Pa 18 August 2023, Mubali Kenneth Cook, Jr., wa mu Wupu Wakulongozga wangutuzga Bayibolu la Charu Chifya la Malemba Ngakupaturika lakunozgeka so mu Chichewa. Bayibolu ili lingutuzgika pa zuŵa lakwamba la Unganu Wachigaŵa wa chaka cha 2023 wa mutu wakuti “Zikirani”! Wo unguchitikiya pa malu nga Unganu nga Lilongwe, ku Malawi. Ŵanthu wo anguwungana pa unganu uwu, angulonde Bayibolu lakuchita kusindikiza kweniso ŵenga ndi mwaŵi wakupanga dawunilodi pa vipangizu vawu vasonu mwakulumikiza ku JW Box.

Nkhani yo yingukambika pakutuzga Bayibolu lenili yingulumikizika ku sitediyamu ya mu chigaŵa chakumwera, muchigaŵa chapakati kweniso mu malu nga unganu nga mu madera nga kumuzi ndipuso pafufupi Nyumba za Ufumu zinandi ku Malawi, kuziya pa JW satelayiti. Nkhani iyi yingulumikizika so ku Nyumba za Ufumu zinyaki ku Mozambique ko ŵanthu alongoro Chichewa. Ŵanthu akukwana 77,112 wo anguwungana mu ma sitediyamu ngaŵi ngenanga kweniso mu malu nga unganu, kusazgiyapu ŵanthu masawuzandi nganandi wo anguwungana mu Nyumba za Ufumu, angukondwa kuvwisiya nkhani yo yingukambika pa nyengu yeniyi.

Chichewa ntchineneru cho ŵanthu anandi alongoro ku Malawi ndipu chikambika ndi ŵanthu akujumpha 10 miliyoni mu charu ichi. Chineneru ichi chikambika so ndi ŵanthu wo aja mu vigaŵa vinyaki ku Mozambique, South Africa, Zambia, ndi Zimbabwe. Bayibolu la Charu Chifya la Malemba nga Chigiriki Ngachikhristu mu Chichewa lingutuzgika mu 2006, ndipu Bayibolu la Charu Chifya losi lamphumphu lingutuzgika mu 2010. Abali ndi azichi mbakukondwa ukongwa kuti sonu ŵe ndi Bayibolu la Charu Chifya la Malemba Ngakupaturika lakunozgeka so mu Chichewa.

Pakukonkhoska va Bayibolu lenili, mupharazgi munyaki wangukamba kuti: “Ŵanthu anandi wo alongoro Chichewa wo titiŵapharazgiya, ŵe ndi ma Bayibolu ngo Chichewa chaki ntchakali ukongwa. Asani taŵapempha kuti aŵerengi lemba mu Bayibolu lawu nyengu zinandi avwisa cha fundu yo aŵerenga.Kweni Bayibolu la Charu Chifya lakunozgeka so, livwika umampha ukongwa. Ndiwona kuswera kuti ndiyambi kuligwiriskiya ntchitu mu upharazgi!”

Tigomezga kuti Bayibolu la Charu Chifya la Malemba Ngakupaturika lakunozgeka so mu Chichewa, liwovyengi abali ndi azichi kweniso ŵanthu wo titiŵapharazgiya kuti ‘akondwengi ndi dangu laku Yehova.’—Salimo 1:2.