirengi ntchitu yamampha. “Ndipu ŵanthu ŵangu akusankhika azamukondwa ukongwa ndi ntchitu za manja ngawu. Yiwu azamugwira ntchitu paŵaka cha.”​—Yesaya 65:22, 23.

• Wazamusintha charu kuti chizije chamampha. “Chipululu ndipuso charu chakumira, vazamukondwa, ndipu chipalamba chazamukondwa kweniso kuchita maluŵa.”​—Yesaya 35:1.

• Wazamusambiza ŵanthu vo angachita kuti azije kwamuyaya. “Azamusaniya umoyu wamuyaya asani aziŵa yimwi Chiuta yija wauneneska, ndi Yesu Khristu yo mungumutuma.”​—Yohane 17:3.

Chiuta wakhumba tizikondwi ndi vitumbiku venivi. (Yesaya 48:18) Nkhani yakulondopu yikonkhoskengi vo mungachita kuti namwi muzilonde vitumbiku venivi.