Vo Mungachita Kuti Muje ndi Liŵavu Lanthazi
Bayibolu ndi buku la va chipatala cha. Kweni le ndi ulongozgi wo ungatiwovya kuti tije ndi umoyu wamampha. Tiyeni tikambiskani fundu za m’Bayibolu zo zingakuwovyani kuti muje ndi umoyu wanthazi.
MUPHWERIYENGI LIŴAVU LINU
FUNDU YA M’BAYIBOLU: “Palivi munthu yo watinkha liŵavu laki, kweni watiliryisa ndipuso watiliyanja.”—Aefeso 5:29.
VO FUNDU IYI YING’ANAMUWA: Fundu ya m’Bayibolu iyi yititichiska kuti tiyesesengi kuchita vo tingafiska kuti tiphweriyengi maliŵavu ngidu. Lipoti linyaki lilongo kuti matenda nganandi ngatuza chifukwa chakuleka kujiphwere. Mwaviyo, kujiphwere kungatiwovya kuti tilekengi kutamatama.
VO MUNGACHITA:
-
Muryengi Chakurya Chamampha. Muyesesengi kurya vakurya vakupasa nthazi kweniso mumwengi maji nganandi.
-
Muchitengi Masaza Ngakulimbisa Liŵavu. Kwali mungaŵa ndi vyaka vinandi wuli, mukupunduka pamwenga mukwamba kali kutama, kweni kuchita masaza ngakulimbisa liŵavu kungakuwovyani kuti muje ndi umoyu wanthazi. Ndipu chinanga kuti ŵanthu anyaki angatichiska kuchita masaza kweni nasi taŵeni tikhumbika kuchitapu kanthu!
-
Mugonengi Mwakukwana. Ŵanthu wo akuziŵiriya kugona mwakuswera angatama matenda ngakulu. Ndipu anandi achita viyo chifukwa asani nyengu yakuti agoni yakwana, atijitangwanisa ndi kuchita vinthu vinyaki. Mwaviyo, kugona mwakukwana, kungakuwovyani kuti muje ndi umoyu wamampha.
LEKANI KUCHITA MALUSU NGAHENI
FUNDU YA M’BAYIBOLU: “Tiyeni tijitowesi ku chinthu chechosi chakukazuza liŵavu ndi mzimu.”—2 Akorinto 7:1.
VO FUNDU IYI YING’ANAMUWA: Tingaja ndi umoyu wamampha asani tileka kuchita malusu ngaheni ngo ngangananga maliŵavu ngidu nge kukweŵa foja. Tikamba viyo chifukwa foja wachitisa ŵanthu kutama matenda ngakulu kweniso wabaya.
VO MUNGACHITA: Sankhani deti lo mukhumba kuleka kukweŵa foja ndipu lilembeni pa kalendala yinu. Kweni deti lo lechendakwani, mutenere kutaya foja kweniso chechosi cho munthu wagwiriskiya ntchitu pakukweŵa foja. Lekani kusanirika pa malu ngo ŵanthu akweŵa. Ndipu mutenere kukambiyapu mabwezi nginu kuti mwaleka kukweŵa ndi chilatu chakuti akuwovyeni kufiska vo mwasankha.
FUNDU ZINYAKI ZA M’BAYIBOLU
Mungapempha Bayibolu kutuliya kwa Akaboni aku Yehova a muchigaŵa chinu
MUJIVIKILIYENGI KU VINTHU VO VINGACHITISA NGOZI.
“Muchizenga nyumba yifya, muzengengi so chiguŵa pachanya pa nyumba yinu, alinga kuti muleki kuŵa ndi mlandu wa ndopa, asani munyaki wangawapu.”—MARANGU 22:8.
MUNGAKWIYANGA LIŴI CHA.
“Mweniyo waleka kukwiya liŵi ngwakuziŵa vinthu ukongwa, kweni yo wakwiya liŵi walongo kupusa kwaki.”—NTHANTHI 14:29.
MUNGARYANGA MWAKUJUMPHISA CHA.
“Mungaŵanga cha. . . pamoza ndi ŵanthu wo atanja kurya mwawunkharyi.”—NTHANTHI 23:20.
Mungayanja Kuŵerenga so Nkhani Izi
JANI MASU!
Vo Vingatiwovya Kuti Tikondwengi—Umoyu Wambula Kutamatama ndi Kukunthiyapu
Kumbi asani titama, tingakondwa cha?
