Megan: Shirley, mwewuli? Ndingukondwa ukongwa kukuwonani ku Chikumbusku cha nyifwa yaku Yesu Khristu sabata yamala. a Munguwuwona wuli mwambu weniwuwa?

Shirley: Ndingukondwa ukongwa chinanga kuti vinyaki vo vakambikanga ndavivwisanga cha. Pa Khrisimasi, ŵanthu akumbukiya kuwaku kwaku Yesu. Ndipu pa Isitala akumbukiya kuyuskika kwaki, kweni ndechendavwepu kuti anyaki achita mwambu wakukumbukiya nyifwa yaki.

Megan: Muneneska, ŵanthu anandi achita Khrisimasi kweniso Isitala. Kweni isi Akaboni aku Yehova tiwona kuti kukumbuka nyifwa yaku Yesu nkhwakukhumbika ukongwa. Asani mwe ndi nyengu, ndingayanja kukukonkhoskiyani vifukwa vo isi tichitiya mwambu wenuwu.

Shirley: Palivi suzgu, ndikonkhoskiyeni.

Megan: Chakwamba, Akaboni aku Yehova tichita mwambu uwu chifukwa Yesu wangukambiya akusambira ŵaki kuti achitengi venivi. Kumbi mukuvwapu vakukwaskana ndi chakurya chapade cho Yesu wanguryiya limoza ndi akusambira ŵaki akugomezgeka usiku wakuti wafwengi mawa?

Shirley: Mung’anamuwa Chakurya cha Mazulu cha Ambuya?

Megan: Ee. Pa chakurya chenichi, Yesu wangupereka ulongozgi unyaki kwa akusambira ŵaki. Mungaŵerenga ulongozgi wenuwu pa Luka 22:19?

Shirley: Ee, patiti: “Ndipu wanguto chiŵandi, ndipu wati wawonga wangumenya, ndi wangupaska kwaku wo, wakuti, ‘Chenichi . . . [chimiya] liŵavu langu, lakupaskikiya chifukwa chaku imwi; chenichi chitiyani kwachikumbuka ini.’”

Megan: Yewu. Mwawona ulongozgi wo Yesu wangupereka wo we kukumaliya kwa lemba ili? Iyu wanguti: “Chenichi chitiyani kwachikumbuka ini.” Kweni wechendapereki ulongozgi uwu, Yesu wangukonkhoska chinthu cho akusambira ŵaki akhumbikanga kuzikumbuka. Iyu wangukamba kuti umoyu waki uperekekengi chifukwa chaku yiwu. Yesu wangukamba so fundu yakuyanana ndi yeniyi pa Mateyu 20:28. Lemba ili likamba kuti: “Mwana wa munthu kuti wanguziya kwachiteŵeteke cha, kweni kwachiteŵete ndi kupereka umoyu waki . . . [kuti wawombo ŵanthu] anandi.” Mwakudumuwa, tingakamba kuti chaka chechosi Akaboni aku Yehova tichita mwambu wenuwu kuti tikumbukengi sembi ya uwombozi yo Yesu wangupereka. Chifukwa cha nyifwa yaki, ŵanthu akugomezgeka azamulonde umoyu wamuyaya.

Shirley: Ndituvwa ŵanthu achikamba kuti Yesu wakutifwiya kuti tizisaniyi umoyu. Kweni nkhani iyi nditiyivwisa cha.

Megan: Ndimwi pe cha. Nkhani iyi njakusuzga nadi kuyivwisa, kweni njakukhumbika ukongwa. Mweche ndi nyengu?

Shirley: Mungalutirizga.

Megan: Chamampha. Pambula kuswera, ndaŵerenganga vakukwaskana ndi sembi yeniyi, ndiyesesengi kukukonkhoskiyani mwakudumuwa.

Shirley: Chamampha.

Megan: Kuti tivwisi chifukwa cho takhumbikiyanga sembi, tikhumbika dankha kuziŵa vo vinguchitika pavuli pakuti Adamu ndi Eva abuda m’munda wa Edene. Tiyeni tiwoni pa Ŵaroma 6:23. Mungaŵerenga?

Shirley: Ee. Pakamba kuti: “Chifukwa mphotu ya ulakwi ndi nyifwa; kweni chawezi chaku Chiuta mbumoyu wamuyaya mwaku Khristu Yesu Ambuyafwi.”

Megan: Yewu. Tiyeni tikambiskani lemba lenili. Chakwamba, lemba ili lititi: “Mphotu ya ulakwi ndi nyifwa.” Venivi ndivu Chiuta wangukambiya ŵanthu ŵati alengeka ŵaka. Iyu wanguŵakambiya kuti afwengi asani aleka kuvwiya. Adamu ndi Eva angulengeka ambula ubudi ndipu ŵana ŵawu nawu atingi aŵengi ambula ubudi. Mwaviyo, ŵanthu atingi afwengi cha. Adamu ndi Eva kweniso ŵana ŵawu atingi ajengi ndi umoyu walikondwa kwamuyaya. Kumbi ndimu vinthu viliri mazuŵa nganu?

Shirley: Awa, chifukwa Adamu ndi Eva angurya chipasu chakukanizgika.

Megan: Muneneska. Adamu ndi Eva angubuda, ndipu vo angusankha vingukwaska so ŵana ŵawu.

Shirley: Mung’anamuwanji?

Megan: Nkhani iyi tingayiyeruzgiya ndi chikomboli chakuwumbiya vidina.

Shirley: Vikoliyana wuli?

Megan: Asani chikomboli nchakugombete, vidina navu vigombete.

Shirley: Muneneska nadi.

Megan: Mwakuyana ŵaka, tingakamba kuti Adamu ndi Eva ŵati abuda anguja nge kuti “agombete” pamwenga kuti afipiskika chifukwa cha ubudi. Chifukwa chakuti angubuda ŵechendabali mwana, ŵana wosi wo abalanga pavuli paki nawu ŵenga “akugombete” pamwenga kuti akubuda. M’Bayibolo, mazu ngakuti “ulakwi” pamwenga kuti ubudi ngang’anamuwa vinthu viheni vo ŵanthu achita kweniso vo tikuhara kutuliya kwa apapi akwamba. Mwaviyo, chinanga kuti imwi ndi ini kwengavi pa nyengu yo Adamu ndi Eva angubudiya, kweni vo anguchita vikwaska tosi pacharu chapasi, ndichu chifukwa chaki tosi titufwa. Ivi vikoliyana ndi vo taŵerenga pa Ŵaroma 6:23, kuti mphotu ya ubudi ndi nyifwa.

Shirley: Mbwe tanyaki tifwiya vaŵeni. So mphakwenere kuti taŵanthu tosi tisuzgikengi chifukwa cha ubudi waku Adamu ndi Eva?

Megan: Mwafumba umampha. Kweni pe vinthu vinandi vo tikhumbika kuziŵa. Chifukwa cha urunji, Chiuta wanguwonesesa kuti isi tiŵi ndi chilindizga chamampha kweni Adamu ndi Eva alonde mphotu ya ubudi wawu yo ndi nyifwa. Chiuta wangunozga nthowa yakuti watifwatuwi ku suzgu iyi. Iyu wangugwiriskiya nchitu sembi ya uwombozi yaku Yesu. Tiyeni tiwoni so vo lemba la Ŵaroma 6:23 likamba. Pavuli pakukamba kuti “mphotu ya ulakwi ndi nyifwa,” vesi ili likamba kuti: “Kweni chawezi chaku Chiuta mbumoyu wamuyaya mwaku Khristu Yesu Ambuyafwi.” Mwaviyo, nyifwa yaku Yesu yititiwombo ku ubudi kweniso nyifwa. b

Megan: Pe so chinthu chinyaki m’lemba ili cho ndikhumba kuti tikambiskani.

Shirley: Nchinthu wuli?

Megan: Lemba ili likamba kuti: “Chawezi [chawanangwa] chaku Chiuta mbumoyu wamuyaya mwaku Khristu Yesu Ambuyafwi.” Asani Yesu ndiyu wangutombozgeka kweniso kutifwiya, nanga nchifukwa wuli lemba ili likamba kuti sembi ya uwombozi ‘nchawezi chaku Chiuta’ m’malu mwakukamba kuti ‘nchawezi chaku Yesu’? c

Shirley: Ndiziŵa cha.

Megan: Chiuta ndiyu wangulenga Adamu ndi Eva, mwaviyo, ŵati abuda m’munda wa Edene, angubudiya Chiuta. Iyu watenere kuti wangukwaskika ukongwa ŵana ŵaki ŵaŵi akwamba ŵati amugalukiya. Kweni Yehova wangukamba vo wachitengi kuti wanozgi so vinthu. d Iyu wangusankha mungelu yumoza kuti wazi pacharu chapasi kuti wazije nge munthu wambula ubudi kuti wapereki sembi ya uwombozi. Mwaviyo, tingakamba kuti sembi ya uwombozi njakutuliya kwaku Chiuta. Pe so chifukwa chinyaki cho tingakambiya kuti sembi ya uwombozi nchawanangwa chakutuliya kwaku Chiuta. Kumbi mukuŵanaŵanapu kuti Chiuta wanguvwa wuli Yesu wachibayika?

Shirley: Awa.

Megan: Ndawona vidoli ndi timagalimotu taŵana. Mwe ndi ŵana?

Shirley: Hinya, ndenawu ŵaŵi, munthurumi ndi munthukazi.

Megan: Imwi nge mpapi, muŵanaŵana kuti Yehova wanguvwa wuli mwana waki wachimangika, kunyozeka ndipuso achimupuma? Nanga wanguvwa wuli kuwona mwana waki wachikhomeka pachimiti kuti wafwi kamanakamana nyifwa yakutombozgeka?

Shirley: Vitenere kuti vingumukwaska ukongwa. Kweni ndikuyiŵanaŵanapu cha fundu yeniyi.

Megan: Tingafikapu cha kukonkhoska mo Chiuta wanguvwiya pa zuŵa lo. Kweni tiziŵa kuti nayu wangukwaskika ndi vo vinguchitika kweniso tiziŵa chifukwa cho wanguzomereze kuti ivi vichitiki. Lemba la Yohane 3:16, lititikonkhoske umampha nkhani iyi. Mungaŵerenga?

Shirley: Ee. Likamba kuti: “Pakuti Chiuta wangwanja viyo charu, viyo kuti wangupaska Mwana waki wakuwayija [wapade], alinga kuti yosi wakuvwana mwaku iyu waleki kutayika, kweni waŵi ndi umoyu wamuyaya.”

Megan: Yewu. Wonani so vo vesi ili likamba. Litamba ndi mazu ngakuti: “Chiuta wangwanja . . . charu.” Chiuta wangwanja charu chapasi, ndichu chifukwa chaki wangutuma Mwana waki kuti wazitifwiyi. Kukamba uneneska, sembi ya uwombozi nchanju chikulu cho Chiuta wakutilongo. Ndichu chifukwa chaki chaka chechosi Akaboni aku Yehova awungana kuti achiti mwambu wakukumbukiya nyifwa yaku Yesu. Kumbi mwavwisa vifukwa vo isi tichitiya mwambu wenuwu?

Shirley: Hinya. Ndawonga ukongwa, mwandiwovya kuvwisa vifukwa vo titenere kukumbukiya nyifwa yaku Yesu Khristu.