VYAKA vimanavi vajumpha, Cesar ndi muwolu waki Rocio ajanga umoyu wamampha ukongwa ku California. Cesar wagwiranga nchitu yakupanga ndi kunozga mafani ndipu Rocio wachitanga ganyu mu ofesi yaku dokotala. Yiwu ŵenga ndi nyumba kweni ŵengavi ŵana. Vinthu vinyaki vingusintha pa umoyu wawu. Kumbi venga vinthu wuli?

Mu October 2009, ofesi ya nthambi ya ku United States yingutumiza makalata ku mipingu yosi ya m’charu ichi ndipu akhumbanga kuti abali ndi azichi amalusu ngakupambanapambana, alembi makalata ngakupemphe uteŵeti wa pa Beteli wakanyengu kamanavi kuti akawovyi pa nchitu yakusazgiyaku ofesi ya nthambi ya ku Wallkill, ku New York. Chinanga ndi wo vyaka vawu venga vinandi mwakuti angateŵete cha pa Beteli, nawu anguzomerezgeka kupempha uteŵeti uwu. Cesar ndi Rocio angukamba kuti: “Chifukwa chakuti tenga ndi vyaka vinandi, tawonanga kuti kuteŵete pa Beteli ndi mwaŵi wo utuza kamoza pa umoyu wa munthu. Ndipu takhumbanga cha kuwutaya.” Yiwu angupereka mwaliŵi makalata ngawu ngakupemphe uteŵeti wenuwu.

Pangujumpha vyaka Cesar ndi Rocio ŵechendadaniki ku Beteli. Chinanga kuti venga viyo, yiwu angulutirizga kusintha vinthu vinyaki pa umoyu wawu kuti afiski chilatu chawu. Cesar wangukamba kuti: “Tingusintha galaja yidu kuti yije kanyumba kachipinda chimoza ndi chilatu chakuti tichitiskengi lendi. Pavuli paki, tingusama munyumba yidu yikulu kweniso yamampha ndipu tingwamba kuja so mukanyumba kamana ko tajangamu kali techendazengi nyumba yikulu. Kusintha kwenuku kungutiwovya kuti tinozgeke kuchiteŵete pa Beteli.” Nchinthu wuli cho chinguchitika pavuli paki? Rocio wangukamba kuti: “Pati pajumpha mwezi umoza kutuliya po tingusamiya mukanyumba kamana, tingulonde kalata yakutidana kuti tikachiti uteŵeti wakanyengu kamanavi ku Wallkill. Tinguwona kuti tinguchita umampha kusintha vinthu pa umoyu widu, chifukwa vinguchitiska kuti Yehova watitumbiki.”

Nge mo Cesar ndi Rocio anguchitiya, abali ndi azichi anandi akujipereka kuti awovyi pa nchitu yakuzenga  yo yichitika ku New York. Anyaki mwa abali ndi azichi ŵenaŵa atovya pa nchitu yakusazgiyaku ofesi ya nthambi ku Wallkill, ndipu anyaki atovya pa nchitu yakuzenga likulu la Akaboni aku Yehova ku Warwick. a Mabanja nganandi ngakusiya nyumba zawu zamampha, nchitu zamampha ndi vinyaki vaviyo kuti ateŵete Yehova ndi mtima wosi. Kumbi Yehova waŵatumbika chifukwa chakujipereka? Hinya, waŵatumbika nadi!

Mwakuyeruzgiyapu, Way ndi Debra ŵe ndi vyaka pafupifupi 60. Way wagwira nchitu ya magesi ndipu iyu ndi muwolu waki angugulisa nyumba ndipuso vinthu vinyaki ko ajanga ku Kansas. Pavuli paki, anguluta ku Wallkill kuti akachitengi uteŵeti wa pa Beteli wakwende. b Kweni kuti afiski venivi akhumbikanga kusintha vinthu vinyaki pa umoyu wawu ndipu awona kuti anguchita umampha ukongwa kujipereka. Debra wangukamba vakukwaskana ndi uteŵeti waki wa pa Beteli kuti: “Nyengu zinyaki, ndiwona nge kuti nde mu Paradayisu ndipu ndigwira nawu nchitu yakuzenga!”

Melvin ndi Sharon angugulisa nyumba yawu ndipuso vinthu vinyaki ku South Carolina ndi chilatu chakuti akawovyi pa nchitu yakuzenga ku Warwick. Chinanga kuti kusintha vinthu kwenga kupusu cha, kweni yiwu anguwona kuti ndi mwaŵi ukulu ukongwa kuchigwiraku nchitu yambula kuluwika yeniyi. Yiwu angukamba kuti: “Tingukondwa ukongwa kuziŵa kuti nchitu yo tagwiranga yiwovyengi gulu lapacharu chosi chapasi.”

Kenneth ndi Maureen ŵe ndi vyaka pafupifupi 55. Kenneth wakuleka kugwira nchitu yakuzenga nyumba ndipu wosi angutuwa kwawu ku California kuti akagwireku nchitu yakuzenga ku Warwick. Yiwu ŵechendaluti, angupempha mzichi munyaki mumpingu kuti waphweriyengi nyumba yawu. Angupempha so ŵanthu a m’banja lawu kuti awovyi kuphwere awiski aku Kenneth wo mbakukota. Kumbi yiwu adandawula kuti angujipereka kuchiteŵete pa Beteli? Awa! Kenneth wangukamba kuti: “Yehova watititumbika ukongwa. Chinanga kuti pe masuzgu nganyaki ngo tikumana nangu, kweni tija umoyu wamampha ukongwa ndipu tichiska anyaki ndi mtima widu wosi kuti nawu ayambi uteŵeti wenuwu.”

Abali ndi azichi anandi wo akujipereka kuchichita uteŵeti wenuwu akhumbikanga kumalana ndi masuzgu nganyaki. Mwakuyeruzgiyapu, William ndi Sandra, ŵe ndi vyaka vapakati pa 61 ndi 64 ndipu ajanga umoyu wamampha ku Pennsylvania. Yiwu ŵenga ndi kampani yakupanga vinthu vakunozge vipangizu va magesi ndipu yenga ndi anchitu 17. Kweniso, yiwu ateŵetiyanga mumpingu wo awungananga kali kwambiya pa unamana wawu ndipu abali ŵawu anandi ajanga muchigaŵa chenichi. Kweni mwaŵi wati  wasanirika wakuti akachitengi uteŵeti wa pa Beteli wakwende, yiwu anguziŵa kuti asiyengi abali ŵawu ndipuso vinthu vinyaki. William wangukamba kuti: “Venga vakusuzga ukongwa kuti tisiyi umoyu wamampha wo tajanga kali.” Kweni ŵati ayirombe ukongwa nkhani iyi, angusankha kuchiteŵete Yehova ndipu adandawula cha kuti akusankha viyo. William wangukamba kuti: “Munthu wakondwa ukongwa asani wateŵete pa Beteli, limoza ndi abali ndipuso azichi akupambanapambana ndipu palivi chinthu cho tingachiyeruzgiya ndi uteŵeti wenuwu. Sonu ini ndi Sandra tikondwa ukongwa kuluska kali!”

Ricky yo wawoneriyanga nchitu yakuzenga ku Hawaii, wangudanika kuti wakachitengi uteŵeti wa pa Beteli wakwende ndi chilatu chakuti wakawovyi pa nchitu yakuzenga ku Warwick. Muwolu waki Kendra, wakhumbanga kuti murumu waki wazomeri uteŵeti wenuwu. Kweni afipanga mtima kuti ndiyani yo watingi waphweriyengi mwana wawu Jacob, wa vyaka 11. Ndipu venga vakuvwika kuŵanaŵana viyo. Yiwu ajifumbanga kuti, Kumbi vingaja umampha cha asani banja lidu lingasamiya ku New York? Kumbi mwana widu wamuziŵiriya umoyu wasonu?

Ricky wangukamba kuti: “Takhumbikanga kufufuza mpingu wo wenga ndi ŵana anandi akwanja Yehova kuti Jacob wasaniyi anyaki akucheza nawu. Ichi chenga chinthu chakwamba cho takhumbikanga kuchita.” Mpingu wo angwamba kuwunganaku wenga ndi ŵana amanavi kweni wenga ndi abali ndipuso azichi anandi wo ateŵetiyanga pa Beteli. Ricky wangukamba kuti: “Tati tawunganaku zuŵa lakwamba, ndingufumba Jacob kuti wakonkhoski mo wawone mpingu wasonu chifukwa chakuti wengavi ŵana anandi. Iyu wangumuka kuti, ‘Kudandawula cha Ada. Mabwezi ngangu ngaŵengi abali achinyamata a pa Beteli.’”

Kukamba uneneska, abali achinyamata a pa Beteli anguja nadi mabwezi ngaku Jacob. Kumbi venivi vingumuwovya wuli? Ricky wangukamba kuti: “Zuŵa linyaki ndi usiku, ndajumphanga pafupi ndi chipinda cha mwana wangu ndipu ndinguwona kuti wechendazimwi magesi. Ndaŵanaŵananga kuti ndimusaniyengi wachichita masaza ngapakompyuta, kweni ndingusaniya kuti waŵerenga Bayibolo! Ndati ndamufumba kuti wakambi vo wachitanga, Jacob wangukamba kuti, ‘Nde mwana wa pa Beteli, ndipu ndikhumba kuŵerenga Bayibolo losi kwa chaka chimoza.’” Tikayika cha kuti Ricky ndi Kendra akondwa ukongwa chifukwa chakuti Ricky watovya pa nchitu yakuzenga ku Warwick kweniso chifukwa chakuti mwana wawu walutirizga kuja pa ubwezi ndi Yehova.​—Nthanthi 22:6.

Nchitu yakuzenga yo yichitika ku Wallkill ndi ku Warwick yimalengi. Mwaviyo, wo akudanika kuti akawovyi pa nchitu iyi aziŵa kuti ateŵetiyengi pa Beteli kwa nyengu yimanavi. Kumbi abali ndi azichi ŵenaŵa afipa mtima kuti alutengi pani ndipu amuchitanji asani  nchitu iyi yamala? Awa! Anandi aŵanaŵana nge mabanja ngaŵi nga ku Florida, nga vyaka va m’ma 50. John wawonere nchitu zakuzenga. Iyu ndi muwolu waki Carmen ateŵete kwa kanyengu kamanavi ku Warwick ndipu angukamba kuti: “Tawona mo Yehova watiwovye kusaniya vinthu vakukhumbika pa umoyu widu mpaka sonu. Tigomezga kuti Yehova wazakutijowo cha asani uteŵeti wo tichita kunu wamala.” (Sumu 119:116) Luis wapanga vipangizu vakuzimwiya motu. Iyu ndi muwolu waki Quenia ateŵete ku Wallkill ndipu angukamba kuti: “Tawona kali kuti Yehova watiphwere mwakutipaska vinthu vakuliŵavu vo takhumbikiyanga. Chinanga kuti tiziŵa cha kuti Yehova  watiwovyengi wuli, watiwovyengi nyengu wuli pamwenga wakutiwovye nunkhu, te ndi chigomezgu chakuti walutirizgengi kutiphwere.”​—Sumu 34:10; 37:25.

Abali ndi azichi anandi wo atovya pa nchitu yakuzenga ku New York atingi aŵengi ndi vifukwa vakukaniya nchitu iyi. Kweni yiwu angumuyesa Yehova nge mo watitikambiya tosi kuti: “Mundesi, . . . asani kuti nkhamujuliyaninga madangazi nga kuchanya, ndi kumupunguliyani vitumbiku vakuzara.”​—Mal. 3:10

Kumbi namwi mumuyesengi Yehova kuti mulonde vitumbiku vinandi? Mungachita umampha kuromba kwaku Chiuta kuti wakuwovyeni kuziŵa vo mungachita kuti muziwovyi pa nchitu yakukondwesa yo yichitika sonu, kaya nkhu New York pamwenga pa nchitu zinyaki zakuzenga kuti muwoni mo Yehova wakutumbikiyeningi.​—Marko 10:29, 30.

Dale wagwiranga nchitu yakupanga ndi kunozga vipangizu va magesi. Iyu ndi Cathy angutuwa ku Alabama ndipu nawu awonanga kuti uteŵeti uwu ngwamampha ukongwa. Yiwu ateŵete ku Wallkill ndipu angukamba kuti: “Asani munthu wasiya umoyu wamampha wo wajanga, waja ndi mwaŵi wakuwona mo mzimu waku Yehova ugwiriya nchitu.” Kumbi ndi vinthu wuli vo vikhumbika kuti munthu wajipereki? Dale wangukamba kuti: “Tikhumbika kulutirizga kusintha vinthu vinyaki pa umoyu widu. Asani tachita viyo, tazamudandawulapu cha.” Gary wa ku North Carolina, wagwira nchitu ya vakuzengazenga kwa vyaka 30. Iyu ndi muwolu waki Maureen angukamba kuti chimoza mwa vitumbiku vo asaniya ku Warwick nchakuti “awungana ndipuso agwira nchitu limoza ndi abali ndi azichi amampha wo ateŵete pa Beteli kwa vyaka vinandi.” Gary nayu wangukamba kuti: “Munthu wakhumbika kusintha vinthu vinyaki kuti wakateŵete pa Beteli ndipu ivi vakukhumbika ukongwa po te mumugonezi uwu.” Jason wagwiranga nchitu ya magesi. Iyu ndi Jennifer akutuwa ku Illinois ndipu angukamba kuti kugwira nchitu yakuzenga ku Wallkill “kuchitiska munthu kuwona nge kuti we m’charu chifya.” Jennifer wangukamba so kuti: “Nchinthu chakukondwesa ukongwa kuziŵa kuti Yehova wakondwa ndi vo tichita ndipu wawona kuti vakukhumbika ukongwa. Yehova watitiwovya kuti tisaniyengi vinthu vo tikhumbika.”