Palivi yo wakondwa ndi nyifwa, ndipu ŵanthu anandi akhumba cha kukambiskana nkhani yeniyi. Nyifwa yingatiwiya nyengu yeyosi, kaya tikhumbi pamwenga cha. Ndipu nyifwa yiŵaŵa ukongwa.

Palivi cho tingachita kuti tinozgeke nyifwa ya mpapi, yo tikutolana nayu pamwenga mwana widu. Munthu wangafwa mwamabuchibuchi pamwenga pavuli pakutama kwa nyengu yitali. Mwemosi mo vingaŵiya, tingawugwentha cha urwirwi wa nyifwa.

Antonio yo awiski angufwa pa ngozi ya galimotu wangukamba kuti: “Vija nge kuti munthu munyaki wakujaliya nyumba kweniso wathaŵa ndi maki mwakuti ungaseremu so cha. Usuzgika ndi maŵanaŵanu. Vinthu visinthiya limu pa umoyu. Chinanga kuti vija vakusuzga kuzomerezga kuti vachitika, kweni palivi cho ungachita.”

Dorothy yo murumu waki wangufwa pa nyengu yo iyu wenga ndi vyaka 47, wakhumbanga kusaniya kwamuka kwa mafumbu ngo wajifumbanga. Chifukwa chakuti wenga musambizi wa Sukulu ya ŵana ku tchalitchi kwawu, waziŵanga kuti nyifwa nkhumala kwa vosi cha. Kweni waziŵanga cha vo vichitika asani munthu wafwa. Yiyu wangufumba aliska a tchalitchi laki la Anglican kuti: “Kumbi nchinthu wuli cho chichitika asani munthu wafwa?” Yiwu angumumuka kuti: “Palivi yo waziŵa. Tiyeni tilereskengeku ŵaka.”

Kumbi tikhumbika kuti “tilereskengeku ŵaka” nadi? Kumbi pe nthowa yo tingasimikizgiya kuti nyifwa nkhumala kwa vosi cha?