Banja lidu lajanga kufupi ndi msumba wa Leipzig, kuvuma kwa Germany ndipuso kwenga kufupi ndi mphaka ya charu cha Czech Republic kweniso Poland. Yapa ndipu ndeche mwana. Pa nyengu yo ndenga ndi vyaka 6, banja lidu lingusamiya ku Brazil chifukwa cha nchitu yo ada agwiranga ndipu pavuli paki tinguluta ku Ecuador.

Ndati ndafika vyaka 14, ndinguluta kusukulu yakugone kweniko ku Germany. Ndakhumbikanga kujiphwere chifukwa chakuti apapi ŵangu ŵenga kutali, ku South America. Ndajanga umoyu wakujithemba. Ndatoliyangaku kanthu cha mo ŵanthu anyaki andiwoniyanga.

Apapi ŵangu anguwere ku Germany ndati ndafika vyaka 17. Pakwamba tajanga limoza. Kweni ndaŵavwiyanga cha chifukwa cha umoyu wangu wakujikuzga. Ndati ndafika vyaka 18, ndingutuwapu panyumba.

Ndafwanga mphwayi cha kufufuza kuti ndiziŵi chilatu cha umoyu. Ndati ndawona umoyu wakupambanapambana wo ŵanthu aja ndipuso vo mawupu ngachita, ndingwamba kuŵanaŵana kuti chinthu chamampha ukongwa cho ndikhumbika kuchita pa umoyu wangu nkhuzunguliya charu chosi chapasi kuti ndiwoni mo chikutowe, ŵanthu ŵechendachinangi.

Ndingutuwaku ku Germany ndipu ndingugula muthuthuthu ndi kuluta ku Africa. Kweni ndakhumbikanga kuwere ku Europe kuchinozgeska muthuthuthu. Pavuli paki, ndingufika kudowoku linyaki ku Portugal. Ndinguŵanaŵana kuti ndisiyi muthuthuthu ndi kwenda kwenda paboti.

Ndingwamba kwenda ndi ampupuka wo akhumbanga kuti ayambuki nyanja yikulu ya Atlantic. Pagulu ili ndipu ndingukumana ndi Laurie yo wanguzija muwolu wangu. Pakwamba, tinguchifika kuvilwa va nyanja ya Caribbean. Tingufika so ku Puerto Rico ndipu tati tajaku kamanavi, tinguwere ku Europe. Takhumbanga kusaniya boti lathanga kuti tilisinthi kuja la injini kweniso kuti lije ndi kanyumba. Kweni tati tafufuza kwa myezi yitatu pe, vo takhumbanga kuchita vingutimbanyizgika dankha chifukwa asilikali a boma la Germany angundiko ndi kundilemba nchitu ya usilikali.

Kwa chaka chimoza ndi myezi yitatu ndenga m’gulu la asilikali a panyanja a ku Germany. Pa nyengu iyi ndipu tingutoliyana ndi  Laurie ndipu tingupangana kuti tilutirizgi kuzunguliya charu chosi chapasi. Pa nyengu yo ndagwiranga nchitu ya usilikali tingugula boti, ndipu tingwamba kulisintha kamanakamana kuti lije ndi kanyumba. Tinguŵanaŵana kuti tiyambi kuja mukanyumba kenaka ndi kulutirizga kuzunguliya charu chosi chapasi. Ndati ndaleka nchitu ya usilikali, tingulutirizga kunozga boti kweni techendamalizgi, tingukumana ndi Akaboni aku Yehova ndipu tingwamba kusambira Bayibolo.

Pakwamba, ndawonanga kuti ndakhumbikanga kusintha vinthu vinandi cha pa umoyu wangu. Ndingulembeska nthengwa yangu ndi munthukazi yo ndajanga ŵaka nayu pakwamba kweniso pa nyengu iyi ndipu ndaleka kali kukweŵa foja. (Ŵaefesu 5:5) Ndawonanga so kuti ulendu widu wakuzgunguliya charu chosi wengavi suzgu lelosi chifukwa tawonanga vakulengeka vakuziziswa vaku Chiuta.

Kweni kukamba uneneska, ndakhumbikanga nadi kusintha jalidu langu. Chifukwa chakuti ndenga wakujikuzga ukongwa ndipuso wakujithemba, kanandi ndathembanga zeru zangu kweniso malusu ngangu. Ndenga wakujikuzga ukongwa!

Zuŵa linyaki ndinguŵerenga nkhani yo Yesu wangukamba pa Upharazgi wa Paphiri. (Mateyu, chaputala 5-7) Pakwamba ndavwisisanga cha vo Yesu wang’anamuwanga pa nkhani yakuja wakukondwa. Mwakuyeruzgiyapu, iyu wangukamba kuti mbakukondwa ŵanthu wo atuvwa nja ndi nyota. (Mateyu 5:6) Kweni ndajifumbanga kuti, kumbi munthu yo wasuzgika wangaja so wuli wakukondwa? Ndati ndalutirizga kusambira Bayibolo, ndingwamba kuziŵa kuti munthu weyosi we ndi nja yauzimu kweni wakhumbika dankha kuzomerezga kuti we ndi nja ndipu pavuli paki wangarya chakurya. Ivi viyanana ndi mazu ngo Yesu wangukamba ngakuti: “Mbakutumbikika ŵasauchi mu mzimu.”​—Mateyu 5:3.

Tati tayambapu ŵaka kusambira Bayibolo ku Germany, ini ndi Laurie tinguluta ku France ndipu pavuli paki tinguluta ku Italy. Kwekosi ko talutanga tasaniyangaku Akaboni aku Yehova. Ndakondwanga ukongwa kuwona kuti ayanjananga ndipuso achitanga vinthu mwakukoliyana. Ndinguwona kuti Akaboni aku Yehova ŵe ndi ubali nadi wapacharu chosi. (Yohane 13:34, 35) Pati pajumpha nyengu, ini ndi Laurie tingubatizika.

Ndati ndabatizika, ndingulutirizga kusintha umoyu wangu. Ini ndi Laurie tinguŵanaŵana kuti tiyendi m’mphepeti mwa nyanja ya Africa kuti pavuli paki tiyambuki nyanja yikulu ya Atlantic ndipu tikafiki ku United States. Ini ndi muwolu wangu tati tafika pakati pa nyanja, ndingwamba kuziŵa kuti nde kanthu cha asani ndingajiyeruzgiya ndi Mulengi widu wakuziziswa. Chifukwa chakuti ndenga ndi nyengu yakukwana, ndakhumbanga kuti ndiŵerengengi Bayibolo nyengu zosi. Ndinguchiskika ukongwa ndati ndaŵerenga vakukwaskana ndi umoyu waku Yesu weche pacharu chapasi. Iyu wenga wakufikapu ndipuso wazeru kuluska munthu weyosi kweni wenga wakujikuzga cha. Iyu wachitanga khumbu laki cha kweni wachitanga khumbu la Awiski akuchanya.

Kuŵanaŵaniya chakuwoniyapu chaku Yesu, kungundiwovya kuti ndiyambi kuŵika Ufumu waku Chiuta pamalu ngakwamba pa umoyu wangu m’malu mwakutangwamika ndi vinthu vo ndakhumbanga kuchita. (Mateyu 6:33) Ini ndi Laurie tati tafika ku United States tinguŵanaŵana kuti tileki vakwendakwenda kuti tiyambi kusopa Yehova mwakujalikiskika.

Pakwamba ndatondeka kusankha vinthu umampha chifukwa ndenga wakujikuzga. Kweni sonu ndikusaniya zeru zo zitindiwovya pa umoyu wangu. (Yesaya 48:17, 18) Kweniso ndaziŵa chilatu cha umoyu chakuti ndikhumbika kuteŵete Chiuta ndipuso kuwovya ŵanthu anyaki kuti nawu amuziŵi.

Nthengwa yidu njakukho ukongwa sonu chifukwa chakuti tigwiriskiya nchitu fundu za m’Bayibolo. Yehova watitumbika so ukongwa chifukwa wakutipaska mwana munthukazi wakutowa yo waziŵa ndipuso kwanja Yehova.

Ivi ving’anamuwa kuti talekanga cha kukumana ndi masuzgu. Kweni chifukwa chakuti Yehova watitiwovya, tisimikizga kuti tilekengi cha kumuteŵete ndipuso kumugomezga.​—Nthanthi 3:5, 6.