Ndikuwiya mutawuni ya Ciudad Mante, chigaŵa chakutowa cha Tamaulipas, ku Mexico. Ŵanthu anandi mutawuni iyi mbalisungu kweniso mbamasangu. Kweni chifukwa chakuti ŵanthu anandi avwiyanga marangu cha, malu nganyaki ngenga ngakofya.

M’banja lidu tengamu ŵana anthurumi anayi ndipu ini ndenga wachiŵi. Ndingubatizika mutchalitchi la Katolika, ndipu pavuli paki, ndambanga kwaya. Ndavwiyanga Chiuta chifukwa chakuti ndawopanga kuti wangazindiwotcha kwamuyaya ku helu.

Ndati ndakwanisa vyaka 5, Ada angutithaŵa. Ivi vingundiŵaŵa ukongwa mumtima. Ndinguvwisa cha chifukwa cho anguchitiya venivi pakuti taŵayanjanga ukongwa. Ama angwamba kugwira ntchitu kwa nyengu yitali kuti afiski kuphwere taŵana.

Chifukwa chakuti panyumba pengavi wakutiwonere, ndagwenthanga kusukulu kuti nkhachezengi ndi ŵana anyangu wo ŵenga ara kwaku ini. Yiwu angundisambiza kutuka, kukweŵa foja, kuba kweniso ndewu. Chifukwa chakuti ndayanjanga kuchitiya nkhaza anyangu, ndingusambira kupuma ŵanthu munthowa zakupambanapambana, kusazgapu kugwirisiya ntchitu vidya. Ndenga mnyamata wandewu. Ndayanjanga kupumana ndi ŵanthu mwakugwirisiya ntchitu futi, ndipu kanandi andisiyanga nde ndi ndopa bwekabweka kweniso nde pafupi kufwa. Ama ŵangu ndiwu anditonga kuluta nani kuchipatala ndipu yiwu adandawulanga ukongwa.

Ndati ndakwanisa vyaka 16, Jorge yo takuliyanga limoza wanguza kunyumba kwidu. Iyu wangutikambiya kuti ndi Kaboni waku Yehova ndipu wakhumba kutikambiyaku uthenga wakukhumbika ukongwa. Wangwamba kutikonkhose vo iyu wagomeza mwakugwirisiya ntchitu Bayibolu. Ndenga ndechendaŵerengepu Bayibolu. Ndingukondwa ukongwa kuziŵa zina laku Chiuta kweniso vo wakhumba kuzichita kunthazi. Jorge wangutipempha kuti wayambi kusambira nasi Bayibolu ndipu tinguzomera.

Ndingukondwa ukongwa kuziŵa kuti fundu yakuti Chiuta wazamulanga ŵanthu ndi motu njaboza. (Sumu 146:4; Wakutaula 9:5) Ndati ndaziŵa venivi ndinguleka kopa Chiuta mwambula kwenere. M’malu mwaki, ndingwamba kumuwona kuti ndi Da wachanju yo watiŵakhumbiya vamampha ŵana ŵaki.

 Ndati ndasambira Bayibolu kwa kanyengu, ndinguwona kuti ndikhumbika kusintha. Ndakhumbikanga kuja wakujiyuyuwa kweniso kuleka kuchita ndewu. Fundu ya pa lemba la 1 Ŵakorinte 15:33 yingundiwovya ukongwa. Lemba ili likamba kuti, ‘Kwanjana ndi ŵanthu a mijalidu yiheni kunanga mijalidu yamampha.’ Ndinguwona kuti asani ndikhumba kusintha, nditenere kuleka kuchita vinthu ndi ŵanthu a mijalidu yiheni. Mwaviyo, ndingwamba kucheza ndi Akaboni aku Yehova wo agwirisiya ntchitu fundu za m’Bayibolu kuti amalisi mphindanu m’malu mwakupumana.

Lemba la Ŵaroma 12:17-19 nalu lingundiwovya ukongwa. Lemba ili likamba kuti: “Mungaweziyanga chiheni pa chiheni cha. . . . Asani vingachitika, muje mwachimangu ndi ŵanthu wosi mwakuyanana ndi mo mungafiskiya. . . . Mungaweziyanga cha, . . . chifukwa kukulembeka kuti: ‘“Kuweze nkhwangu,” watiti Yehova.’” Lemba ili lingundiwovya kuziŵa kuti Yehova ndiyu wazamuchitapu kanthu pa vinthu vambula urunji ndipu wazamuchita venivi pa nyengu yakwenere. Kamana ndi kamana, ndinguleka kwanja ndewu.

Ndiluwa cha vo vinguchitika zuŵa linyaki ndi mazulu ndichiwere kunyumba. Kagulu ka achinyamata wo kali ndatinkhananga nawu kangundiyukiya ndipu kenga ndi mulongozgi wawu. Iyu wangundipuma pamsana ndi kukamba kuti, “Jitaski!” Pa nyengu iyi, ndingupemphera pempheru lifupi kwaku Yehova kuti wandiwovyi kuwuko mtima. Chinanga kuti mtima wangu wandichichizganga kuti ndiweze, ndingufiska kujikaniza. Mawa laki, ndingukumana ndi mulongozgi wa kagulu kenaka we yija. Ndingukwiya ukongwa ndipu ndakhumbisisanga kuweze, kweni ndingupempha mbwenu kwaku Yehova kuti wandiwovyi kuwuko mtima. Ndinguzizwa ukongwa ndi vo iyu wanguchita. Wanguza kwaku ini ndi kukamba kuti: “Mundigowoke ukongwa chifukwa cha vo vinguchitika zana ndi mazulu. Ini ndikhumba kuja nge imwi. Nani ndikhumba kusambira Bayibolu.” Ndingukondwa ukongwa chifukwa chakuti ndinguwuko mtima. Pavuli paki, ndingwamba kusambira nayu Bayibolu.

Ntchachitima kuti pa nyengu iyi, ŵanthu wosi a m’banja mwidu anguleka kusambira Bayibolu. Kweni ini ndingusimikiza kuti ndilutirizengi kusambira ndipuso kuti palivi munthu pamwenga chinthu cho chinditondekesengi. Ndinguziŵa kuti kuchitiya vinthu limoza ndi ŵanthu aku Chiuta kaŵikaŵi, kundiwovyengi kuti ndileki kusuzgika maŵanaŵanu kweniso kuleka kuchita phukwa. Ndingulutiriza kusambira, ndipu mu 1991 ndingubatizika kuti ndije Kaboni waku Yehova.

Kali ndakwiyanga liŵi, ndakandirizanga ŵanthu ndi kuŵachitiya nkhaza. Kweni Mazu Ngaku Chiuta ngakusintha umoyu wangu. Sonu ndipharazgiya munthu weyosi uthenga wa m’Bayibolu wo ngwachimangu. Kwa vyaka 23 vo vajumpha, ndateŵete Yehova mu uteŵeti wa nyengu zosi.

Nyengu yinyaki, ndingujipereka kuteŵete Yehova pa ofesi ya Akaboni ku Mexico. Kwenuku, ndingukumana ndi Claudia yo wenga wakujipereka ukongwa kweniso waphamphu. Ndipu tingutorana mu 1999. Nditimuwonga ukongwa Yehova chifukwa wakundipasa munyangu wakugomezeka.

Ini ndi Claudia tateŵetiyanga mumpingu unyaki wa Chineneru Chamanja cha ku Mexico. Kwenuku, tawovyanga ŵanthu wo asuzgika kuvwa kuti amuziŵi Yehova. Pavuli paki, angutipempha kuti tikateŵetiyengi ku Belize kuti tikasambizengi ŵanthu Bayibolu. Chinanga kuti kunu tija umoyu wambula kukhumba vinandi, kweni tikondwa mbwenu. Ndipu tiwona kuti palivi cho chiluska kuteŵete Yehova.

Pati pajumpha nyengu, ama angwamba so kusambira Bayibolu. Pavuli paki, angubatizika. Kweniso mku wangu, muwolu waki, ndi ŵana ŵaki atatu angwamba kusambira Bayibolu ndipu sonu Mbakaboni aku Yehova. Anyangu anyaki wo ndinguŵapharazgiya uthenga wa Ufumu, sonu nawu ateŵete Yehova.

Ntchachitima kuti abali ŵangu anyaki akutayika chifukwa chakuti angusintha cha jalidu lawu lakwanja ndewu. Asani nani ndinguleka kusintha, mphanyi ndikufwa. Ndiwonga ukongwa kuti Yehova wakundiguziya kwaku iyu kweniso kwa ateŵeti ŵaki wo andisambizanga mwakuzikira ndipuso mwalisungu mo ndingagwirisiya ntchitu fundu za m’Bayibolu pa umoyu wangu.