Chiuta wakuŵapaska mphasu yapade ukongwa ŵanthu. Mphasu iyi njakuti akambiskanengi nayu mu pempheru ndi kumukonkhoske maŵanaŵanu ngawu. Mchimi Davidi wangukamba kuti: “Yimwi Wakuvwa pempheru, ŵanthu amitundu yosi azengi kwaku yimwi.” (Sumu 65:2) Kweni tingachita wuli kuti Chiuta wavwengi mapempheru ngidu kweniso kuti watitumbiki?

Mapempheru nginu ngatovya kuti mumujuliyengi mitima yinu Chiuta ndi kumukambiya mo muvwiya mumtima. (Sumu 62:8) Chiuta Wanthazizosi watanja mapempheru ngakutuliya pasi pa mtima.

Chinanga kuti Chiuta we ndi mazina nganandi ngaudindu, kweni we ndi zina laki chayilu. “Ini ndini Yehova. Lenili ndilu zina langu.” (Yesaya 42:8) Zina lakuti Yehova lisanirika maulendu 7,000 mu Malemba Ngakupaturika. Achimi anandi azumbuwanga zina chayilu laku Chiuta asani apemphera kwaku iyu. Abrahamu wangukamba kuti: “Yehova . . . ndizomerezeni kuti ndilutirizgi kulongoro [namwi].” (Chiyambo 18:30) Nasi tikhumbika kugwiriskiya ntchitu zina laku Chiuta lakuti Yehova asani tipemphera.

Chiuta wavwisa maŵanaŵanu ngidu ndipuso mo tivwiya kaya tilongoro chineneru wuli. Mazu ngaki ngatitisimikiziya kuti: “Chiuta walivi sankhu, kweni iyu walondere munthu wakutuliya mu mtundu wewosi yo watimuwopa ndi kuchita urunji.”—Machitidu 10:34, 35.

Kweni pe vinthu vinandi vo tikhumbika kuchita kuti watitumbiki, kuluska waka kupemphera. Mu nkhani yakulondopu, tikambiskanengi vo tikhumbika kuchita.