“Wupu Wakulongozga wasankha kuti mipingu yosi yiyambi kuchita maunganu nga pamasu ndi pamasu kwambiya sabata ya 1 April, pijapija asani boma likaniza.” Chipharazgu chenichi, cho chinguŵikika pa jw.org kukwamba kwa March 2022, chinguŵakondwesa ukongwa Akaboni aku Yehova pacharu chosi. Kweni mulili wa COVID-19 wenga wechendamali. a Kumbi ndi vinthu wuli vo vakhumbikanga kuti ŵanthu wo asanirika pa maunganu aleki kuto mulili uwu? Pavuli pa vyaka pafufupi viŵi kutuliya po tinguleke kuchita maunganu nga pamasu ndi pamasu, kumbi Nyumba za Ufumu zidu zatingi ziŵengi zakwenere kuchitiyamu maunganu?

 Kwa myezi yinandi kuvuli, abali ŵidu angunozgeke mo tingajivikiliya asani tayamba so maunganu ku Nyumba ya Ufumu.

 Pati pajumpha mwezi umoza pe kutuliya po tinguleke kuwungana pamasu ndi pamasu mu 2020, abali a mu Dipatimenti Yakuwonere Ntchitu Zakuzenga ndi Kupanga Mapulanu Pacharu Chosi (WDC), ku Warwick, New York, angwamba kuwona mo mulili wa COVID-19 ungakwaskiya mo tigwiriskiya ntchitu Nyumba za Ufumu kweniso vo tikhumbika kuchita kuti malu ngidu ngakusopiyapu ngajengi ngakuvikilirika.

 Vo vakhumbikanga muvyaru vinyaki venga vakupambana ukongwa ndi vo vakhumbikanga muvyaru vinyaki. Mubali Matthew De Sanctis, yo wateŵete mu dipatimenti ya WDC, wangukamba kuti: “Muvyaru vinyaki, suzgu lo ŵanthu akumana nalu nkhusuzgika kusaniya malu ngakusambiyapu mumanja. Asani pa Nyumba ya Ufumu palivi mupopi, abali akhumbika kugula maji pamwenga kuneŵa mu msinji pamwenga pa dilawu. Muvyaru vinyaki, maboma ngangusazgiyaku vinthu vinyaki vo ngakhumbanga vakukwaskana ndi kuzizirisa munyumba, kusereza mphepu ndipuso vikwangwani vakukwaskana ndi uchanda.”

 Kumbi abali ŵidu anguchita wuli kuti amalani ndi masuzgu ngenanga? Matthew wangukamba kuti mu Nyumba za Ufumu zinyaki, angusaniya kuti “nthowa zipusu kweniso zakutchipa ndipu zenga zakovya ukongwa.” Mwakuyeruzgiyapu, ku Papua New Guinea, agwiriskiyanga ntchitu vithini vapulasitiki vakukwana malita 20 vo venga ndi kamupopi pakusamba mumanja. Mwaviyo abali ŵidu aperekanga vakusambiya mumanja ku Nyumba ya Ufumu yakumuzi mwakugwiriskiya ntchitu ndalama zakukwana madola 40 pe nga ku America. Abali angugula vakusambiyamu mumanja vamampha ukongwa vakujumpha 6,000 kutuliya ku Asia, kuti abali agwiriskiyengi ntchitu mu Nyumba za Ufumu ku Africa.

 Vinthu vinyaki vo gulu lachita nkhuŵika vinthu vakuzizilisiya kuti mu Nyumba za Ufumu muzizirengi umampha. Mipingu yinandi yingugula vakukole mayikulofoni vitalivitali kuti ŵanthu aleki kungako ndi manja. Abali ayesesanga kuleka kuko malu ngo ŵanthu atingako kaŵikaŵi, kweniso angapakanga munkhwala. Malu yanga ngasazgapu vakujuliya visasa ndipuso matapu, chifukwa malu ngenanga ndingu ngangawandisa mavayirasi. Mu vimbuzi, mipingu yinyaki yikuŵika matapu ngo ngatijijula ngija. Kuti abali aguli vosi vo vikhumbika pa Nyumba ya Ufumu yimoza ku Chile, agwiriskiyanga ntchitu ndalama zakukwana madola 1,400 nga ku America.

 Po abali akhumbisiska kuti Nyumba za Ufumu zijengi zakuvikilirika, abali ŵidu atesesa so kugwiriskiya ntchitu umampha ndalama zo mupereka. Mwakuyeruzgiyapu muvyaru vinyaki, abali atovyeka ndi boma chifukwa atiŵaguliya vakusambiyamu mumanja kweniso vakukole mayikulofoni. Maofesi nga nthambi ngagwiriyanga ntchitu limoza kuti ngaleki kunanga ndalama zinandi mwa kugula vinthu vinandi kuluska nyengu zosi. Kanandi maofesi nga nthambi kweniso abali a mu Dipatimenti Yakugula Vinthu Pacharu Chosi agula vinthu ku makampani ngo ngapanga vinthu vo. Venivi vitovya kuti agulengi mwakutchipa kweniso kuti vifikengi pa nyengu yaki.

 Vo abali achita pakuchitiska kuti Nyumba za Ufumu zijengi zakuvikilirika, vawovya kuvikiliya wo akwamba kuluta ku maunganu nga pamasu ndi pamasu. Mzichi Dulcine yo waja ku Peru, wangukamba kuti “wanguchita mantha” wati wavwa kuti tiyambengi kuluta ku Nyumba ya Ufumu. Iyu wanguti: “Ndinguto COVID-19 pati pajumpha nyengu yimanavi kutuliya po mulili uwu ungwambiya. Mwaviyo ndawopanga kuluta ku Nyumba ya Ufumu, chifukwa ndawonanga nge kuti ndingachito so matenda yanga. Kweni ndati ndafika pa Nyumba ya Ufumu, ndinguwona kuti ŵara achita vinthu vinandi vakutiwovya kuja akuvikilirika, nge kupaka munkhwala mumalu ngo ngakoleka kaŵikaŵi, kuŵika vakukole mayikulofoni, kweniso kupopela munkhwala mu Nyumba ya Ufumu yosi pakwamba ndipuso pakumaliya pa maunganu. Vosi venivi vingundiwovya kujivwa kuti nde wakuvikilirika nge mo ndakhumbiyanga.” b

 Mzichi Sara yo waja ku Zambia, wangukumana ndi suzgu linyaki. Iyu wanguti: “Myezi yinandi yo yajumpha, mulumu wangu wakufwa chifukwa cha COVID-19. Ndafipanga mtima kuti ndamuvwa wuli kusanirika pa maunganu kakwamba kwambula mulumu wangu.” Kumbi iyu watuvwa wuli sonu? Iyu wanguti: “Maunganu nga pamasu ndi pamasu ngandisimikiziya kuti Yehova wenasi mu mazuŵa nganu ngakumaliya. Kuluska kali, pasonu panu ndiwona kuti ŵara kweniso abali ndi azichi wosi atindichiskika, atindiyanja kweniso atindiwovya ukongwa, ndipu vinthu venivi ndivu ndikhumbika.”

 Akhristu anyidu pacharu chosi chapasi awonga ukongwa mwaŵi wenuwu wakwamba so kuwungana mu Nyumba za Ufumu. Tiwonga ukongwa ndalama zo mupereka, ndipu zinandi mwa ndalama izi mupereka kuziya pa donate.mr1310.com. Ndalama zenizi zawovya kuti malu ngakusopiyamu mwauneneska ngaje ngamampha kweniso ngakuvikilirika.